ކުޅުދުއްފުށީގައި ފަތިހު ދުވަން ނުކުތް ދުވަސްވީ މީހަކު މަރުވެފައި އޮއްވާ ފެނެއްޖެ

ކުޅުދުއްފުށި ސިޓީގައި ފަތިހު ދުވަން ނުކުތް އުމުރުން 67 އަހަރުގެ މީހަކު މަރުވެފައި އޮއްވާ ފެނެއްޖެ އެވެ.

ފުލުހުން ބުނީ އެރަށު، ޖިފުޑި، ހަސަން މޫސާ މިއަދު ފަތިހު 5:00 ގައި ގެއިން ނުކުމެގެން ދުވަން ދިޔަ ގޮތަށް ހަބަރެއް ނުވެގެން ހެނދުނު 10:30 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.

އެ ރިޕޯޓާ ގުޅިގެން ހަސަން މޫސާ ހޯދުމުގެ މަސައްކަތް ކުރަމުން ދަނިކޮށް، ކުޅުދުއްފުށި ޒޯން ސްޓޭޑިއަމް ފާހާނާ ތެރޭގައި ވެއްޓިފައި އޮއްވައި ފެނިފައިވާ ކަމަށާއި، ވަގުތުން އޭނާ ހޮސްޕިޓަލަށް ގެންގޮސްފައިވާ ކަމަށް ފުލުހުން ބުންޏެވެ.

"ހޮސްޕިޓަލަށް ގެންދިޔައިރު ވެސް މީހާ ނިޔާވެފައިވާ ކަމާއި، މީހާގެ ބޭރުފުށުން އެއްވެސް އަނިޔާއެއް ފެންނަން ނެތް ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވޭ،" ފުލުހުން ބުންޏެވެ.

ފުލުހުން ބުނީ މި މައްސަލަ ތަހުގީގު ކުރަމުންދާ ކަމަށެވެ.