އަދި އަންނަ ސެޕްޓެމްބަރު މަހުގެ އެއް ވަނަ ދުވަހުން ފެށިގެން، ހިދުމަތްތައް ދެވޭނީ ކަނޑައެޅިފައިވާ ޓެރިފްތަކާއި އުސޫލުތަކާ އެއްގޮތަށް ކަމަށް ވެސް އެމްޕީއެލުން ބުންޏެވެ.
މާލޭގެ ނޯތު ހާބާރުގެ ބާކީ ސަރަހައްދު ބެލެހެއްޓުމާ ގުޅޭ ހުރިހާ ކަމެއް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ދަށަށް ގެނެސް، އިތުރު 22 އުޅަނދަށް ޖާގަ ކަނޑައަޅައި، ހިދުމަތް ދޭން ފަށައިފި އެވެ.
މިހާތަނަށް ވެސް އެމްޕީއެލް ބަނދަރުން ފެށިގެން ނޯތު ހާބަރާ ހަމައަށް އެ ސަރަހައްދު ބަލަހައްޓަމުން އައީ އެމްޕީއެލް އިންނެވެ. ނަމަވެސް، މަސްމާރުކޭޓް ސަރަހައްދާއި އެ ސަރަހައްދުގެ ކުރިމަތީގައި އޮންނަ ލޯކަލް މާރުކޭޓުގެ ހުރަސްތޮށްޓާ ހަމައަށް، މާލެ ސިޓީ ކައުންސިލްގެ އިހުތިސާސްގެ ދަށުން ނަގައި، ޓްރާންސްޕޯޓް މިނިސްޓްރީން އެމްޕީއެލްއާ ހަވާލުކޮށްފައިވަނީ މިދިޔަ މަހުގެ ތެރޭގަ އެވެ.
އެ ސަރަހައްދުން ހިދުމަތް ހޯދަން ބޭނުންވާ އުޅަނދުތައް ރަޖިސްޓްރީން ކުރަން މިދިޔަ މަހު ހުޅުވާލާފައިވާއިރު، އެމްޕީއެލުން ބުނީ އިއްޔެއިން ފެށިގެން، އެ ސަރަހައްދުން ހިދުމަތް ލިބޭނީ އެ ކުންފުނީގައި ރަޖިސްޓްރީ ކޮށްފައިވާ އުޅަނދުތަކަށް އެކަނި ކަމަށެވެ.
އަދި އަންނަ ސެޕްޓެމްބަރު މަހުގެ އެއް ވަނަ ދުވަހުން ފެށިގެން، ހިދުމަތްތައް ދެވޭނީ ކަނޑައެޅިފައިވާ ޓެރިފްތަކާއި އުސޫލުތަކާ އެއްގޮތަށް ކަމަށް ވެސް އެމްޕީއެލުން ބުންޏެވެ.
ނޯތު ހާބަރަކީ ކޮންމެ ދުވަހަކު އެތައް ބައިވަރު މުދާ އުފުލާ އެއްގަމު އުޅަނދުތައް ވެސް ވަދެ ނުކުމެވާ ތަނެކެވެ. އަދި ރަށްރަށަށާއި ރިސޯޓުތަކަށް މުދާ އުފުލާ ވަރަށް ގިނަ އޮޑިދޯނިފަހަރު ވެސް އެ ތަނުގައި ބަނދަރުކުރެ އެވެ.