ދުބާއީގެ ހަވާ ރެކޯޑް ރާއްޖޭން އަތުލުން | ރަނގަޅު ވަގުތު ހޯދި މުހިންމު ކާމިޔާބީއެއް

ސިފައިންނާއި މޯލްޑިވްސް އެއާޕޯޓް ކޮމްޕެނީ (އެމްއޭސީއެލް) އާއްމުކުރީ ހަވާ އަރުވާ ތަންތަން ފާހަގަވާނެ ޗާޓެކެވެ. އެ ޗާޓުގައި ފެންނަނީ ގްރޭޓާމާލެ ސަރަހައްދުގެ އެކި ދިމަދިމާލުގައި ހަވާ އަރުވާ ލޮކޭޝަންތައް ފާހަގަކޮށްފައިވެ އެވެ. ޖުމްލަ 19 ތަނަކުން ހަވާ އަރުވަ އެވެ. އޭރު ހިތަށް އެރި އެވެ. ޓާމިނަލެއް ހުޅުވަން މިވަރު އަރުވާލާކަށް ނުޖެހެ އެވެ. މިއީ ބޮޑު ވަރެވެ. އެކަމަކު ފަހުން އެނގުނީ މިކަމަކީ ހަމައެކަނި ޖައްވުގެ ތެރެއަށް ގޮވައިގެން ދުމަށްވާން ދޫކޮށްލާ ހަވާ އަކަށްވުރެ ބޮޑު މަގުސަދެއްގައި ރޭވިފައިވާ ޕްލޭނެއް ކަމެވެ. މިކަމުގެ މައިގަނޑު މަގުސަދަކީ އެއްދުނީގައި ދެ ފުޅި ޖަހާލުމެވެ. މަގުސަދަކީ ރާއްޖޭގެ މައި ދޮރޯށި ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލް ހުޅުވު ވާހަކަ ދުނިޔޭގެ އެންމެންނަށް އެނގޭނެ ގޮތް ހެދުމެވެ. މިއީ ގިނިސް ވޯލްޑް ރެކޯޑް ނުވަތަ ދުނިޔޭގެ ރެކޯޑް ފޮތަށް އަރުވަން ބާއްވާ ވަރުގަދަ ހަރަކާތެވެ. ފަހުން އެނގުނީ އެއާޕޯޓުން ބުނި "ސަޕްރައިޒް" އަކީ ވެސް މި އެވެ. އެކަމަކު މިކަން ކުރަން އެންމެފަހު ވަގުތާ ހަމައަށް ވެސް އެމްއޭސީއެލް ކުންފުނީގެ ވެރިން ތިއްބެވީ ނޭވާ ހިފަހައްޓާލައިގެންނެވެ. އާއްމުން ހަވާ ބަލަން އުފަލުގައި ތިއްބަސް އެމްއޭސީއެލްގައި މިކަން އިންތިޒާމު ކުރި ޓީމުން ތިބީ ގޮންޖެހުން ބޮޑު މި މަސައްކަތުގައި ހުރި ހުރަސްތައް ގިރާ ކުރުމުގެ ބުރަ މަަސައްކަތުގަ އެވެ. އެކަމަކު މިކަން ކާމިޔާބު ވެގެން ދިއުން ވަނީ ދިވެހިންނަށް ލިބުނު ބޮޑު ފަހުރަކަށެވެ. ޓޫރިޒަމާއި ރާއްޖޭގެ އެއާޕޯޓް ދުނިޔޭގައި ޕްރޮމޯޓް ކުރަން ލިބުނު އަގު ބޮޑު އިސްތިހާރަކަށެވެ.

ގައުމީ ބޮޑު މި ހަރަކާތް ކުރިއަށް ދިޔަ ގޮތުގެ މައުލޫމާތު އެނގޭ ފަރާތެއް ކިޔައިދިން ގޮތުގައި "ގިނިސް ވޯލްޑް ރެކޯޑް ޓައިޓަލް ފޯ ދަ މޯސްޓް ވެނިއުސް ޕާފޯމިން ސައިމަޓޭނިއަސް، ކޮރިއޯގްރާފްޑް ފަޔަވޯކްސް ޑިސްޕްލޭ" ނުވަތަ އެންމެ ގިނަ ސަރަހައްދުގައި އެއްފަހަރާ ސިންކްރޮނައިޒްޑް ހަވާ އެރުމުގެ ރެކޯޑު ރާއްޖޭން ހޯދި ނަމަވެސް، މިކަމުގައި ގިނަ މަސައްކަތް ތަކެއް ކުރަން ޖެހުނެވެ. މިކަމުގެ ފެންނަ ހަވާގެ ފުރަގަހުގައި އެންމެ ބުރަ މަސައްކަތެއް ކޮށްފައިވަނީ ދިވެހި އަސްކަރިއްޔާ އާއި އެމްއޭސީއެލްގެ މުވައްޒަފުންނެވެ. މިގޮތުން އެއް ފަހަރާ 19 ލޮކޭޝަނެއްގައި ހަވާ އަރުވަން ނިންމި ސަބަބަކީ ވެސް މި ރެކޯޑް ދުބާއީގައި އޮތުމެވެ. ދުބާއީއަކީ ހަވާގެ ރަސްގެފާނެވެ. މިއީ އެމީހުން ކޮންމެ ދުވަހަކު ކުރާ ކަމެކެވެ. އަދި މާދަމާވެސް މި ރެކޯޑް މުގުރާލުންވެސް އެއީ އެމީހުންނަށް ފެންފޮދެއް ބޮއެލުންފަދަ ކަމެކެވެ. އެކަމަކު މިހާރު މި ރެކޯޑް މިއޮތީ ދުބާއީގެ އަތުން ދިވެހިން އަތުލާފަ އެވެ. ދުބާއީގައި މި ރެކޯޑް ހަދާފައިވަނީ އެއް ސަރަހައްދެއްގައި ހަވާ އަރުވައިގެންނެވެ. އެހެންވެ އެމްއޭސީއެލް އިން ފުރަތަމަ ވެސް ބެލީ ގިނިސް ބުކް އޮފް ވޯލްޑް ރެކޯޑުގައި އަހައިގެން އެކި ސަރަހައްދުތަކުގައި ހަވާ އަރުވައިގެން މި ރެކޯޑް މުގުރާލަން ފުރުސަތެއް އޮތްތޯ އެވެ. އެކަން ޔަގީން ކުރާށެވެ. 

މި ހުއްދަ ގިނިސް ބުކްގެ ޓީމުން ލިބުނުނަމަވެސް، ރާއްޖެއަށް އޮތް އަނެއް ގޮންޖެހުމަކަށްވީ މިކަން ކުރަން ހަރަކާތްތެރިވާނެ މީހުން ހޯދުމެވެ. ހަވާ އެރުވުމުގައި ރާއްޖޭގައި ހަމައެކަނި ހަރަކާތްތެރިވަނީ ދިވެހި ސިފައިންނެވެ. އެހެންވެ 19 ލޮކޭޝަންގައި ހަވާ އަރުވަން ހުރި ގޮންޖެހުންތައް ރާއްޖެއަށް ބޮޑެވެ. މި ރެކޯޑް ލިބެން އޮތީ ސިންކްރޮނައިޒްކޮށް ހަވާ އަރުވައިގެންނެވެ. ނަމަވެސް މިކަން ސިފައިން ފުރިހަމަކޮށްފައިވަނީ ގައުމީކަމެއްގެ ގޮތުގައި ބަލައި ފުރިހަމަކޮށެވެ. މި ހަރަކާތުގައި ގާތްގަނޑަކަށް ޖުމްލަ 40 މީހުން ހަރަކާތްތެރިވި އެވެ.

ގިނިސް ވޯލްޑް ރެކޯޑްސް އިން ރާއްޖެއަށް ވަޑައިގެން ހުންނެވި އިސް ބޭފުޅެއް ކަމަށްވާ އެމްބާލީ އިންކޯސީ ވިދާޅުވި ގޮތުގައި ރާއްޖެއަށް މި ރެކޯޑް ލިބެން އޮތީ އެންމެ މަދުވެގެން ފަސް ދިމާލަކުން އެއް ވަގުތެއްގައި ވަކި ހަމަތަކެއްގެ މަތިން ހަވާ އަރުވައިގެންނެވެ. ނަމަވެސް ރާއްޖޭން ވަނީ ނުވަ ދިމާލަކުން ސިންކްރޮނައިޒްކޮށް ހަވާ އަރުވާފަ އެވެ. މާނަކީ 19 ދިމާލަކުން މަަސައްކަތް ކުރިނަމަވެސް ގިނިސްބުކް ޓީމުން ގަބޫލުކުރާ ގޮތަށް ހަވާ އަރުވާފައިވަނީ ނުވަ ދިމާލަކުންނެވެ. ސުވާލަކީ އެކަން ގިނިސް ބުކް ޓީމުން ޔަގީން ކުރީ ކިހިނެއް ހެއްޔެވެ؟

މިކަން ޔަގީން ކުރަން ހަރުދަނާ ގައިޑްލައިން ތަކެއް އެވެރިން ގެންގުޅެވެ. މިއީ ދުނިޔޭގައި މަޝްހޫރު ހުރިހާ ރެކޯޑް ފޮތްތައް ބަލަހައްޓާ 1955 އިން ފެށިގެން ހަރަކާތްތެރިވާ ދުނިޔޭގެ އެންމެ ބޮޑު ޖަމާއަތެވެ. މިއީ ދުނިޔޭގެ އެންމެ ހައިޕްރޮފައިލް ވެރިން އިން ފެށިގެން ވަކިވަކި ގައުމުތަކާއި ވަކިވަކި ފަރުދުން ހަދާ ރެކޯޑްތައް އަރުޝީފްކޮށް ދުނިޔެ އަށް ހާމަކުރާ އެންމެ ވަރުގަދަ ޖަމާއަތެވެ. 

މި ގައިޑްލައިންތައް ފުރިހަމަ ކުރަން ހަވާ އަރުވާ ކޮންމެ ލޮކޭޝަނެއްގައި 32 ހެކިވެރިން ގިނިސްބުކް ޓީމުން ބެއިތިއްބެވި އެވެ. އަދި އޭގެ ތެރެއިން 16 މީހުންނަކީ ޓްރެއިން ދިވެހި ސިފައިންނެވެ. އަދި މި ލޮކޭޝަންތަކުގެ މަންޒަރުތައް ވަގުތުން ފެންނާނެހެން އެ ތަންތަނުގައި ހުރީ ކެމެރާ އަަޅާފަ އެވެ.މިހުރިހާކަމެއްވެސް ކުރީ ގިނިސް ޓީމުގެ ގައިޑްލައިންތައް ތަންފީޒު ކުރުމަށެވެ. މިކަން ނުކޮށް މި ރެކޯޑް ފުރިހަމަ އެއް ނުކުރެވޭނެ އެވެ. 

މިހުރިހާ ކަމަމާއެކު ހަވާގެ، މި ރެކޯޑް ރާއްޖެ އަށް ލިބުނުއިރު މިއީ ރާއްޖެ ފަދަ ޓޫރިޒަމް މަންޒިލަކަށް މުހިންމު ރެކޯޑެވެ. ސަބަބަކީ ވީއައިއޭއަކީ ރާއްޖޭގެ މޫނު މައްޗެއް ވެފައި ޓާމިނަލް ހުޅުވި ދުވަހު މިކަން ކުރުމަކީ ދުނިޔޭގެ ސަމާލުކަން ލިބޭނެ ކަމަށްވުމެވެ. ޓޫރިޒަމް ސިނާއަތުގައި މަސައްކަތް ކުރައްވާ ބައެއް ފަރާތްތަކުން ވެސް ގަބޫލު ކުރައްވަނީ އެގޮތަށެވެ.

ރާއްޖޭން މިއީ މިފަދަ ރެކޯޑުތައް ހޯދި ފުރަތަމަ ފަހަރެއް ނޫނެވެ. ގައުމީ ފެންވަރުގައި ބޮޑެތި ހަރަކާތްތައް ހިންގައިގެން ވެސް ދުނިޔޭގެ ރެކޯޑް ފޮތުގައި ރާއްޖެ ހިމަނާފައިވެ އެވެ. އެންމެފަހުން މިފަދަ ހަރަކާތެއް ގިނަ ބަޔަކު ބައިވެރިވެގެން ބޭއްވީ 1، އޮކްޓޫބަރު 2019 ވަނަ ދުވަހު އެވެ. ދުނިޔޭގެ ޓޫރިޒަމް ދުވަހާ ދިމާކޮށް އެންމެ ގިނަ މީހުން އެއް ވަގުތެއްގައި ފީނައިގެން ހަދާ ދުނިޔޭގެ ރެކޯޑް ނުވަތަ "ފްރީޑައިވް ވޯލްޑް" ރެކޯޑުގެ ނަން ދީފައިވާ މި ރެކޯޑް ރާއްޖޭން ހެދި އެވެ. މިއީ ކުރިން އިޓަލީގައި އޮތް ރެކޯޑެވެ. އެ ދުވަހު އޭރުގެ ރައިީސް އިބްރާހިމް މުހައްމަދު ސޯލިހު ވެސް ބަނޑޮސް ފަޅުތެރެ އަށް ފީނި އެވެ. ރެކޯޑް ހެދި އެ ދުވަހު ވެސް މިހާރު ބައެއް މީހުން ދައްކާ ތާކުންތާކު ނުޖެހޭ ވާހަކަ ދެއްކި އެވެ. ސުވާލުވެސް އުފެއްދި އެވެ. އެކަމަކު ހަގީގަތަކީ މީގެ ކޮންމެ ރެކޯޑަކީ ގައުމަށް ލިބޭ ރީތި ނަމެކެވެ. އެތައް ބައެއްގެ ބުރަ މަސައްކަތެވެ. މިއީ ވެސް އެފަދަ ބުރަ އަދި ރާއްޖެ އަށް މުހިންމު ރެކޯޑެކެވެ.