ދެވަނަ ކުއާޓަރުގައި އެސްޓީއޯ ހިއްސާގެ އެންމެ މަތިން ވިކިފައިވަނީ 2,080ރ. އަށެވެ. މިއީ މި އަހަރުގެ ފުރަތަމަ ކުއާޓަރުގައި ހިއްސާ ވިއްކުނު 1,980ރ. އަށް ބެލިނަމަވެސް ،މަތިވުމެކެވެ.
މި އަހަރުގެ ދެވަނަ ކުއާޓަރުގައި ސަރުކާރުގެ މައި ކުންފުނި، އެސްޓީއޯގެ ހިއްސާގެ އަގު ރެކޯޑް މިންވަރަކަށް މަތިވެއްޖެ އެވެ.
ރާއްޖެއަށް ބޭހާއި ތެޔޮ އެތެރެކުރާ އެސްޓީއޯގެ ހިއްސާގެ އަގު މަތިވެގެން ގޮސްފައިވާއިރު މިދިޔަ ދެވަނަ ކުއާޓަރުގައި އެ ކުންފުނީގެ ހިއްސާގެ އެންމެ މަތިން ވިކިފައިވަނީ 2,080ރ. އަށެވެ. މިއީ މި އަހަރުގެ ފުރަތަމަ ކުއާޓަރުގައި ހިއްސާގެ އަގު 1,980ރ. ގައި ހުރުމަށްފަހު އުފުލުނު ފުރަތަމަ ފަހަރެވެ.
ކުންފުންޏެއްގެ ހިއްސާގެ އަގު މަތިވުމުގެ މައިގަނޑު ސަބަބަކީ އެ ކުންފުންޏަކާމެދު ހިއްސާދާރުންގެ މެދުގައި އޮތް ޔަގީންކަން އިތުރުވުމެވެ.
އެސްޓީއޯ ހިއްސާއަށް ބަލާއިރު އެންމެ ދަށުން ހިއްސާއެއް ވިކިފައިވަނީ 1,742ރ. އަށެވެ. މިއީ މިދިޔަ އަހަރާ ބަލާއިރު ބޮޑުތަނުން އިތުރުވުމެކެވެ. އަދި މިދިޔަ ކުއާޓަރުގައި އެސްޓީއޯގެ 118 ހިއްސާއެއް ބާޒާރުގައި ވިއްކުމުގެ މުއާމަލާތް ހިންގި އެވެ. ނަމަވެސް ފުރަތަމަ ކުއާޓަރުގައި މި އަދަދު ހުރީ 81 ގަ އެވެ.
އެސްޓީއޯއަށް މިދިޔަ ދެވަނަ ކުއާޓަރުގަައި ޖުމްލަ އާމްދަނީގެ ގޮތުގައި ވަނީ 3.6 ބިލިއަން ރުފިޔާ އެވެ، މިއީ މީގެ ކުރީ ކުއާޓާރއާއި އަޅާ ބަލާއިރު %12 ގެ ދަށްވުމެކެވެ.
ޖުމްލަ އާމްދަނީ ދަށްވި ސަބަބު - ޖުމްލަ އާމްދަނީ ދަށްވުމުގެ މައިގަނޑު ސަބަބަކީ ތެލުގެ އަގުތަކަށް ގެނެވުނު ބަދަލާއި އަދި މިކުއާޓަރގައި ތެލުގެ ޑިމާންޑް ދަށްވުމާއިއެކުގައެވެ. ޖުމްލަ އާމްދަނީ ދަށްވުމާއިއެކު ޖުމްލަ ފައިދާގެ ގޮތުގައި ލިބިފައިވަނީ 574 މިލިއަން ރުފިޔާއެވެ. މިއީ އޭގެ ކުރީ ކުއާޓަރއާއި އަޅާ ބަލައި ދެ އިންސައްތައިގެ ދަށްވުމެކެވެ. އެހެންނަމަވެސް ކުންފުނީގެ އެހެނިހެން ވިޔަފާރި ތަކުން ލިބުނު ޖުމްލަ އާމްދަނީ ވަނީ އިތުރުވެފައެވެ.
ކުންފުނީގެ ޖުމްލަ ފައިދާ ދަށްވުމާއި ނިސްބަތުން ހިންގުމުގެ ހަރަދު އިތުރުވުމާއިއެކު ހިންގުމުގެ ފައިދާގެ ގޮތުގައި ލިބިފައިވަނީ 236 މިލިއަން ރުފިޔާއެވެ. މިއީ، އޭގެ ކުރީ ކުއާޓާރއާއި އަޅާ ބަލައި 11 އިންސައްތައިގެ ދަށްވުމެކެވެ. ހިންގުމުގެ ފައިދާ ދަށްވިކަމުގައިވީ ނަމަވެސް ދެވަނަ ކުއާޓާރގައި އިންވެސްޓްމަންޓް އިންކަމް އިތުރުވުމާއިއެކު ނެޓް ފައިނޭންސް ކުޑަކުރެވި ޓެކްސްއަށް ކެނޑުމުގެ ކުރިން މިކުއާޓަރގެ ސާފު ފައިދާގެ ގޮތުގައި ވަނީ 198 މިލިއަން ރުފިޔާ ލިބިފައެވެ. ޓެކުހަށް ކެނޑުމަށްފަހު، މި ކުއާޓަރގެ ސާފުފައިދާގެ ގޮތުގައި ވަނީ 163 މިލިއަން ރުފިޔާ ލިބިފައެވެ. މިއީ، އޭގެ ކުރީ ކުއާޓާރއާއި އަޅާ ބަލައި ތިން އިންސައްތައިގެ ދަށްވުމެކެވެ. އަދި މިދިޔަ އަހަރުގެ ދެވަނަ ކުއާޓަރއާއި އަޅާ ބަލާއި އިރު ސާފު ފައިދާ 15 މިލިއަންއިން އިތުރުވެ، 10 އިންސައްތައިގެ ކުރިއެރުމެއް ވަނީ ލިބިފައެވެ.