ރަޝިއާ ކައިރިއަށް އައި ބާރުގަދަ ބިން ހެލުމާއެކު ސުނާމީ އަރަނީ

ރަޝިޔާގެ އިރުމަތިން ކަނޑުގެ އަޑިއަށް 8.7 އަށް މެގްނިޓިއުޑްގެ ބާރުގަދަ ބިން ހެލުމަކާއެކު ސުނާމީގެ އިންޒާރު ނެރެފި އެވެ. 

އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނެފައިވާ ގޮތުގައި މި ބިންހެލުން އައިސްފައިވަނީ ރަޝިއާގެ އެންމެ އިރުމަތީގައި އޮންނަ ޕެޓްރޯޕަވްލޮވްސްކް-ކަމްޗަޓްސްކީގެ އިރުން 136 ކިލޯމީޓަރު ދުރަށެވެ. އަދި ބިން ހެލުން އައި ކަމަށް ވަނީ  ގާތްގަނޑަކަށް 85 މޭލު (136 ކިލޯމީޓަރު) ދުރުން 12 މޭލު (19 ކިލޯމީޓަރު) އަޑިއަށެވެ.

ރަޝިއާގެ މި ސަރަހައްދަކީ ޖަޕާނާއިވެސް ކައިރި ސަރަހައްދަކަށްވުމުން ޖަޕާނުގެ މޫސުމާ ބެހޭ އިދާރާއިން ވަނީ ސުނާމީގެ އިންޒާރު ނެރެފަ އެވެ. އެގޮތުން ތިން މީޓަރުގެ އުސް ރާޅުތައް އެރުން ގާތް ކަމަށް ބުނެފައިވެ އެވެ. އަދި މިހާރު ސުނާމީގެ އަސަރުކޮށްފައިވާ ކަމަށްވެ އެވެ. އަދި ސޯޝަލް މީޑިއާގައި ވަނީ ރަޝިއާގެ ބައެއް ސަރަހައްދުތަކަށް ސުނާމީ އަރާ ވީޑިއޯތަކެއްވެސް އާއްމުވެފަ އެވެ. 

ބާރުގަދަ މި ބިންހެލުމާއެކު ޕެސިފިކް ސުނާމީ ވޯނިން ސެންޓަރުން ވަނީ އެމެރިކާގެ ހަވާއީ ސްޓޭޓާއި އަލަސްކާއަށް ސުނާމީގެ އަސަރު ކުރާނެ ކަމަށް ބުނެފަ އެވެ.