ބޮޑު ބަޔަކަށް މޫސުން ގޯސްވެ، ޔެލޯ އެލާޓް

ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި މިއަދު ބޮޑު ބަޔަކަށް ޔެލޯ އެލާޓް ނެރެފި އެވެ.

މެޓް އޮފީހުން ޔެލޯ އެލާޓް ނެރެފައި ވަނީ ހއ. އަތޮޅުން ފެށިގެން ކ. އަތޮޅާ ހަމައަށެވެ. މެންދުރުފަހު 1:30 އާ ހަމައަށް ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 50 މޭލަށް ވައިގަދަވާނެ ކަމަށް އެ އެލާޓުގައި ލަފާކޮށްފައިވެ އެވެ.

އޭގެ އިތުރުން ގަދައަށް ވައިޖެހޭނެ ކަމަށް ލަފާކޮށް އއ. އަތޮޅުން ފެށިގެން ލ. އަތޮޅާ ހަމައަށް ވަނީ ވައިޓް އެލާޓް ނެރެފަ އެވެ. އެ އެލާޓުގައި، ގަޑިއަކު 45 މޭލަށް ވައިގަދަވާނެ ކަމަށް ވަނީ ލަފާކޮށްފަ އެވެ.

އެހެންވެ، ރާއްޖޭގެ ބޮޑު ސަރަހައްދަކަށް ކަނޑުތައް ވަރަށް ގަދަވާނެ ކަމަށް މެޓް އޮފީހުން ވަނީ ލަފާކޮށްފަ އެވެ.

މެޓް އޮފީހާ ހަވާލާދީ އެމްއެންޑީއެފުން އިއްޔެ ބުނެފައި ވަނީ މާދަމާގެ ނިޔަލަށް މޫސުން ވަރަށް ގޯސްވާނެ ކަމަށެވެ. އެހެންވެ، ކަނޑުދަތުރުތައް މަޑުޖައްސާލަން ވަނީ އިލްތިމާސްކޮށްފަ އެވެ. ކޮންމެހެން ކުރަން ޖެހޭ ދަތުރެއް ނޫނީ ކަނޑުމަގުން ނުކުރުމަށާއި އަދި ރޭގަނޑު ދަތުރު ނުކުރުމަށް ވެސް ވަނީ އިލްތިމާސްކޮށްފަ އެވެ.