ޝަހީދުގެ ނަން އަނބުރާ ގެންދިއުމުން ހައިކޯޓުގެ ފަނޑިޔާރު ކަމަށް ހުޅުވާލައިފި

ހައި ކޯޓުގެ ފަނޑިޔާރު ކަމަށް އައްޔަން ކުރަން ނިންމި ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު، މުހައްމަދު ޝަހީދުގެ ނަން އަނބުރާ ގެންދިއުމުން، އެ ކޯޓުގެ ފަނޑިޔާރު ކަމަށް ކުރިމަތިލާން އަނެއްކާ ވެސް ހުޅުވާލައިފި އެވެ.

ހައިކޯޓުގެ ފަނޑިޔާރުކަމުގެ ދެ މަގާމު ހުސްވީ، ސުޕްރީމް ކޯޓުގެ ފަނޑިޔާރު ކަމަށް އެ ކޯޓުގެ އިސް ފަނޑިޔާރުކަމުގައި ހުންނެވި ހުސައިން ޝަހީދާއި، އެ ކޯޓުގެ ފަނޑިޔާރު މުހައްމަދު ސަލީމް އައްޔަނުކުރެއްވުމާ ގުޅިގެންނެވެ.

އެ ދެ މަގާމަށް އައްޔަނު ކުރަން ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމީ ޝަހީދުގެ އިތުރުން ސިވިލް ކޯޓުގެ ކުރީގެ ގާޒީ އަބްދުﷲ ޖަމީލް މޫސާ އެވެ. ނަމަވެސް ޝަހީދަކީ ސިޔާސީ ބޭފުޅެއް ކަމަށް ބުނެ ފާޑުކިޔުން އަމާޒުވުމުން އޭނާ ވަނީ ނަން އަނބުރާ ގެންގޮސްފަ އެވެ.

އެހެންވެ، މިދިޔަ އާދީއްތަ ދުވަހުގެ ރޭ ބޭއްވި ރަސްމިއްޔާތުގައި ފަނޑިޔާރު ކަމުގެ ހުވާ ކުރެއްވީ ޖަމީލް އެކަންޏެވެ.

ޖޭއެސްސީން މިއަދު ކުރި އިއުލާނުގައި ބުނީ ހައި ކޯޓުގެ ފަނޑިޔާރު ކަމަށް ކުރިމަތިލާން ބޭނުންވާ ބޭފުޅުން، އަންނަ ހަފުތާގެ އަންގާރަ ދުވަހުގެ މެންދުރު 12:00ގެ ކުރިން ކުރިމަތިލުމުގެ ފުރުސަތު ހުޅުވައިލާފައިވާ ކަމަށެވެ.

ޖޭއެސްސީގެ އިއުލާނުގައިވާ ގޮތުގައި އެ މަގާމުގެ އަސާސީ މުސާރައަކީ 45،700 ރުފިޔާ އެވެ. ލިވިން އެލަވަންސްގެ ގޮތުގައި 18,000 ރުފިޔާ އަދި ރިސްކް އެލަވަންސްގެ ގޮތުގައި 3،300 ރުފިޔާ ލިބޭނެ އެވެ. އޭގެ އިތުރު މެޑިކަލް އަދި ފޯނު އިންޝުއަރެންސް ވެސް ލިބޭނެ އެވެ.

މީގެ ކުރިން ހުޅުވައިލި ފުރުސަތުގައި 17 ބޭފުޅަކު ކުރިމަތިލެއްވި އެވެ.