ކުނި ބަރުކޮށްގެން ތިލަފުއްޓަށް ދަތުރު ކުރި ދޯންޏެއް ފަރަށް އަރައިފި

ހއ. އަތޮޅުގައި އޮންނަ މަނަފަރު ރިސޯޓުން ކުނި ބަރުކޮށްގެން ކ. ތިލަފުށްޓަށް ދަތުރުކުރަމުން ދިޔަ ދޯންޏެއް ފަރަށް އަރައިފި އެވެ.

"ގުރުވަ 1" ނަމަކަށްކިޔާ ދޯނި ފަރަށް އެރުމުން އެމްއެންޑީއެފުން ވަނީ އެހީތެރިކަން ފޯރުކޮށްދީފަ އެވެ. އެގޮތުން އެ ދޯނީގައި ތިބި ފަޅުވެރިން ވަނީ ސަލާމަތް ކޮށްފަ އެވެ.

އެމްއެންޑީއެފުން ބުނީ ދިވެއްސަކާއި ދެ ބިދޭސީންނާ އެކު ދަތުރުކުރަމުންދިޔަ މި ދޯނި، ނ. ކުޑަރަށް ކައިރިން ފަރަށް އެރި ކަމުގެ މައުލޫމާތު ލިބުނީ ރޭ 23:24 ހާއިރު ކަމަށެވެ.

"މި ހާދިސާގެ މައުލޫމާތު ލިބުމުން އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަންގެ ހާބަރުކްރާފްޓް ވަނީ އެ ސަރަހައްދަށް ދަތުރުކޮށް، ދޯނިން ދަތުރުކުރި ތިން ފަޅުވެރިން ހާބަރުކްރާފްޓަށް ނަގާފައި،" އެމްއެންޑީއެފުން ބުންޏެވެ.

އެ ދޯނީގައި ތިބި ތިން މީހުން މިއަދު ހެނދުނު 8:45 ހާއިރު ނ. ހޮޅުދޫއަށް ގެންގޮސްދީފައިވާ އިރު، އެ އެންމެންގެ ވެސް ހާލު ރަނގަޅެވެ.