އެފްއަައިޔޫއަށް އާ ވެރިއެއް | މަގާމަށް ސާޖިދު

މާލީ ފްރޯޑްތައް ބަލަން މަރުކަޒީ ބޭންކް (އެމްއެމްއޭ) ގައި އޮންނަ ފައިނޭންޝަން އިންޓެލިޖެންޓް ޔުނިޓް (އެފްއައިޔޫ) ގެ ވެރިއަކަށް ހުންނެވި، އަބްދު الله އަޝްރަފު އެ މަގާމުން ވަކިކޮށް، އެ ޔުނިޓުގެ ވެރިޔާގެ މަގާމަށް އިސްމައިލް ސާޖިދު އައްޔަން ކޮށްފި އެވެ. 

އެމްއެމްއޭ އިން ބުނީ އެ އޮތޯރިޓީ ހިންގުން ހަރުދަނާކުރުމަށް ގެންނަމުންދާ ސްޓަރަކްޗަރަލް ބަދަލުތަކުގެ ތެރެއިން ފައިނޭންޝިއަލް އިންޓެލިޖެންސް ޔުނިޓުގެ ހެޑްގެ މަޤާމަށް އިސްމައިލް ސާޖިދުވަނީ އައްޔަނުކޮށްފައިވާ ކަމަށެވެ. ސާޖިދު އެ މަގާމަށް ހަވާލު ކުރުމުގެ އިތުރުން އެ މަޤާމުގައި ކުރިން ހުރި އަޝްރަފު ރިސްކް އެންޑް ކޮމްޕަޔަލަންސަށް ބަދަލުކޮށްފައިވާ ކަމަށެވެ. 

އަޝްރަފް މަގާމުން ވަކިކުރިއިރު، ސިފައިންގެ ވެލްފެއާ ކޯޕަރޭޓިވް (ސިވެކް) މެދުވެރިކޮށް ބާރަށު ދާއިރާގެ މެންބަރު އިބްރާހިމް ޝުޖާއަށް ގިނަ އަދަދެއްގެ ފައިސާ ޖަމާކުރި ގޮތުގެ ބައެއް މައުލޫމާތު ހިމެނޭ ރިޕޯޓެއް ވަނީ ސޯޝަލް މީޑިއާގައި ލީކުވެފަ އެވެ. މި ރިޕޯޓާ ގުޅޭ ގޮތުން ޝުޖާއު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އެ ރިޕޯޓަކީ ސައްހަ އެއްޗެއް ކަމެއް ނުވަތަ ނޫން ކަމެއް އެނގިވަޑައިނުގަންނަވަނީ، އެއްވެސް ރަސްމީ އިދާރާއަކުން އެކަމުގެ މައުލޫމާތެއް ރަސްމީކޮށް ލިބިފައި ނުވާތީ އެވެ.

ސޯޝަލް މީޑިޔާގައި އާންމުވެފައިވާ ރިޕޯޓުން ފެންނަ ގޮތުގައި ނޮވެމްބަރު 1، 2023 އިން ޖެނުއަރީ 2024 އަށް ޝުޖާއު އާއި އާއިލާގެ ހިއްސާ އޮންނަ ކުންފުނިތަކަށް ސަރުކާރުގެ އެކި އިދާރާތަކުން 42.5 މިލިއަން ރުފިޔާ އެކި އިވެންޓުތަކާ ގުޅުވައިގެން ދީފައި ވެ އެވެ.

ފުލުހުން މިއަދު ވަނީ ޝުޖާއަށް ތުހުމަތު ކުރެވޭ އެ މައްސަލަ ތަހުގީގު ކުރަމުން އަންނަ ކަމަށް ވެސް ބުނެފަ އެވެ.