މަޑުގިނީގައި 10 އަހަރު އޮތް އާ ޓާމިނަލްގެ 70 ޕަސެންޓު ނިންމީ މި ސަރުކާރުން

މި ސަރުކާރުން ވެލާނާ އިންޓަނޭޝަނަލް އެއާޕޯޓު (ވީއައިއޭ) ހިންގާ އެމްއޭސީއެލްއާ ހަވާލުވިއިރު، އާ ޓާމިނަލްގެ ނިމިފައި އޮތީ 30 ޕަސެންޓު ކަމަށާއި ބާކީ 70 ޕަސެންޓު މަސައްކަތް ނިންމީ މި ސަރުކާރުން ކަމަށް، އެމްއޭސީއެލްގެ އެމްޑީ އިބްރާހިމް ޝަރީފް މުހައްމަދު ވިދާޅުވެއްޖެ އެވެ.

ވެލާނާ އެއާޕޯޓުގެ އާ ޓާމިނަލް ހުޅުވަން މިރޭ ބޭއްވި ކުލަގަދަ ހަފްލާގައި ވާހަކަ ދައްކަވަމުން ޝަރީފް ވިދާޅުވި ގޮތުގައި، އޭނާ މަގާމާ ހަވާލުވެވަޑައިގެންނެވިއިރު، އާ ޓާމިނަލްގެ މުހިއްމު ގިނަ މަސައްކަތްތައް ހުރީ ނުނިމި ކަމަށެވެ. 

މިގޮތުން، ހެޑް އޮފް ސްޓޭންޑް ރޯޑު ނުވަތަ މަތިންދާބޯޓުތައް ޓާމިނަލާ ކައިރި ކުރަން ބޭނުންވާ މަގު ހެދުމާއި ކަރަންޓު ވިއުގަތަކާއި ފެނާއި ނަރުދަމާގެ އިތުރުން ކޮމާޝަލް ޖާގަތައް ހަމަޖެއްސުމުގެ މަސައްކަތް ވެސް އޮތީ ނުކޮށް ކަމަށް އޭނާ ވިދާޅުވި އެވެ. 

"ކަރަންޓު ދެވޭނެ ގޮތެއް ނެތް، ކަރަންޓުގެ ވިއުގާއެއް ވެސް ނެތް. ނިޒާމެއް ނެތް، ފެން ހިނގާނެ ގޮތެއް ނެތް. ތަނަކަށް ބޭނުންވާ 12 މެގަ ވޮޓްގެ ކަރަންޓްގެ ނިޒާމު ގާއިމް ކުރީ އެ ތަނުގެ ހީވާގި އަތްތަކުން،" އޭނާ ވިދާޅުވި އެވެ.

ރާއްޖޭގެ އިގުތިސާދަށް ކުރާނެ ފައިދާ ތަސައްވުރު ކުރައްވައި، އެންމެ ދޮޅު އަހަރުގެ ތެރޭގައި، ތާރީހަށް ވުރެ ކުރިން އާ ޓާމިނަލްގެ މަސައްކަތް ނިންމުނީ، ރައީސް ޑރ. މުހައްމަދު މުއިއްޒުގެ ހިކުމަތްތެރިކަމުން ކަމަށް ޝަރީފް ވިދާޅުވި އެވެ. 

ރައީސްގެ އިތުރުން، ކަނޑައެޅިފައިވާ ތާރީހަށް ވުރެ ކުރިން، އާ ޓާމިނަލްގެ މަސައްކަތް ނިންމުމުގައި، އެމްއޭސީއެލްގެ މުވައްޒަފުން ބުރަ މަސައްކަތް ފާހަގަކުރައްވައި، އޭނާ ވަނީ ޝުކުރު އަދާކުރައްވައިފަ އެވެ. 

ޝަރީފު ވިދާޅުވިގޮތުގައި، އާ ޓާމިނަލާ އެކު 7.5 މިލިއަން ފަސިންޖަރުންނަށް ހިދުމަތް ހޯދޭނެ މަންޒަރު އޭނާ އަށް މިހާރު ވެސް ސިފަ ކުރެއްވެ އެވެ. ކުރިއަށް އޮތްތަނުގައި ހުރިހާ އެއާލައިންތަކެއްގެ ހިދުމަތް އެ ޓާމިނަލުން ދެވޭނެ ކަމަށް ވިދާޅުވި އެވެ.

އާ ޓާމިނަލް މިރޭ ހުޅުވާފައި ވަނީ ޑްރޯން ޝޯ އަކާއި ހަ މިނެޓަށް މުޅި މާލެ ވަށައިގެން ހަވާއެރުވުމަށްފަހު އެވެ. ޓާމިނަލް ހުޅުއްވައިދެއްވީ ރައީސް ޑރ. މުހައްމަދު މުއިއްޒެވެ. ޓާމިނަލް ހުޅުއްވުމަށްފަހު ރައީސްގެ ދެކަނބަލުން ވަނީ ޓާމިނަލް ބައްލަވާލައްވާފަ އެވެ.

މި ޓާމިނަލް ނިންމަން ދައުލަތުން ގާތްގަނޑަކަށް 457 މިލިއަން ޑޮލަރު (ގާތްގަނޑަކަށް ހަތް ބިލިއަން ރުފިޔާ) ގެ ލޯނު ނަގާފައިވެ އެވެ. މި ޓާމިނަލް ނިންމަން އެންމެ ބޮޑު އެހީތެރިކަމެއް މާލީ ގޮތުން ދީފައިވަނީ ސައޫދީ އަރަބިއްޔާއަށް ނިސްބަތްވާ ސައޫދީ ފަންޑުންނެވެ. ސައޫދީ އަރަބިއްޔާގެ ބިންލާދިން ގްރޫޕާ ހަވާލުކޮށްގެން ތަރައްގީ ކުރާ މި ޓާމިނަލް ނިންމަން ސައޫދީ ފަންޑުން 217 މިލިއަން ޑޮލަރުގެ ލޯނު ދީފައިވެ އެވެ. އަދި ދެވަނައަށް އެންމެ ގިނައިން ލޯނު ދިން ކުވެއިތު ފަންޑުން 100 މިލިއަން ޑޮލަރުގެ ލޯނު ދީފައިވެ އެވެ. އަދި އަބޫދާބީ ފަންޑުން 90 މިލިއަން ޑޮލަރު އަދި ކުވެއިތު ފަންޑުން 100 މިލިއަން ޑޮލަރުގެ ލޯނު ދީފައިވެ އެވެ.