ރިޕޯޓް ލީކޮށްލުމުގެ ދެ ދުވަސް ކުރިން އަޝްރަފު ވަކިކުރަން އޮތީ ނޯޓިސް ދީފައި

ފައިނޭންޝަލް ފްރޯޑްތައް ދެނެގަންނަން މަރުކަޒީ ބޭންކުގައި އޮންނަ، ފައިނޭންޝިއަލް އިންޓެލިޖެންސް ޔުނިޓު (އެފްއައިޔޫ) ގެ ވެރިޔާ އަބްދުﷲ އަޝްރަފް ވަކި ކުރަން ނޯޓިސް ދީފައި އޮތްކަން އެނގިއްޖެ އެވެ. 

ދަ މިރާ އަށް އެނގިފައިވާ ގޮތުގައި އެމްއެމްޕީއާރުސީގެ ބޮޑު ކޮރަޕްޝަނާ ބެހޭ ގޮތުން އެންޓިކޮރަޕްޝަނުން އެކުލަވާލި ރިޕޯޓުގައި ވެސް އިހުމާލުގެ ތުހުމަތު އިނގިލި ދިއްކުރި އޭރުގެ އެފްއައިޔޫ ހިންގުމާ ހަވާލުވެ ހުންނެވި އިސްވެރިޔާ އަޝްރަފް އެތަނުން އިއްޔެ ބަދަލު ކުރަން ނޯޓިސް ދީފައި ވަނީ މިދިޔަ ޖުލައި މަހުގެ 31 ވަނަ ދުވަހު އެވެ.  

އެހެންވެ، ބެލެވޭ ގޮތުގައި ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ޝުޖާއުގެ ހިއްސާ އޮންނަ ކުންފުނިތަކަކަށް ނާޖާއިޒު މަންފާ ލިބޭ ގޮތަށް ހިންގާފައިވާ ބައެއް މުއާމަލާތްތަކަކާ ބެހޭ ރިޕޯޓް ލީކުކޮށްލާފައިވަނީ މަގާމު ބަދަލު ކުރާނެކަން ޔަގީންވުމުންނެވެ. ކާކުކަން ނޭނގޭ ގޮތަށް ހިންގާ ސޯޝަލް މީޑިއާ ޗެނަލްތަކުން އެ ރިޕޯޓް ލީކުކޮށްލީ މިމަހުގެ ދެވަނަ ދުވަހު އެވެ.

އަޝްރަފް މަގާމު ބަދަލު ކުރުމާ ބެހޭ ގޮތުން އެމްއެމްއޭއިން ބުނެފައިވާ ގޮތުގައި މި ބަދަލު ގެނެސްފައިވަނީ އެ އޮތޯރިޓީ ހިންގުން ހަރުދަނާކުރުމަށް ގެންނަމުންދާ ސްޓަރަކްޗަރަލް ބަދަލުތަކުގެ ތެރެއިންނެވެ، މި ބަދަލުތަކުގެ ތެރެއިން ފައިނޭންޝިއަލް އިންޓެލިޖެންސް ޔުނިޓުގެ ހެޑްގެ މަގާމަށް އިސްމައިލް ސާޖިދު ވަނީ އައްޔަނުކޮށްފަ އެވެ. ސާޖިދާއި އެ މަގާމު ހަވާލުކޮށްފައިވާއިރު، އެ މަގާމުގައި ކުރިން ހުންނެވި އަޝްރަފު ވަނީ ރިސްކް އެންޑް ކޮމްޕަޔަލަންސަށް ބަޔަށް ބަދަލުކޮށްފަ އެވެ. 

ލީކުކުރި ރިޕޯޓާ ގުޅޭ ގޮތުން ޝުޖާއު ސޯޝަލް މީޑިއާގައި ކުރެއްވި ޕޯސްޓެއްގައި ޝުޖާއު ވިދާޅުވެފައި ވަނީ، އެ ރިޕޯޓަކީ ސައްހަ އެއްޗެއް ކަމެއް ނުވަތަ ނޫން ކަމެއް އެނގިވަޑައިނުގަންނަވާ ކަމަށެވެ. އެއްވެސް ރަސްމީ އިދާރާއަކުން އެކަމުގެ މައުލޫމާތު ރަސްމީކޮށް ލިބިފައި ނުވާ ކަމަށް ވެސް އޭނާ ވިދާޅުވި އެވެ.

ސޯޝަލް މީޑިޔާގައި އާންމުވެފައިވާ އެ ރިޕޯޓުން ފެންނަ ގޮތުގައި ނޮވެމްބަރު 1، 2023 އިން ޖެނުއަރީ 2024 އަށް ޝުޖާއު އާއި އާއިލާގެ ހިއްސާ އޮންނަ ކުންފުނިތަކަށް ސަރުކާރުގެ އެކި އިދާރާތަކުން 42.5 މިލިއަން ރުފިޔާ އެކި އިވެންޓުތަކާ ގުޅުވައިގެން ދީފައި ވެ އެވެ.

ފުލުހުން އިއްޔެ ވަނީ ޝުޖާއަށް ތުހުމަތު ކުރެވޭ އެ މައްސަލަ ތަހުގީގު ކުރަމުން އަންނަ ކަމަށް ވެސް ބުނެފަ އެވެ.