ޓާމިނަމް ވިއު ރެސްޓޯރެންޓްތަކަށް ރޭއައީ އީދެއް

އިރު އޮއްސުނު ހިސާބުން ފެށިގެން ގިނަ ބަޔަކު އިންތިޒާރު ކުރަމުން ދިޔައީ އެ ވަގުތަށެވެ. ރާއްޖޭގެ 60 ވަނަ މިނިވަން ދުވަހާ ދިމާކޮށް ހުޅުވި އާ އިންޓަނޭޝަނަލް ޓާމިނަލް ހުޅުވުމުގެ ރަސްމިއްޔާތުގެ ހަރަކާތް ބެލުމަށެވެ. ފެންނާނެ ހަވާ އާއި "ސިއްރުވެފައި އޮތް" ސަޕްރައިޒް އަށެވެ. ނަތީޖާއަކަށްވީ ގިނަ ބަަޔަކު މާލޭގެ އުސް އިމާރާތްކުގެ ޓެރަހަށް އެރުމަށެވެ. އަނެއް ބަޔަކު ދިޔައީ މާލެ ވަށައިގެންވާ - ސްކައިލައިން - މަލަމަތީގައި ހުރި އުސް ރެސްޓޯރެންޓް ތަކަށެވެ. ނަތީޖާއަކަށްވީ ވިޔަފާރި ހީނަރު ދުވަސްތަަކަށްފަހު ރެއަކީ މި ތަންތަނަށް ބޮޑު އީދެއް އައުން ފަދަ ކަމަށްވުމެވެ. 

ޓާމިނަލް ހުޅުވުމުގެ ހަވާ ބަލަން ގިނަ ބަޔަކު އަންނާނެކަން އެނގުމާއެކު ރެސްޓޯރެންޓްތަކުން ދިޔައީ ބުކިން ހައްދަމުންނެވެ. މިގޮތުން ރޭގަނޑު 8:00 އިން ފެށިގެން ރޭގެ ހަވާއާއި ޑްރޯން ޝޯ ނިމުމާ ހަމައަށް ވެސް މި ތަންތަން އޮތީ ފުލްވެފަ އެވެ. ފުރިބާރުވެފަ އެވެ. ގޮނޑިއެއް ނުލިބެ އެވެ. 

ޓާމިނަލް އެންމެ ރީތިކޮށް ފެންނަ އެއް ރެސްޓޯރެންޓް ކަމަށްވާ އޮކްސިޖަން ރެސްޓޯރެންޓުން ވާހަކަ ދެއްކި އިސްވެރިއަކު ބުނި ގޮތުގައި ރެއަކީ މިފަހުން އެންމެ ބިޒީ އެއް ރެ އެ އެވެ.  "ވަރަށް ބާރުބޮޑުކޮށް ދިޔައީ ރޭގެ ހުރިހާ ވަގުތުތަކެއްގައި ވެސް،" އޮފިޝަލް ވިދާޅުވި އެވެ. 

އާ ޓާމިނަލް ހުޅުވުމުގެ ރަސްމިއްޔާތުގައި ކުލަގަދަ ޑްރޯން ޝޯއެއް ބޭއްވި އެވެ. މި ޑްރޯން ޝޯ ބޭއްވުމުގެ ކުރިން އެ ހަރަކާތުގެ ރިހާސަލް ބޭއްވި އެވެ. އެހެންވެ ޓާމިނަލް ރީތިކޮށް ފެންނަ ރެސްޓޯރެންޓްތަކުން ވަނީ ދުރާލާ އެ ވީޑިއޯތައް ރައްކާކޮށްފަ އެވެ. އަދި މި ހަފުލާއާ ދިމާކޮށް ސޯޝަލް މީޑިއާގައި މި ވީޑިއޯތައް ވައިރަލް ކުރުންވީ ވިޔަފާރީގެ ބޮޑު ފައިދާއެއް ލިބުނު ކަމަށެވެ. 

ވެލާނާގެ ކައިރީގައި ހުންނަ ސޮލައިޓް ރެސްޓޯރެންޓުން ވާހަކަ ދެއްކި އިސް ފަރާތެއް ބުނި ގޮތުގައި ޓާމިނަލް ހުޅުވުމުގެ ހަރަކާތްތަކަށް ދުރާލާ އެ ރެސްޓޯރެންޓުން ތައްޔާރުވި އެވެ. 

"މިތަނުގައި ބުފޭ އޮންނާނެ. އެހެންވެ އެ ބުފޭއަށް ގިނަ ބަޔަކު ބުކިން ހެދި. އެހެންވެ ވިޔަފާރި ވަރަށް ރަނގަޅު. މިފަހުން އެންމެ ރަނގަޅު އެއް ރެއަށްވީ ރޭ،" ނަން ނުޖެހުމަށް އެދި ބުންޏެވެ.

މާލޭގެ އެންމެ އުސް އެއް ރެސްޓޯރެންޓް ހިންގާ ސޯލްޓުންވެސް ވަނީ ރެއަށް ހާއްސަކޮށް ބުކިން ހައްދާފަ އެވެ. ނަތީޖާއަކަށްވީ މުޅި ރެސްޓޯރެންޓް ގާތްގަނޑަކަށް ފުލްވުމެވެ. "އަލަކާޓް މެނޫ ރޭ ގިނަ މީހުން ހިޔާރުކުރީ. އާއިލާތައް ގިނައީ. ކޮފީއަށް އައި މީހުންނަށްވުރެ ގިނައިން ދިޔައީ ކެއުންތަކަށް،" 

ޓާމިނަލް ހުޅުވުމުގެ ކަންކަން ރޭވި އެމްއޭސީއެލްއިން ވެސް ރޭވަނީ ބައެއް ރެސްޓޯރެންޓްތަކުގައި ހާއްސަ އިންތިޒާމުތައް ހަމަޖައްސާފަ އެވެ. ބައެއް ތަންތަނުގައި ހާއްސަ "ސެޓް މެނޫ" ތަކެއް އިންތިޒާމުކުރި އެވެ. އަދި ބައެއް ރެސްޓޯރެންޓްތަކުގައި ކެއުންތައް ހިލޭކޮށްލި އެވެ. ނަތީޖާއަކަށްވީ މިތަންތަން އިރު އޮއްސުމާއެކު ފުލްވުމެވެ. 

އާއިލާތައް އެއްކޮށް ރޭގެ އިރާކޮޅު ތިބީ ރެސްޓޯރެންޓްތަކުގަ އެވެ. މިއީ އާއިލީ ގުޅުން ބަދަހިވުމުގެ އިތުރުން ގައުމީ ވަންތަކަންވެސް ގެނެސްދިން ކަމަށްވި އެވެ. މީގެ ސަބަބަކީ އާ އިންޓަނޭޝަނަލް ޕެސެންޖަރު ޓާމިނަލް އެވެ.