ހައްޖު ކޯޕަރޭޝަނުން މާފުށީގައި ހަދާ ސިޓީ ހޮޓެލް އަޅައިދޭނެ ބަޔަކު ހޯދަނީ

އާމްދަނީ އިތުރުކުރުމަށް ހައްޖު ކޯޕަރޭޝަނުން ކ. މާފުށީގައި ހިންގަން ނިންމާފައިވާ ހަލާލު ޓޫރިޒަމްގެ މަޝްރޫއިގެ ދަށުން ސިޓީ ހޮޓަލެއް އަޅައިދޭނެ ބަޔަކު ހޯދަން މިއަދު އިއުލާނު ކޮށްފި އެވެ.

ހައްޖު ކޯޕަރޭޝަނުން މިއަދު ގެޒެޓު ކުރި އިއުލާނެއްގައި ބުނީ، ކޮންޓްރެކްޓަރު ފައިނޭންސް ކުރާ އުސޫލުން އަޅާ އެ ހޮޓަލަކީ މާފުށީ އިސްލާމިކް ޓޫރިޒަމް ޕްރައިވެޓް ލިމިޓެޑް (އެމްއައިޓީ) ގެ ޕްރޮޖެކްޓެއް ކަމަށެވެ. އެމްއައިޓީއަކީ ހައްޖު ކޯޕަރޭޝަންގެ ސަބްސިޑަރީ ކުންފުންޏެކެވެ.

އެ ހޮޓާ އަޅަން ޝައުގުވެރިވާ ކުންފުނިތަކުން މިމަހުގެ 13 ވަނަ ދުވަހުގެ ކުރިން ހައްޖު ކޯޕަރޭޝަނުގައި ރަޖިސްޓްރީ ކުރަންޖެހެ އެވެ. ރަޖިސްޓްރީ ކުރެވޭނީ 30،000 ރުފިޔާ ނުވަތަ 2000 އެމެރިކާ ޑޮލަރު ދެއްކުމުންނެވެ. އެ ފައިސާ އަނބުރާ ނުލިބޭނެ ކަމަށް ވެސް އެ އިއުލާނުގައިވެ އެވެ.

އެ އިއުލާނުގައި އިތުރަށް ބުނެފައި ވަނީ އެ މަޝްރޫއަށް ބިޑު ކުރާ ނަމަ، ބިޑު ސެކިއުރިޓީގެ ގޮތުގައި ވެސް 800،000 ރުފިޔާ ބަހައްޓަންޖޭނެ ކަމަށާއި ބިޑާ ގުޅޭ ޑޮކިއުމެންޓްތައް ލިބޭނީ ރަޖިސްޓްރޭޝަން ފީ ދެއްކުމުން ކަމަށެވެ.

މާފުށީގައި ހަލާލު ޓޫރިޒަމް މަޝްރޫއު ހިންގަން ބިމެއް ލިބިފައިވާ ކަމަށް އެ ކުންފުނީގެ ސީއީއޯ މުހައްމަދު ޝަކީލު މީގެ ކުރިން ވިދާޅުވެފައިވެ އެވެ. އަދި އިންވެސްޓް ކުރާނެ މީހުން ވެސް ހޯދާފައިވާ ކަމަށް އޭނާ ވިދާޅުވެފައިވެ އެވެ.

ހައްޖު ކޯޕަރޭޝަނުން ހޮޓަލެއް އަޅައިދޭނެ ބަޔަކު ހޯދަން އިއުލާނު ކުރިއިރު، މީހުން ހައްޖަށް ގެންދާ ކުންފުންޏަކުން ގެސްޓް ހައުސް ހިންގުމުގެ ސަބަބުން ނިކުންނާނެ ނަތީޖާ ރަގަޅު ނުވާނެ ކަމަށް ފިނޭންސް މިނިސްޓަރު މޫސާ ޒަމީރު ވަނީ ވިދާޅުވެފަ އެވެ.

މިނިސްޓަރު ވިދާޅުވީ ގެސްޓް ހައުސް ހިންގުންފަދަ ކަންކަން ކުރުމަކީ ކުންފުންޏަށް ފައިދާ ހުރި ކަމެއްތޯ ކުންފުނީގެ ބޯޑުންނާއި ހިއްސާދާރުން ވިސްނާލަން ޖެހޭ ކަމަށެވެ. ޓޫރިޒަމަށް އިންވެސްޓު ކުރާނަމަ، އެފަދަ ކުންފުނިތައް ސަރުކާރުގައި އެބަހުރި ކަމަށް ވެސް ވިދާޅުވި އެވެ.