ޒަމާނީ ހިދުމަތަށް ފައްކާކުރި ޓާމިނަލް ހުޅުވައިފި

މުޅި މާލެ އެއްވެފައި އޮތީ މާލޭގެ މެރިން ޑްރައިވް އަށެވެ. ވަށައިގެންވާ މަގުތަކަށެވެ. އެންމެންގެ ފޯނުތަކުން ނަގަމުން އެދަނީ މި ތާރީހީ މަންޒަރުގެ ފޮޓޯތަކެވެ. އެންމެންގެ ނަޒަރު ހުއްޓިފައި އެތިބީ މިރޭ ހުޅުވި ވެލާނާ އިންޓަނޭޝަނަލް އެއާޕޯޓުގެ ޒަމާނީ އިންޓަނޭޝަނަލް ޓާމިނަލް އަށެވެ. 

ގާތްގަނޑަކަށް 3،000 މީހުންނަށް ދައުވަތު ދީގެން ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ބޭއްވި ކުލަގަދަ ރަސްމިއްޔާތުގައި ހުޅުވި އާ ޓާމިނަލްއަކީ މިހާރު ބޭނުން ކުރަމުން ގެންދާ ތިން މިލިއަން ފަސިންޖަރުންގެ ޓާމިނަލްއިން ހަތް މިލިއަން ފަސިންޖަރުންގެ ޓާމިނަލްއަކަށް ފޮރުޅިގެން ދިޔަ ފުރަތަމަ ފަހަރެވެ. 

އާ ޓާމިނަލް މިރޭ ހުޅުވާފައި ވަނީ ޑްރޯން ޝޯ އަކާއި ހަ މިނެޓަށް މުޅި މާލެ ވަށައިގެން ހަވާއެރުވުމަށްފަހު އެވެ. ޓާމިނަލް ހުޅުއްވައިދެއްވީ ރައީސް ޑރ. މުހައްމަދު މުއިއްޒެވެ. ޓާމިނަލް ހުޅުއްވުމަށްފަހު ރައީސްގެ ދެކަނބަލުން ވަނީ ޓާމިނަލް ބައްލަވާލައްވާފަ އެވެ.

މި ޓާމިނަލް ތަރައްގީ ކޮށްފައިވަނީ 72،000 އަކަފޫޓުގެ ބޮޑު ސަރަހައްދެއްގައި ދެ ބުރިއަށްވާ ގޮތަށެވެ. ފަސިންޖަރުންގެ ފަސޭހައަށް ގިނަ ހިދުމަތްތަކެއް ހިމަނައިގެންނެވެ. އާ ޓާމިނަލް ތަރައްގީކޮށްފައި އެވަނީ އެންމެ ޒަމާނީ ވަސީލަތްތަކާއެކުގަ ހިދުމަތް އަވަސްކޮށް ފުރިހަމަވާނެ ގޮތަށެވެ. މި ތަރައްގީއާއެކު މިހާރު ހިދުމަތްދޭން ނަގާ މުއްދަތާ ބަލާއިރު ވަގުތު އެތައް ތަނެއް އަވަސް ވެގެންދާނެ އެވެ. މި ވަގުތު އަވަސް ވުމަކީ އެއާޕޯޓް ހިންގާ އެމްއޭސީއެލް އަށް އެންމެ ޕީކް ދުވަސްތަކާއި ގަޑިތަކަށް ފްލައިޓް ސްލޮޓް ދޭން ލިބޭނެ ފުރުސަތެކެވެ. އިތުރު ސްލޮޓް ދެވިއްޖެނަމަ މިހާރު ޕީކް ދުވަސްތަކުގައި އަންނަ ޓޫރިސްޓުންގެ އަދަދު 10،000 އަށް މައްޗަށް ޖެއްސޭނެ އެވެ.

މި ޓާމިނަލް ނިންމަން ދައުލަތުން ގާތްގަނޑަކަށް 457 މިލިއަން ޑޮލަރު (ގާތްގަނޑަކަށް ހަތް ބިލިއަން ރުފިޔާ) ގެ ލޯނު ނަގާފައިވެ އެވެ. މި ޓާމިނަލް ނިންމަން އެންމެ ބޮޑު އެހީތެރިކަމެއް މާލީ ގޮތުން ދީފައިވަނީ ސައޫދީ އަރަބިއްޔާއަށް ނިސްބަތްވާ ސައޫދީ ފަންޑުންނެވެ. ސައޫދީ އަރަބިއްޔާގެ ބިންލާދިން ގްރޫޕާ ހަވާލުކޮށްގެން ތަރައްގީ ކުރާ މި ޓާމިނަލް ނިންމަން ސައޫދީ ފަންޑުން 217 މިލިއަން ޑޮލަރުގެ ލޯނު ދީފައިވެ އެވެ. އަދި ދެވަނައަށް އެންމެ ގިނައިން ލޯނު ދިން ކުވެއިތު ފަންޑުން 100 މިލިއަން ޑޮލަރުގެ ލޯނު ދީފައިވެ އެވެ. އަދި އަބޫދާބީ ފަންޑުން 90 މިލިއަން ޑޮލަރު އަދި ކުވެއިތު ފަންޑުން 100 މިލިއަން ޑޮލަރުގެ ލޯނު ދީފައިވެ އެވެ.

ތަޖުރިބާކާރުންގެ ނަޒަރުގައި މި ލޯނު ދައްކާ ހަލާސް ކުރަން އެންމެ ގިނަ ވެގެންވެސް ނަގާނީ 10 އަހަރާއި 15 އަހަރެވެ. އެކަމަކު މި ލޯނުތަކަކީ ދިގު މުއްދަތުގެ ލޯނުތަކަށްވުމުން ދައްކަން 20 އަހަރު ދީފައިހުރި ލޯނުތައް ގިނަ އެވެ.

ވީއައިއޭގައި ހިދުމަތް އަވަސްކުރަން ބެގޭޖު ސިސްޓަމެއް ބަހައްޓާފައިވެ އެވެ. މިއީ ގަޑިއިރެއް ތެރޭ 1200 ދާގީނާ އަދި މިނެޓެއް ތެރޭ 20 ދާގީނާ ސްކްރީން ކޮށްލެވޭނެ ނިޒާމެކެވެ. މިއީ ވީއައިއޭގެ ތޮއްޖެހުން ކުޑަ ވެގެންދާނެ ނިޒާމެކެވެ. އަދި އޭއޯބްރިޖުގެ ސަބަބުން ވެސް ހިދުމަތް އަވަސް ވެގެންދާނެ އެވެ. މިހާރު ފަސިންޖަރުން ބަހަށް އަރަައިގެން ބޯޓަށް ދާން އެންމެ މަދުވެގެން 30 މިނެޓު ނަގަ އެވެ. ނަމަވެސް އޭރޯބްރިޖާއެކު މި ވަގުތު އަށް މިނެޓަށް އަވަސް ވެގެންދާނެ އެވެ. އަވަހަށް ހިދުމަތް ދެވިއްޖެނަމަ އިތުރު ސްލޮޓް ދެވޭނެ އެވެ.