ފޭދޫފިނޮޅުގައި 127 ވިލާގެ ރިސޯޓެއް ހުޅުވައިފި

ޗައިނާގެ އަސްކަރީ ބޭހެއް ހަދަމުންދާ ކަމަށް އަޑުފެތުރި ފޭދޫފިނޮޅުގައި ތައިލެންޑުގެ ދުސިތު ކުންފުނިން 127 ވިލާގެ ރިސޯޓެއް ތަރައްގީކޮށް ހުޅުވައިފި އެވެ. 

ތައިލެންޑުގެ އެންމެ ބޮޑު އެއް ޓޫރިޒަމް ކުންފުނި ކަމަށްވާ ދުސިތު އިންޓަނޭޝަނަލް އިން ތަރައްގީކުރި މި ރިސޯޓް ބްރޭންޑްކޮށްފައިވަނީ ވެސް އެ ބުރޭންޑުގެ ރިސޯޓެކެވެ. މި ރިސޯޓް ހުޅުއްވައި ދެއްވީ މި ރިސޯޓުގެ ކޮންޓްރެކްޓަރާއި ތައިލެންޑުގެ ދުސިތުތާނީ ކުންފުނިން އިސްވެރިންނެވެ. 

މިއީ ވެލާނާ އިންޓަރނޭޝަނަލް އެއާޕޯޓް (ވީއައިއޭ) އިން ފުރައިގެން ސްޕީޑް ބޯޓުގައި ހަތް މިނެޓުގެ ދެވޭ ރާސްތާގައި ތަރައްގީކުރި މި ރިސޯޓު ބްރޭންޑްކޮށްފައިވަނީ ރާއްޖޭގައި ހުޅުވި އެންމެ ފުރަތަމަ ދޫސިތު "ޑީ2" ބްރޭންޑުގެ ގޮތުގަ އެވެ. މި ތަނުގައި ބީޗް ފްރޮންޓް ވިލާތަކާއި އޯވަ ވޯޓާ ވިލާތައް ހުރެ އެވެ. އަދި ތަފާތު ކެއުންތަކަށް ހާއްސަ ފަސް ރެސްޓޯރެންޓާއި ސްޕާގެ ހިދުމަތާއި މޫދު ކުޅިވަރުގެ ހިދުމަތްވެސް ހުރެ އެވެ. 

ފުލުހުން ތަމްރީންތައް ދިނުމާއި ސްކައުޓް ކުދިން ދަތުރުދާން ކުރިން ބޭނުންކުރި ފޭދޫ ފިނޮޅުގައި މި ރަށް ކުއްޔަށް ނެގީ ޕާލެ އެޓޯލް ކުންފުނިންނެވެ. ޓޫރިޒަމް ތަރައްގީ ކުރަން 50 އަހަރުގެ މުއްދަތަށް ކުއްޔަށް ނަގާފައިވަނީ ހަތަރު މިލިއަން ޑޮލަރަށެވެ. މިރަށް ތަރައްގީ ކުރީ ޗައިނާގެ ކޮންޓްރެކްޓަރެވެ.  ފޭދޫ ފިނޮޅުގައި ރިސޯޓެއް ތަރައްގީކުރަން ދޫކުރި 2016 ވަނަ އަހަރު އެވެ. ރަށުގެ ވާހަކަ އެ ދުވަސްވަރުގެ އެމްޑީޕީ އަޑީގައި އޮވެގެން ބޭރުގެ މީޑިއާގެ ސަމާލުކަމަށް ގެނެސްފައިވެ އެވެ. އަދި އިންޑިއާގެ މީޑިއާ އާއި އެ ގައުމުގެ ސަރުކާރުގެ އޮފިޝަލުން ވަނީ މާލެ ކައިރީގައި ޗައިނާއިން އަސްކަރީ ބޭހެއް ތަރައްގީ ކުރާ ކަމަށް ބުނެ ވާހަކަ ފަތުރާފަ އެވެ. 

ފޭދޫ ފިނޮޅު ކުއްޔަށް ދޫކުރުމުން އެ ދުވަސްވަރު ތަފާތު ވާހަކަަ ތަކެއް އޭރު ފެތުރި އެވެ. މިގޮތުން ރަށުން ފުލުހުންނަށް އެއްވެސް އާމްދަނީއެއް ނުލިބޭނެ ކަމަށް އޭރު ވާހަކަ ދެކެވުނެވެ. ނަމަވެސް އޭރުގެ ޓޫރިޒަމް މިނިސްޓަރު އަދި މިހާރުގެ ފިނޭންސް މިނިސްޓަރު މޫސާ ޒަމީރު ވިދާޅުވެފައިވާ ގޮތުގައި އެ ރަށް ދޫކުރުމުން ފުލުހުންގެ ވެލްފެއާ ކުންފުންޏަށް 50 އަހަރުގެ ތެރޭގައި 80 މިލިއަނެއްހާ ޑޮލަރު ލިބޭނެ އެވެ.