މުސާރައިގެ ހަރަދު މަތިވިޔަސް ސަރުކާރުގެ ޖުމްލަ ހަރަދު ދަށަށް

ދައުލަތުގެ ބަޖެޓުން މުސާރަދޭން ކުރި ހަރަދު މަތިވިޔަސް ސަރުކާރުގެ ޖުމްލަ ހަރަދުތައް ދަށްވެފައިވާ ކަމަށް ދައްކައިފި އެވެ، 

ފިނޭންސް މިނިސްޓްރީން މިދިޔަ މަހުގެ 17 ވަނަ ދުވަހުގެ ނިޔަލަށް ނެރުނު ވީކްލީ ފިސްކަލް ހިސާބުތައް ދައްކާ ގޮތުން އެ މުއްދަތުގެ ނިޔަލަށް މުސާރަ އަށް 7.1 ބިލިއަން ރުފިޔާ ވަނީ ހަރަދުވެފަ އެވެ. ނަމަވެސް މިދިޔަ އަހަރުގެ މި މުއްދަތާ ހަމައަށް މުސާރައިގެ ހަރަދު ހުރީ 6.7 ބިލިއަން ރުފިޔާ އެވެ. ނަމަވެސް ރިކަރަންޓް ހަރަދު އިތުރުވެފައެއް ނުވެ އެވެ. 

މުސާރައިގެ ހަރަދު މަތިވިނަމަވެސް ރިކަރަންޓް ހޭދަ ވަނީ ދަށަށް ގޮސްފަ އެވެ. މިދިޔަ އަހަރު ރިކަރަންޓް ހަރަދު ހުރީ 17.8 ބިލިއަން ރުފިޔާގަ އެވެ. ނަމަވެސް މި އަހަރު ރިރަންޓް ހަރަދު ހުރީ 17.1 ބިލިއަން ރުފިޔާގަ އެވެ. 

ވީކްލީ ފިސްކަލް ރިޕޯޓް ދައްކާ ގޮތުން މި އަހަރުގެ މިހާތަނަށް ސަރުކާރުގެ ޖުމްލަ ހަރަދު ހުރީ 24,2 ބިލިއަން ރުފިޔާގަ އެވެ. އަދި މިދިޔަ އަހަރުގެ ހަރަދު ހުރީ 26,3 ބިލިއަން ރުފިޔާގަ އެވެ. 

މި އަހަރަށް ފާސްކުރީ 56.6 ބިލިއަން ރުފިޔާގެ ބަޖެޓެކެވެ. މި ބަޖެޓުގައި ހިލޭ އެހީއާއި އާމްދަނީގެ ގޮތުގައި 39.7 ބިލިއަން ރުފިޔާ ލިބޭނެކަމަށް އަންދާޒާކޮށްފައިވެ އެވެ. އެއީ ހިލޭ އެހީގެ ގޮތުގައި ލިބޭނެކަމަށް އަންދާޒާކުރާ 2.5 ބިލިއަން ރުފިޔާއާއި، އާމްދަނީގެ ގޮތުގައި ލިބޭނެކަމަށް އަންދާޒާކުރާ 37.2 ބިލިއަން ރުފިޔާ އެވެ. ޖުމްލަ އާމްދަނީީއާއި ހިލޭ އެހީގެ ގޮތުގައި 39.7 ބިލިއަން ރުފިޔާ ލިބޭނެކަމަށް އަންދާޒާކުރާއިރު ދައުލަތުގެ ހަރަދުތަކަށް ހިނގާނެކަމަށް ލަފާކުރަނީ 49.2 ބިލިއަން ރުފިޔާ އެވެ.

އެއިން 35.8 ބިލިއަން ރުފިޔާއަކީ ރިކަރަންޓު ހަރަދުތަކެވެ. އަދި ކެޕިޓަލް ހަރަދުގެ ގޮތުގައި 13.4 ބިލިއަން ރުފިޔާ ހަރަދުވާނެކަމަށް ލަފާކޮށްފައިވެ އެވެ. އެއިން 12.4 ބިލިއަން ރުފިޔާއަކީ ޕީއެސްއައިޕީ މަޝްރޫއުތަކަށް ހިނގާނެކަމަށް ބެލެވޭ ހަރަދެވެ. މި ޑެފިސިޓަކީ 9.4 ބިލިއަން ރުފިޔާ އެވެ. އަދި ދަރަނި އަދާކުރުމުގެ ހަރަދުތައް ނުހިމަނައި އާމްދަނީއާއި ހަރަދުގެ ފަރަގު ނުވަތަ ޕްރައިމަރީ ޑެފިސިޓުގެ ގޮތުގައި ލަފާކޮށްފައިވަނީ 3.9 ބިލިއަން ރުފިޔާ އެވެ.