ތަފާސް ހިސާބުތައް ދައްކާ ގޮތުން އިގްތިސޯދުގައި އިތުރުވެފައި ހުރި ފައިސާގެ އަދަދު ހަތް ބިލިއަން ރުފިޔާއަށް އަރަ އެވެ. އެމްއެމްއޭގެ މަސައްކަތުން މިހާރު މިވަނީ މި ފައިސާގެ ތެރޭން 2.1 ބިލިއަން ރުފިޔާ އިގްތިސޯދުން ނަގާފަ އެވެ.
މިދިޔަ ސަރުކާރުގައި ފައިސާ ޗާޕު ކުރުމުގެ ސަބަބުން އިގްތިސޯދުގައި އިތުރުވި ފައިސާގެ ތެރޭން 2.1 ބިލިއަން ރުފިޔާ، އޯޕަން މާކެޓު އޮޕަރޭޝަން ހިންގައިގެން މަރުކަޒީ ބޭންކް އިން ނަގައިފި އެވެ.
މަރުކަޒީ ބޭންކް، އެމްއެމްއޭ އިން މިދިޔަ އެއް އަހަރު ތެރޭ މަނިޓަރީ ސިޔާސަތު ތަންފީޒު ކުރަން އަޅާފައިވާ ފިޔަވަޅުތަކާ ބެހޭ ގޮތުން ނެރުނު ބަޔާނެއްގައި ބުނީ ދިވެހި ރުފިޔާގެ އެކްސްޗޭންޖް ރޭޓަށް ކުރަމުންދާ ނޭދެވޭ އަސަރު ކުޑަކުރުމަށްޓަކައި، ބޭންކިން ނިޒާމުގައި ދައުރުވާ ދިވެހި ރުފިޔާގެ ލިކުއިޑިޓީ މަދު ކުރުމަށް، އޯޕަން މާކެޓް އޮޕަރޭޝަންސް ގެ ދަށުން ރިވާސް ރީޕަޗޭސް އޮޕަރޭޝަންސް މިދިޔަ މަހުގެ 23 ވަނަ ދުވަހު ވަނީ ފަށާފަ އެވެ.
އެމްއެމްއޭގެ ހިސާބުތައް ދައްކާ ގޮތުން ފައިސާ ޗާޕު ކުރުމުގެ ސަބަބުން އިގްތިސޯދުގައި އިތުރުވެފައިވާ ފައިސާގެ އަދަދު ހަތް ބިލިއަން ރުފިޔާއަށްވުރެ މައްޗެވެ. ރިކަވާސް ރީޕަޗޭސް ގެ ފުރަތަމަ އޮޕަރޭޝަން އިން ވަނީ ބޭންކިން ނިޒާމުގެ އެކްސެސް ލިކުއިޑިޓީގެ ތެރެއިން 2.1 ބިލިއަން ރުފިޔާ މަދު ކުރުމަކީ ކުރިމަގުގައި ފައިދާ ކުރާނެ ކަމެވެ.
މަރުކަޒީ ބޭންކް އިން އޯޕަން މާކެޓު އޮޕަރޭޝަން މި ފަހަރު ފަށާފައި މިވަނީ 2014 ވަނަ އަހަރަށްފަހު އެވެ.
ފައިސާ އިތުރުވި މައިގަނޑު ސަބަބު - މި ފައިސާ އިތުރުވުމުގެ މައިގަނޑު އެއް ސަބަބަކީ ކޮވިޑް-19 ގެ ބަލިމަޑުކަމާއި ގުޅިގެން ދައުލަތުގެ ހަރަދަށް ޒިންމާވުމުގެ ގާނޫނަށް ރައްޔިތުންގެ މަޖިލީހުން ވަގުތީ ސަސްޕެންޝަން ގެނެސް، ޕަބްލިކް ބޭންކް އެކައުންޓުން (ޕީބީއޭ) ސަރުކާރުން އޯވަޑްރޯކޮށް އަދި އޯވަޑްރޯ ކުރެވިފައިވާ އަދަދުތައް ތިން ފަހަރު ދިގު މުއްދަތުގެ ބޮންޑުތަކަކަށް ބަދަލުކުރުމުގެ ސަބަބުން، ޕީބީއޭ އިން އޯވަޑްރޯކުރުމަށް ޖާގަ ލިބުމާ ގުޅިގެން ބޭންކިން ނިޒާމުގައި ދައުރުވަމުންދާ ރުފިޔާ ލިކުއިޑިޓީ ވަނީ ވަރަށް ބޮޑުތަނުން އިތުރުވި އެވެ. މިގޮތުން، އިގުތިސާދުގައި ދައުރުވާ ރުފިޔާގެ ލިކުއިޑިޓީ ވަނީ 2020 ވަނަ އަހަރާއި އަޅާބަލާއިރު 178 ޕަސެންޓް އިތުރުވެފައިވެ އެވެ.
ނަމަވެސް، ރައީސް ޑރ. މުހައްމަދު މުއިއްޒުގެ ސަރުކާރު ވެރިކަމަށް އައިސް ފައިސާ ޗާޕު ކުރުން ވަނީ ހުއްޓާލާފަ އެވެ. މި ބަދަލާއެކު އިގްތިސޯދުގައި ދައުރުކުރާ ފައިސާގެ އަދަދު ދަށަށް ދިޔަ އެވެ.
އެމްއެމްއޭ އިން ބުނީ ބޭންކުތަކުން ސަރުކާރުގެ ސެކިއުރިޓީސް (ޓީ-ބިލް އަދި ޓީ-ބޮންޑް) ގައި އިންވެސްޓްކުރުމާއި ރުފިޔާއިން ދޫކުރާ ލޯނު އިތުރުވުމުގެ ސަބަބުން، 2024 ވަނަ އަހަރު ބޭންކިން ނިޒާމުގައި އިތުރަށް ހުރި ރުފިޔާގެ ލިކުއިޓީ ކޮންމެވެސް ވަރަކަށް ދަށަށް ދިޔަނަމަވެސް، 2025 ވަނަ އަހަރު ރުފިޔާގެ އެކްސެސް ލިކުޑިޓީ އަނެއްކާ ވެސް ވަނީ މައްޗަށް ދާންފަށާފައިވާ ކަމަށެވެ.
ތަފާސް ހިސާބުތައް ދައްކާ ގޮތުން މި އަހަރުގެ ޖޫން މަހު ބޭންކިން ނިޒާމުގައި ރުފިޔާ ލިކިއުޑިޓީގެ ގޮތުގައި އެވްރެޖްކޮށް ހުރީ 7.0 ބިލިއަން ރުފިޔާ އެވެ. މިއީ، އަހަރުން އަހަރަށް ބަލާއިރު ދެ ޕަސެންޓުގެ އިތުރު އަދަދެކެވެ.
އެމްއެމްއޭއިން ބުނީ ބޭންކުތަކުގައި ހުރި ޑިޕޮސިޓްތަކަށް ބަލާއިރު، 2020 ވަނަ އަހަރުގެ އޭޕްރިލް މަހު ޕީބީއޭ އޯވަޑްރޯ ކުރަން ފެށުމާއެކު ދިވެހި ރުފިޔާގެ ޑިޕޮސިޓްސް ވަރަށް ބޮޑުތަނުން ވަނީ އިތުރުވެފައިވާ ކަމަށެވެ. އަދި ރުފިޔާ ޑިޕޮސިޓްސް މިހާރުވެސް އިތުރުވަމުން ދާއިރު، 2025 ވަނަ އަހަރުގެ ޖޫން މަހުގެ ނިޔަލަށް މިފަދަ ޑިޕޮސިޓްސް ވަނީ އަހަރުން އަހަރަށް ބަލާއިރު 18 ޕަސެންޓުން އިތުރުވެފައިވާ ކަމަށެވެ. އެހެންނަމަވެސް، 2022 ވަނަ އަހަރުން ފެށިގެން ބޭރު ފައިސާގެ ޑިޕޮސިޓްސް އިތުރުވާ މިންވަރު ވަރަށް ބޮޑަށް މަޑުޖެހިފައިވާ ކަމަށް އެ އޮތޯރިޓީން ބުންޏެވެ.