އެޗްޑީސީއާއެކު، ހާއްސަ އެހީއަށް ބޭނުންވާ މީހުން އަހުލުވެރިކުރުމުގެ ޕްރޮގުރާމެއް ހިންގައިފި

އެޗްޑީސީއާއި ނެޝަނަލް މެންޓަލް ހެލްތު ޑިޕާޓްމަންޓާ ގުޅިގެން، ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒު (އެޗްޕީއެސްއެން) ގައި ދިރިއުޅޭ ފަރާތްތައް މުޖްތަމައުއަށް އަހުލުވެރިކޮށް، ރީއިންޓަގްރޭޓް ކުރުމުގެ ޕްރޮގްރާމެއް ކުރިއަށްގެންގޮސްފި އެވެ.

އެޗްޑީސީން ބުނީ މިއީ، އެޗްޕީއެސްއެންގައި ދިރިއުޅޭ މީހުން އަނބުރާ މުޖުތަމައުއަށް ދޫކޮށްލުމުގެ ކުރިން، އެމީހުން މުޖުތަމައުއަށް އަހުލުވެރި ކުރުމަށް ސަރުކާރުން ކުރަމުން އަންނަ މަސައްކަތަށް، އެ ކޯޕަރޭޝަންގެ ފަރާތުން އެއްބާރުލުން ދިނުމުގެ ގޮތުން ކުރިއަށްގެންދިޔަ ހަރަކާތެއް ކަމަށެވެ.

އެގޮތުން، ހާއްސަ އެހީއަށް ބޭނުންވާ މަރުކަޒުގައި ދިރިއުޅޭ 17 މީހުން ހުޅުމާލެއަށް ގެނެސް، އެމީހުންނަށް ހުޅުމާލެ ދައްކާލައި، ބެލެނިވެރިކަމުގެ ދަށުން އާންމު ދިރިއުޅުމުގައި ބައިވެރިވެ އެކަން ތަޖުރިބާކޮށްލުމުގެ ފުރުސަތު އެޗްޑީސީން އިއްޔެ ވަނީ ފަހިކޮށްދީފަ އެވެ.

ގުރައިދޫ މަރުކަޒުގައި ތިބި ފަރާތްތައް ހުޅުމާލެ ގެނެސް، މުޅި ހުޅުމާލެ ދައްކާލުމަށް ޓުއާއެއް ވަނީ ކުރިއަށްގެންގޮސްފަ އެވެ. އަދި އާއިލީ މާހައުލެއްގައި ކެއުމުގެ އިންތިޒާމުތައް ކުރިއަށް ގެންދިޔުމުގެ ގޮތުން ހުޅުމާލޭގައި ދިރިއުޅޭ ބައެއް އާއިލާތަކާއެކު ދުވަހުގެ މެންދުރު ކެއުން ވަނީ ކުރިއަށްގެންގޮސްފައިވެ އެވެ.

އޭގެ އިތުރުން، އާންމުންނާ އެކުގައި، ޖަމާއަތުގައި ނަމާދު ކުރުމުގެ ފުރުސަތުވެސް އެމީހުންނަށް ވަނީ މި ދަތުރުގެ ތެރެއިން ފަހިކޮށްދީފަ އެވެ. މުޅި ދުވަސް އެއްކޮށް ނިންމާލީ ހަވީރުގެ ސަޔާއެކު، ސެންޓްރަލް ޕާކުގައި އެމީހުންނަށް ހާއްސަކުރި ހަރަކާތްތަކާ އެކުގަ އެވެ.

އެޗްޑީސީން ބުނީ މިނިވަން ދުވަހަށް ހާއްސަކޮށް ތައްޔާރުކުރި ފުޅަނދުތައް ބަލާލުންވެސް މި ޕްރޮގްރާމުގެ ތެރެއިން ކުރިއަށް ގެންގޮސްފައިވާ ކަމަށެވެ.

މި ދަތުރު ނިންމާލިއިރު އެޗްޑީސީގެ މުވައްޒަފުންގެ ފަރާތުން ވަނީ މިވަގުތު މަރުކަޒުގައި ތިބި މީހުންނަށް ޒަރޫރީ ބައެއް ސާމާނު ހަދިޔާކޮށްފަ އެވެ.

ހާއްސަ އެހީއަށް ބޭނުންވާ މަރުކަޒުގައި ދިރިއުޅޭ މީހުން އިއްޔެ ހުޅުމާލެއަށް ކުރި ޒިޔާރާތުގެ ކުރިން، ހެލްތް މިނިސްޓްރީގެ މެންޓަލް ހެލްތް ޑިޕާޓްމެންޓްގެ ބޭފުޅުންނާއެކު އެޗްޑީސީގެ ސްޓާފުން އަދި މެނޭޖްމަންޓުން ވަނީ މިދިޔަ ހަފްތާގައި ގުރައިދޫ މަރުކަޒުގެ ހާލަތު ބަލާފަ އެވެ.