ޑޮލަރު ހައްލު ކުރުމަށް އަޅާ ފިޔަވަޅުތައް ކިޔައިދޭން ގަވަރުނަރު މަޖިލީހަށް

ރާއްޖެއަށް ކުރިމަތިވެފައިވާ ޑޮލަރުގެ އަގު މަތިވުމުގެ މައްސަލަ ހައްލުކުރަން މަރުކަޒީ ބޭންކް (އެމްއެމްއޭ) އިން އަޅަމުން ގެންދާ ފިޔަވަޅުތައް ކިޔައިދޭން ގަވަރުނަރު އަހުމަދު މުނައްވަރު މިއަދު މަޖިލީހަށް ވަޑައިގެންފި އެވެ. 

މިރާ އަށް އެނގިފައިވާ ގޮތުގައި ޑޮލަރުގެ މައްސަލަ ހައްލުކުރަން އަޅާ ފިޔަވަޅުތައް ކިޔައިދޭން ގަވަރުނަރު މުނައްވަރު މަޖިލީހަށް ވަޑައިގަތީ އެމްއެމްއޭއިން އަމިއްލަ ގޮތުން އިސް ނަގައިގެންނެވެ. މަޖިލީހުގެ މާލިއްޔަތު ކޮމެޓީގައި މިހާރު ކުރިއަށްދާ މި ބައްދަލުވުން ސިއްރު ކުރަން އެ ކޮމެޓީން ވަނީ ނިންމާފަ އެވެ. 

އެމްއެމްއޭ އިން ދަނީ ޑޮލަރުގެ މައްސަލަ ހައްލުކުރަން ގިނަ ފިޔަވަޅުތަކެއް އަޅުއްވަމުންނެވެ. އެގޮތުން މިދިޔަ މަހުގެ 24 ވަނަ ދުވަހުން ފެށިގެން އެމްއެމްއޭއިން ބޭރު ފައިސާގެ ޑިޕޮސިޓްތަކަށް ހަމަޖައްސާފައިވާ މިނިމަމް ރިޒާވް ރިކުއާމަންޓް ނުވަތަ އެމްއާރްއާރް 7.5 ޕަސެންޓުން 5.0 ޕަސެންޓަށް ވަނީ ދަށްކޮށްފަ އެވެ. މި ފިޔަވަޅުގެ ސަބަބުން ބޭންކިން ނިޒާމަށް އިތުރު ލިކުއިޑިޓީ ވަންނަ އަދަދު އިތުރުވެ، ލޯނު ދޫކުރުމަށް ބޭންކްތަކަށް އިތުރު ޑޮލަރު ލިބޭނެ އެވެ.

މި ބަދަލުގެ ސަބަބުން އަސަރު ކުރާނީ ހަމައެކަނި ބޭރު ފައިސާގެ ޑިޕޮސިޓަށެވެ. މައިގަނޑު ގޮތެއްގައި މިއީ އެމެރިކާ ޑޮލަރުން ހުރި ޑިޕޮސިޓްތަކެވެ. ރުފިޔާގެ ޑިޕޮސިޓްތަކަށް މި ބަދަލުގެ އަސަރެއް ނުކުރާނެ އެވެ. އަދި އެ ޑިޕޮސިޓްތަކަށް މިހާރު ކަނޑައަޅާފައިވާ އެމްއާރްއާރް އޮންނާނީ ކުރިން އޮތް މިންވަރުގަ އެވެ.

އެމްއެމްއޭގެ މި ބަދަލަކީ ލިކުއިޑިޓީ އެންމެ އެކަށީގެންވާ ގޮތުގައި ބެލެހެއްޓުމަށާއި ބޭންކިން ނިޒާމު އޮމާންކަމާއެކު ހިންގުން ކަށަވަރުކުރުމަށް ގެނެވުނު ފުޅާ ދާއިރާއެއްގެ ސިޔާސަތުގެ ބަދަލުގެ ބައެކެވެ. އަދި މިއީ އެމްއެމްއޭ އިން މާކެޓުގެ ހާލަތަށް އަންނަ ބަދަލުތަކާ އެއްގޮތަށް މާލީ ހަރުދަނާކަން ރައްކާތެރިކުރުމާއެކު ހެކީގެ މައްޗަށް ބިނާކޮށް އަވަސް އަދި އެކަށޭނަ ފައިސާގެ ސިޔާސަތު ގެންގުޅުމުގެ އިލްތިޒާމު ދައްކުވައިދޭ ކަމެކެވެ.

އެމްއެމްއޭ އިން ކޮންމެ އަހަރަކު ވެސް ބިލިއަނެއްހާ ޑޮލަރު، މި މައްސަލަ ހައްލުކުރަން ދޫކުރެ އެވެ. މިގޮތުން މި ޑޮލަރުގެ ބޮޑު ޕަސެންޓެއް މިހާތަނަށް ނަގަކީ އެސްއޯއީތަކުންނެވެ. ދެން އެންމެ ބޮޑު ބައެއް ދޫކުރަނީ ބޭންކްތަކަށެވެ. ދިވެހިން ބޭރަށް ކުރާ ދަތުރުތަކުގައި އެއާޕޯޓުން ދޫކުރާ ޑޮލަރާއި އާސަންދަ އަދި ބޭރުގައި ކިޔަވާ ކުދިންނަށް ދޫކުރާ ޑޮލަރަކީވެސް އެމްއެމްއޭއަށް ލިބޭ ޑޮލަރުން ބޭންކްތަކަށް ދޫކުރާ ބޭރު ފައިސާ އެވެ. 

މި ބަދަލާއެކު ބޭންކްތަކުން ވަނީ ވިޔަފާރިވެރިން ޓީޓީ ހަދަން ދޫކުރާ ޑޮލަރުގެ އަދަދު އިތުރު ކުރަމުންނެވެ. މިގޮތުން ކުރިން ޓީޓީ ހަދަން އަންނަ އަދަދުގެ 10 ޕަސެންޓް ދޫކުރިނަމަވެސް މިހާރު މި އަދަދު ވަނީ 40 ޕަސެންޓަށް މަތިކޮށްފަ އެވެ.