ރާއްޖެއަށް ލިބުނުހާ ފަސޭހައަކާއި ކުރިއެރުމެއް ލިބުނީ އެމްޑީޕީގެ މަސައްކަތުން: މާރިޔާ

ރާއްޖެއަށް މިހާތަނަށް ފަސޭހައެއް ލިބިފައި އޮތްނަމަ އެ ފަސޭހައަކީ އެމްޑީޕީގެ 20 އަހަރުގެ ދިގު ތާރީހުގައި ކުރި ބުރަ މަސައްކަތުގެ ނަތީޖާ ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.

އެމްޑީޕީއަށް 20 އަހަރު ފުރުމުގެ މުނާސަބަތުގައި އެޕާޓީން ވަނީ "ރަން ރީނދޫ" ގެ ނަމުގައި އިއްޔެ ހަވީރު ބޮޑު ދުވުމެއް ބާއްވާފަ އެވެ. މި ދުވުން ފެއްޓުމުގެ ކުރިން ޕާޓީގެ މެންބަރުންނާ މުހާތަބުކޮށް ވާހަކަ ދައްކަވަމުން މާރިޔާ ވިދާޅުވީ އެ ޕާޓީއަކީ ރާއްޖޭގައި އޮތް އެންމެ ބޮޑު، ދޮށީ އަދި އެންމެ ހަރަކާތްތެރި ޕާޓީ ކަމަށެވެ.

"ރާއްޖެއަށް ލިބިފައި އޮތްނަމަ އޮތްހާ ފަސޭހައާ، ކުރިއެރުމާއި، ހައްގުތައް ކަށަވަރުވެގެން ދިޔައީ މި ހޭދަވީ ދިގު މުއްދަތުގައި ތިޔަ ރައްޔިތުންގެ ބޮޑު ހިއްސާއާއެކު އަހަރުމެން އެންމެން މި ކުޅަ މަސައްކަތުން،" މާރިޔާ ވިދާޅުވި އެވެ.

މާރިޔާ ވަނީ އެމްޑީޕީގެ ދެ ވެރިކަމުގައި ރާއްޖެއަށް ގެނެސްފައިވާ ބައެއް ބަދަލުތަކުގެ ވާހަކަ ކުރުގޮތަކަށް ފާހަގަކުރައްވާފަ އެވެ. އޭގެ ތެރޭގައި އާސަންދަ މެދުވެރިކޮށް ހިލޭ ބޭސްފަރުވާ ކުރުމުގެ ނިޒާމާއި، އުމުރުން ދުވަސްވީ މީހުންނާއި ހާއްސަ އެހީއަށް ބޭނުންވާ މީހުންނަށް އިނާޔަތް ދޭން ފެށުމާއި، ސްކޫލު ދަރިވަރުންނަށް ހިލޭ ފޮތް ލިސްޓު ދޫކުރުން ފަދަ ކަންކަން ފާހަގަކުރެއްވި އެވެ.

"ބަސްބުނެ އުޅެވޭނެ ޖާގައާ، ޒަމީރުގެ މިނިވަންކަމާ، އިޖުތިމާއީ ރައްކާތެރިކަމާ، ހިލޭ ބޭސްފަރުވާ ކުރެވުމާ، އުމުރުން ދުވަސްވީ މީހުންނާ ހާއްސަ އެހީއަށް ބޭނުންވާ މީހުންގެ އިނާޔަތާ، ދަތުރުފަތުރުގެ ނިޒާމަކުން ގުޅާލެވުމާ، ޅަދަރީންނަށް ހިލޭ ފޮތް ފަންސޫރު ދިނުމުން ފެށިގެން ހިލޭ ޑިގްރީއާ ހަމައަށް ތައުލީމު ފޯރުވައިދެވެން ފެށުނީވެސް ތިޔަ ބޭފުޅުންނާއެކު އެމްޑީޕީން މިކުރި މަސައްކަތުން،" މާރިޔާ ވިދާޅުވި އެވެ.

މާރިޔާ ވިދާޅުވީ ކުރިއަށް އޮތް ދުވަސްތަކުގައި ވެސް އެދެނީ ޕާޓީ އިތުރަށް ހަރުދަނާވެ، ވަރަގަދަ ކުރުމުގެ މަސައްކަތުގައި މެންބަރުން ގަދަކޮށް ބައިވެރިވެ، އިހަށްވުރެ ވެސް ބާރަށް ކުރިއަށް ދިއުން ކަމަށެވެ.

"ޕާޓީއަށް 20 އަހަރު ފުރޭ މި ހާއްސަ ވަގުތުގައި އަހަރަމެން އަހުދުވަނީ ރިޔަ އެންމެހޭ ރައްޔިތުންގެ އުންމީދުތައް ހަގީގަތަށް ހެދުމަށާއި، ތިޔަ ރައްޔިތުންގެ ހައްގުތައް ރައްކާކުރުމަށާއި، އަދި މިރަށާ މުޅި ރާއްޖެއަށް އުފާފާގަތިކަމާ، ތަރައްގީ ގެނައުމުގެ މަސައްކަތުގައި މުޅި ޕާޓީ އަބަދުމެ ދެމިތިބޭނެކަން،" މާރިޔާގެ ވާހަކަ ނިންމަވައިލައްވަމުން ވިދާޅުވި އެވެ.

އެމްޑީޕީން ބޭއްވި ދުވުމުގައި ކުރީގެ ރައީސް އިބްރާހިމް މުހައްމަދު ސޯލިހާއި، ނައިބް ރައީސް ފައިސަލް ނަސީމްގެ އިތުރުން ލީޑާޝިޕްގެ އެހެން ބޭފުޅުންނާއި އެޕާޓީގެ ރައްޔިތުންގެ މަޖިލިސް މެންބަރުން ވެސް ބައިވެރިވެވަޑައިގަތެވެ.