ކައުންސިލްތަކުގެ މާލީ ބާރުވެރިކަން ހަނިވާ ގޮތަށް އިސްލާހެއް
އޭގެ އިތުރުން، ކައުންސިލްތަކުގެ އުމުރުގެ ފަހު އަހަރުގެ ތެރޭގައި ކައުންސިލްތަކުގެ މުހިންމު މާލީ ކަންކަން ނިންމުމުގެ އަމަލުކުރަން ޖެހޭ އުސޫލު ބަޔާން ކުރުން ވެސް ގާނޫނު އިސްލާހު ކުރާ ސަބަބުތަކުގެ ތެރޭގައި ބަޔާންކޮށްފައިވެ އެވެ.
ލޯކަލް ކައުންސިލްތަކުގެ މާލީ ބާރުވެރިކަން ވަރަށް ބޮޑަށް ހަނިވާ ގޮތަށް ލާމަރުކަޒީ ގާނޫނު އިސްލާހު ކުރަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ފުވައްމުލަކު ދެކުނު ދާއިރާގެ މެމްބަރު އިބްރާހިމް ހުސައިން އެވެ.
ބިލު ހުށަހެޅި ސަބަބެއްގެ ގޮތުގައި ބަޔާންކޮށްފައި ވަނީ، ލާމަރުކަޒީ ގާނޫނުގެ ދަށުން ކައުންސިލްތަކުން އުފައްދާ ލޯކަލް އޮތޯރިޓީ ކުންފުނިތަކުން ވިޔަފާރީގެ ހަރަކާތްތައް ހިންގުމުގެ ދާއިރާގެ ގާނޫނު ކަނޑައެޅުމާއި، ހިލޭ އެހީގެ ގޮތުގައި ދައުލަތުން ކައުންސިލްތަކަށް ފައިސާ ދިނުމުގައި އަމަލުކުރަން ޖެހޭ އުސޫލުތައް މުރާޖައާ ކުރުމަށް ކަމަށެވެ.
އޭގެ އިތުރުން، ކައުންސިލްތަކުގެ އުމުރުގެ ފަހު އަހަރުގެ ތެރޭގައި ކައުންސިލްތަކުގެ މުހިންމު މާލީ ކަންކަން ނިންމުމުގެ އަމަލުކުރަން ޖެހޭ އުސޫލު ބަޔާން ކުރުން ވެސް ގާނޫނު އިސްލާހު ކުރާ ސަބަބުތަކުގެ ތެރޭގައި ބަޔާންކޮށްފައިވެ އެވެ.
ބިލުގައިވާ ގޮތުގައި، ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ކައުންސިލްތަކުގެ އުމުރު ހަމަވުމާ ދެމެދު އޮތީ އެއް އަހަރު ނުވަތަ އެއަށްވުރެ ކުރު މުއްދަތެއް ނަމަ ފިނޭންސް މިނިސްޓްރީ އާއި އެލްޖީއޭ އިން ކަނޑައަޅާ އުސޫލުތަކާ އެއްގޮތަށް ނޫނީ ބައެއް ކަންކަން ކުރަން ކައުންސިލުން ނިންމައިގެން ނުވާނެ ކަމަށެވެ.
އޭގެ ތެރޭގައި، ކައުންސިލް އިދާރާއަށް ދާއިމީ މުވައްޒަފުން ނުވަތަ ކޮންޓްރެކްޓް މުވައްޒަފުން ނެގުމާއި، ކައުންސިލްގެ އިހުތިސާސްގެ ތެރޭގައި ހިމެނޭ ބިމާއި ފަޅާއި ފަރުގެ ސަރަހައްދުތައް ކުއްޔަށް ދޫކުރުން ހިމެނެ އެވެ.
ގާނޫނުގެ ދަށުން މިނިވަންކަމާއެކު ކައުންސިލުތަކަށް ވިޔަފާރި ކުރެވޭ ގޮތަށް ކުރިން ގާނޫނު ވަނީ އިސްލާހު ކޮށްފަ އެވެ. ނަމަވެސް މި ބިލުގައިވާ ގޮތުން، ރަށެއްގައި އަމިއްލަ ފަރާތަކުން ކުރާ ވިޔަފާރިއެއް ކައުންސިލަށް ނުކުރެވޭނެކަމަށް ބަޔާންކޮށްފައިވެ އެވެ. އަދި، ކައުންސިލްތަކަށް ކުރެވޭނީ ހަމައެކަނި ރަށުގެ ތަރައްގީއަށްޓަކައި ކޮންމެހެން ކުރަންޖެހޭ ވިޔަފާރި ކަމަށް ވެސް ބިލުގައި ބަޔާންކޮށްފައިވެ އެވެ.
އޭގެ އިތުރުން، ކައުންސިލުން ފަށާ މަސައްކަތުގެ އިންވެސްޓްމަންޓް ނުވަތަ ރައުސުލްމާލު 10 މިލިއަން ރުފިޔާއަށްވުރެ ބޮޑުވެގެން ނުވާނެ ކަމަށް ވެސް ބިލުގައިވެ އެވެ.
މި ބިލުގައި ހުރި ކަންކަމަށް އެމްޑީޕީން ވަނީ ވަރަށް ބޮޑަށް ކަންބޮޑުވުން ފާޅުކޮށްފަ އެވެ. އެޕާޓީން ބުނެފައި ވަނީ އެއީ ރައްޔިތުންގެ އަތުގައި އޮތް ބާރުވެރިކަން ފޭރިގަނެ، ރަށްރަށުގެ ހުރިހާ ކަމެއް ނިންމުމުގެ ބާރު ސަރުކާރަށް ނެގުމަށް ހުށަހަޅާފައިވާ ބިލެއް ކަމަށެވެ.
މި ބިލުގެ ފުރަތަމަ ކިޔުން އިއްވުމަށް މާދަމާ އޮންނަ މަޖިލީސް ޖަލްސާއަށް ވަނީ އެޖެންޑާ ކޮށްފަ އެވެ.
ކޮމެންޓް
Republic of Maldives