މިނިސްޓަރު ސައީދު ވިދާޅުވި ގޮތުގައި ޓާމިނަލް ހިދުމަތައް ގެނައުމާއެކު އިގްތިސޯދީ ގޮތުން ކުރިއެރުން ލިބިެންދާނެ އެވެ. ސަރުކާރުތަކުން މިތަން ހުޅުވޭތޯ މަސައްކަތްކުރި އެހެންވެކަން ސައީދު ފާހަގަ ކުރެއްވި އެވެ.
ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލް "އެފްވަން" ހުޅުވުމަކީ ރާއްޖޭގައި ތިބި އިންވެސްޓަރުންނާއި އަންނަން ތިބި ފަރާތްތަކަށް ލިބިގެން ދިޔަ ބޮޑު ޔަގީންކަމެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ގައުމީ ޓީވީގައި ވާހަކަ ދައްކަވަމުން އިކޮނޮމިކް މިނިސްޓަރު ސައީދު ވިދާޅުވި ގޮތުގައި މިހާތަނަށް ރާއްޖެއާ ބެހޭ ގޮތުން ދުނިޔޭގެ މާލީ އިދާރާތަކުން ހެދި ހުރިހާ ރިޕޯޓްތަކެއްގައިވެސް ވީއައިއޭ އާ ޓާމިނަލްގެ ވާހަކަ އޮތް ކަމަށާ އެ ޓާމިނަލްގައި ހިދުމަތް ފެށުމުން އަންނާނެ ކުރިއެރުން ބަޔާންކޮށްފައިވާ ކަމަށެވެ. އަދި ވީއައިއޭއަކީ ރާއްޖޭގެ އިގްތިސޯދަށް އެންމެ މުހިންމު އެއް ތަނުގެ ގޮތުގައި އޮތްއިރު މިވަރުގެ ޒަމާނީ ވަސީލަތްތަކާއެކު ތަނެއް ހުޅުވުމަކީ އިންވެސްޓަރުންނަށް ލިބިގެން ދިޔަ ބޮޑު އިތުބާރަަށް ވާނެ ކަމަށް ސައީދު ވިދާޅުވި އެވެ.
މިނިސްޓަރު ފާހަގަ ކުރެއްވި ގޮތުގައި ރާއްޖޭގެ މުހިންމު މި އެސެޓް ތަރައްގީ ކުރަން ސަރުކާރުތަކުން މަސައްކަތް ތަކެއް ކުރިކަމަށާ އެކަން ކުރުމުގެ މައިގަނޑު ސަބަބަކީ މިތަނުގެ މުހިންމުކަން އިތުރުވުމެވެ.
"ތެޔޮ އުފައްދާ ގައުމުތަކަށް އޭގެ ވަސީލަތްތައް މުހިންމުވާ ގޮތަށް ރާއްޖޭގެ އިގްތިސޯދަށް ވީއައިއޭ ތަރައްގީ ކުރުން މުހިންމުވޭ. އެހެންވެ އެ މަސައްކަތް ކުރީ. ރައީސް ޑރ. މުއިއްޒު ވެރިކަމަށްވަޑައިގެން ވެސް އެންމެ އިސްކަމެއް ދެއްވީ މިތަން [ވީއައިއޭ] ޓާމިނަލް ނިންމަން. ފުރަތަމަ ގައުމާ މުހާތަބުކޮށް ދެއްވި ތަގުރީރުގައިވެސް އެކަން ފާހަގަ ކުރެއްވި. އެކަމަށް ހަގީގަތުގައި ކުރު މުއްދަތެއްގެ ތެރޭގައި ގިނަ މަސައްކަތްތަކެއް މި ސަރުކާރުން ވަނީކޮށްފަ،" ސައީދު ވިދާޅުވި އެވެ.
ރައީސް އަބްދުﷲ ޔާމީންގެ ވެރިކަމުގައި ވީއައިއޭ ތަރައްގީ ކުރުމުގެ ބިޔަ މަޝްރޫއު ފެށިއިރު އެންމެ އިސްކޮށް ހަރަކާތްތެރިވި ސައީދު ވިދާޅުވި ގޮތުގައި ޖީއެމްއާރު ކުންފުނިން އެއާޕޯޓް ހިންގަން އެމްޑީޕީގެ ސަރުކާރުން ހަވާލުކޮށް މަސައްކަތް ފެށިއިރު އެއާޕޯޓު މުސްތަގުބަލުގައި ތަރައްގީ ކުރުމުގެ ގިނަ ޕްލޭންތަކެއް ނެތެވެ. މިގޮތުން ސައީދު ފާހަގަ ކުރެއްވި އެއް ކަމަކީ ރަންވޭ ތަރައްގީ ކުރުން ފަދަ މުސްތަގުބަލްގައި އަތުވެދާނެ ގޮންޖެހުންތަކުން އިގްތިސޯދު އަރައިގަންނާނެ ވަސީލަތްތައް ޕްލޭންގައި ނެތުމެވެ. ނަމަވެސް އެ ވެރިކަމުގައި ކޯޑްއެފް ރަންވޭ އާއި އިތުރު ވަސީލަތްތައް ތަރައްގީކޮށްފައިވާކަން މިނިސްޓަރު ފާހަގަ ކުރެއްވި އެވެ.