ރާއްޖެއަށް އަންނަ ލަންކާ މީހުންނަށް 90 ދުވަހުގެ އޮން އެރައިވަލް ވިސާ ދޭން ފަށައިފި

ރާއްޖެއަށް އަންނަ ސްރީ ލަންކާ ރައްޔިތުންނަށް 90 ދުވަހުގެ އޮން އެރައިވަލް ވިސާ ދޭން ފަށައިފި އެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ، މިއީ ލަންކާގެ ރައީސް އަނޫރާ ކުމާރަ ޑިސަނަޔަކެ ރާއްޖެއަށް ކުރެއްވި ފުރަމާނަ ދަތުރުގައި ރައީސް ޑރ. މުހައްމަދު މުއިއްޒުއާ އެކު ކުރެއްވި މަޝްވަރާތަކަށް ފަހު ނިންމި ނިންމުމެއް ކަމަށެވެ.

އަދި މިއީ ލަންކާއަށް ދާ ދިވެހިންނަށް 90 ދުވަހުގެ އޮން އެރައިވަލް ވިސާ ދޭތީ، އެއް ހަމަ އުސޫލަކުން އަމަލުކުރުމަށް، ރާއްޖެއަށް އަންނަ ލަންކާ ރައްޔިތުންނަށް ވެސް ހަމަ އެ މުއްދަތާ ހަމައަށް އޮން އެރައިވަލް ވިސާ ދިނުމަށް ނިންމި ނިންމުމެއް ކަމަށް ބުނެފައި ވެ އެވެ.

މިގޮތުން، އިއްޔެ އިން ފެށިގެން ރާއްޖެއަށް އަންނަ ލަންކާ ރައްޔިތުންނަށް 90 ދުވަހާ ހަމައަށް އޮން އެރައިވަލް ވިސާ ލިބޭނެ އެވެ.

ލަންކާގައި ދިވެހިންގެ ބޮޑު އާބާދީއެއް ދިރިއުޅެމުން އައި ނަމަވެސް، ފަހަކަށް އައިސް އެ އަދަދު ވަނީ ވަރަށް ބޮޑަށް މަދުވެފަ އެވެ.

އެކަމުގެ ކަންބޮޑުވުން، ލަންކާގެ ސަރުކާރުގެ ތެރޭގައި ވެސް ބޮޑުކަމުގެ މައުލޫމާތު ލިބިފައި ވެ އެވެ.

އެއާ އެކު، ލަންކާގެ ރައީސް ރާއްޖެއަށް ކުރެއްވި ދަތުރުފުޅާ ދިމާކޮށް، ލަންކާގައި ވަޒީފާ އަދާކުރާ ނުވަތަ މަތީ ތައުލީމް ހާސިލްކުރާ ދިވެހިންގެ އަނބިން ނުވަތަ ފިރިންނަށް ވެސް އެއް އަހަރުގެ ވިސާ ދޭން ވަނީ ނިންމައިފަ އެވެ. 

މީގެ އިތުރުން ލަންކާގައި ބޭސްފަރުވާ ކުރާ ދިވެހިންނަށް އެއް އަހަރު ދުވަހާ ހަމައަށް ވިސާ ދޭން ނިންމާފައިވާ ކަން އެ ގައުމުން ވަނީ ހާމަކޮށްފަ އެވެ.

ނަމަވެސް، މި ނިންމުންތަކަށް އަމަލުކުރާނެ ސީދާ ތާރީހެއް އަދި ރަސްމީކޮށް ހާމަކޮށްފައެއް ނުވެ އެވެ.