ޖޫން އިން ޖޫން އަށް | ރިޒާވަށް 300 މިލިއަން ޑޮލަރު އިތުރުވުމެއް

މި އަހަރުގެ ޖޫން މަހާއި މިދިޔަ އަހަރުގެ ޖޫންއާ އަޅާ ކިޔާއިރު ރާއްޖޭގެ ޖުމްލަ ރިޒާވް އަށް 300 މިލިއަން ޑޮލަރު އިތުރުވުމެއް ލިބިއްޖެ އެވެ.

މޯލްޑިވްސް މަނިޓަރީ އޮތޯރިޓީން ކޮންމެ މަހަކު އާއްމުކުރާ އިކޮނޮމިކް އަޕްޑޭޓް (އީޔޫ) ގައިވާ ގޮތުން މި އަހަރުގެ ދެވަނަ ކުއާޓަރުގެ ފަހު މަސް ކަމަށްވާ ޖޫން މަހު ރާއްޖޭގެ ޖުމްލަ ރިޒާވްގައި ހުރީ 832.4 މިލިއަން ޑޮލަރެވެ. މި އަދަދަކީ މިދިޔަ އަހަރުގެ ޖޫން މަހު ހުރި 509.2 މިލިއަން ޑޮލަރާ އަޅާ ކިޔާނަމަ 323.2 މިލިއަން ޑޮލަރުގެ އިތުރުވުމެކެވެ. 

އެމްއެމްއޭގެ ރިޒާވް ހިސާބުތައް ދައްކާ ގޮތުގައި ޖޫން މަސް ނިމުނުއިރު ރާއްޖޭގެ ރިޒާވްގައި ހުރީ ޖުމްލަ 832.4 މިލިއަން ޑޮލަރެވެ. މިއީ މެއި މަހު ހުރި 815.8 މިލިއަން ޑޮލަރާ އަޅާ ބެލިނަމަވެސް އިތުރުވުމެކެވެ. 

ޖުމްލަ ރިޒާވް މަތިވިނަމަވެސް ރާއްޖޭގެ ޔޫޒަބަލް ރިޒާވްއަކީ އެވްރެޖުކޮށް 200 މިލިއަން ޑޮލަރުގައި ހުންނަ އަދަދެކެވެ. އާއްމުކޮށް ހުންނާނީ ދެ މަހުގެ އެކްސްޕޯޓުގެ ފައިސާ އެވެ. ރާޢްޖޭގެ ޔޫޒަބަލް ރިޒާވްއިން އެންމެ ބޮޑު ހޭދައެއް ކުރަން ޖެހޭ އެއް ދާއިރާއަކީ ރާއްޖެއަށް ބޭނުންވާ ތެޔޮ އެތެރެ ކުރަން ބޭނުންވާ ފައިސާ އެވެ. އަދި ދަރަނި އަދާ ކުރުމެވެ. 

ރިޒާވް އިތުރުވީ ކީއްވެ؟ - ރާއްޖޭގެ ރިޒާވްގެ ނަމްބަރު ޓޫރިޒަމް އޮފް ސީޒަންގައިވެސް ދަށްނުވެ ހިފެހެއްޓުމުގެ މައިގަނޑު ސަބަބަކީ ބޭންކިން ނިޒާމަށް ޑޮލަރު މާރުކުރަން ލާޒިމްކޮށް ސަރުކާރުން ގެނެސްފައިވާ ބަދަލެވެ. މި ގާނޫނުގައިވާ ގޮތުން ބޭރު ފައިސާ އިން ލިބޭ އާމްދަނީން ބައެއް މާރުކުރުމުގައި "ކެޓެގަރީ އޭ" ގައި ހިމެނޭ ރިސޯޓްތަކަށް ލިބޭ އިހުތިޔާރަކީ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރުން ނުވަތަ ކޮންމެ މަހެއްގެ ޖުމްލަ އާމްދަނީގެ 20 ޕަސެންޓް ޑޮލަރު މާރު ކުރުމެވެ.

އަދި "ކެޓެގަރީ ބީ" ގެ ދަށުން ގެސްޓް ހައުސްތަކުން ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 ޕަސެންޓް ކުރުމުން ފުދެ އެވެ. މި ބަދަލާއެކު މިދިޔަ އަހަރުގެ އޮކްޓޯބަރު މަހުން ފެށިގެން މިދިޔަ މަހުގެ ނިޔަލަށް ބޭންކިން ނިޒާމަށް މާރުކުރާ އަދަދު އިތުރުވަމުން ދިއުމެވެ. މިއާއެކު ދަރަނި ދެއްކުމާއި ރިޒާވް މެނޭޖު ކުރަން އަބަދު ބޭރަށް ބަރޯސާވުން ކުޑަކޮށް އަމިއްލައަށް ގައުމުގެ ރިޒާވް މެނޭޖު ކުރަން ވަނީ ފެށި އެވެ.