ލަންކާގައި އިންވެސްޓްކުރަން ދިވެހި ވިޔަފާރިތަކަށް ލަންކާގެ ރައީސްގެ ދައުވަތެއް

އެކި ދާއިރާތަކުން ސްރީ ލަންކާގައި އިންވެސްޓުކުރުމަށް، ދިވެހި ވިޔަފާރިތަކަށް ލަންކާގެ ރައީސް އަނުރާ ކުމާރަ ޑިސަނަޔަކެ ދައުވަތު ދެއްވައިފި އެވެ. 

ރައީސް ޑރ. މުހައްމަދު މުއިއްޒުގެ ދައުވަތަކަށް، ޑިސަނަޔަކެ ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގައި، ގުޅިގެން އިއްޔެ ދެއްވި ބަޔާނުގައި، ޑިސަނަޔަކެ ވިދާޅުވީ އިންވެސްޓަރުންނަށް ފަހި މިހާރަށް ވުރެ ފަހި މާހައުލެއް ގާއިމުކޮށްދިނުމަށް، ސިންގަލް ވިންޑޯ ނިޒާމެއްގެ މަސައްކަތް ކުރެވެމުންދާ ކަމަށެވެ. 

މިގޮތުން، ލަންކާގައި ގާއިމުކޮށްފައިވާ އެންމެ ޒަމާނީ ޓެކްނޮލޮޖީ ޕާކުތަކުގައި ދިވެހި ވިޔަފާރިތަކަށް ހުރި ފުރުސަތުތަކާބެހޭ ގޮތުން ރައީސް މުއިއްޒުއާ އެކު މަޝްވަރާ ކުރެއްވި ކަމަށް ޑިސަނަޔަކެ ވިދާޅުވި އެވެ.

"ހާއްސަކޮށް އައިޓީ/އޭއައި، ފިޝަރީޒް އެންޑް އެގްރޯ ޕްރޮސެސިން، ޓޫރިޒަމް، ރިއަލް އެސްޓޭޓް އަދި އުމްރާނީ ތަރައްގީގެ ދާއިރާއަށް އިންވެސްޓް ކުރުމަށް ދިވެހި ވިޔަފާރިވެރިންނަށް ދައުވަތު ދިނީމެވެ،" އޭނާ ވިދާޅުވި އެވެ.

މީގެއިތުރުން، ޓޫރިޒަމަކީ ދެ ގައުމުގެ އިގުތިސާދުގައި މުހިންމު ދައުރެއް އަދާކުރާ ސިނާއަތަކަށްވާއިރު، އެކަމުގައި ދެ ގައުމުގެ ގުޅިގެން ކުރެވިދާނެ މަސައްކަތްތަކާބެހޭ ގޮތުން ވެސް ރައީސް މުއިއްޒާ އެކު މަޝްވަރާކުރެވުނު ކަމަށް ޑިސަނަޔަކެ ވިދާޅުވި އެވެ. 

ޑިސަނަޔަކެ ކުރައްވަމުން ގެންދަވާ ތިން ދުވަހުގެ ދަތުރުފުޅުގައި، ރާއްޖޭގައި ހުންނަ ލަންކާ ހައިކޮމިޝަނުން އިންތިޒާމްކޮށްގެން ދިވެހި ވިޔަފާރިތަކަށް ބާއްވާ ބިޒްނަސް ފޯރަމެއްގައި ޑިސަނަޔަކެ ބައިވެރިވެވަޑައިގެންނެވުމަށް ވަނީ ހަމަޖެހިފަ އެވެ.

އެ ފޯރަމްގައި ލަންކާގައި ހުރި އިންވެސްޓުމަންޓު ފުރުސަތުތަކާބެހޭ މައުލޫމާތު ދިވެހި ވިޔަފާރިވެރިންނާ ހިއްސާކުރުމަށް ހަމަޖެހިފައިވާ ކަމަށް މައުލޫމާތު ލިބިފައި ވެ އެވެ. 

މި ވަގުތު ލަންކާގައި އިންވެސްޓްކޮށްގެން ތިބީ ދިވެހި މަދު ވިޔަފާރިތަކެވެ. މިގޮތުން އެއް ބްރޭންޑަކީ ސަން ސިޔާމް އެވެ. މި ބްރޭންޑުގެ ރިސޯޓެއް ލަންކާގައި ހިންގަމުންދެ އެވެ. ނަމަވެސް ލަންކާގެ ގިނަ ވިޔަފާރިތަކެއް ރާއްޖޭގައި ހަރަކާތްތެރިވެ އެވެ. މިގޮތުން ބައެއް ވިޔަފާރިތަކުގެ ސަބަބުން ދިވެހިންނަށް ހުރަސްތަކާވެސް ކުރިމަތިވެފައިވެ އެވެ.