ރާއްޖެ މިނިވަންކަމުގެ ސޮއިކުރި މާލަމަށް 60 އަހަރުފަހުން ދިވެހިން

އިނގިރޭސިންގެ ހިމާޔަތުގެ ދަށުން ރާއްޖެ އަށް މިނިވަންކަން ދިނުމުގެ އެއްބަސްވުމުގައި ސޮއިކުރި ސްރީލަންކާގެ މާލަމުގެ މަންޒަރުތަކާއެކު ޕީއެސްއެމް ނިއުސް އިން މިއަދު ހާއްސަ ޑޮކިއުމެންޓެއް ދައްކާނެ އެވެ. 

ޕީއެސްއެމް ނިއުސްގެ ޑެޕިއުޓީ ނިއުސް ހެޑް އަހުމަދު ޖަދުއާން ވިދާޅުވީ ތާރީހީ މި ޑޮކިއުމެންޓް މިއަދު މެންދުރު 2:30 ގައި ޕީއެސްއެމް ނިއުސް އިން ދައްކާނެ އެވެ. މި ޑޮކިއުމެންޓް އުފެއްދުގައި އިސްކޮށް ހަރަކާތްތެރިވީ ޕީއެސްއެމްގެ ހެޑް އޮފް ނިއުސް ހުސެއިން އަމީން އެވެ.

"މިނިވަން ދިވެހިރާއްޖެ" ޑޮކިއުމެންޓް ވެގެންދާނީ ރާއްޖެއަށް މިނިވަންކަން ލިބުނުތާ 60 އަހަރުފަހުން މިނިވަންކަމުގެ އެއްބަސްވުމުގައި ސޮއިކުރި އިނގިރޭސި އެމްބަސީގެ މާލަމަށް ދިވެހިންގެ ބަޔަކު ވަތް ފުރަތަމަ ފަހަރެވެ. 

ޖަދުއާން ވިދާޅުވި ގޮތުގައި މި މާލަމަށް ވަތްއިރު އެންމެ ހައިރާންވި ކަމަކީ ސޮއިކުރި ފޮޓޯގައި އެތަން ހުރި ގޮތަށް އެއްވެސް ބަދަލެއް ނައިސް އެތަން އެގޮތުގައި ހުރުމެވެ. 

"އަޅުގަނޑުމެން ޕީއެސްއެމް ޓީމުން [ތާރީހީ އިލްމުވެރިޔާ އަހުމަދު އަލާ ދީދީ ] އާއެކު [މިނިވަންކަމުގެ އެއްބަސްވުމުގައި ސޮއިކުރި] މާލަމަށް ވަންނަން ހުއްދަ ލިބުނީވެސް ވަރަށް މަސައްކަތުން. މިއީ އިނގިރޭސި އެމްބަސީގައި އިންނަ މާލަމެއް. އެހެންވެ ފޮރިން މިނިސްޓްރީގެ ބޮޑު އެހީތެރިކަމާއެކު އެ ފުރުސަތު ލިބިގެން ދިޔައީ،" ޖަދުއާން ވިދާޅުވި އެވެ. 

އޭނާ ވިދާޅުވި ގޮތުގައި މި ޑޮކިއުމެންޓުން ފެނިގެންދާނެ އަނެއް ކަމަކީ ދިވެހިން އެ ދުވަސްވަރު މެރިޓައިމް ވިޔަފާރީގައި އުޅުނު ވަރުގަދަ ކަން ކަމަށާ އެކަން އެނގެނީ ލަންކާގެ ގޯލްގައި އެ ދުވަސްވަރު ދިރިއުޅުމުގެ މީހުންގެ އިންޓަވިއުތަކުނެވެ. މީގެ އިތުރުން ދިވެހިންނާ ގުޅުންހުރި ތާރީހީ ގިނަ މައުލޫމާތުތަކެއް މި ޑޮކިއުމެންޓުން ފެނިގެންދާނެކަން ޖަދުއާނ ފާހަގަ ކުރެއްވި އެވެ. 

"އޭރު 13 އަހަރުގެ [މިހާރު އުމުރުން ދުވަސްވީ] ލަންކާ ބައެއް މީހުންގެ އިންޓަވިއު ވެސް ހުންނާނެ. އެމީހުން ކިޔައިދިން ގޮތުގައި ދިވެހިންގެ އޮޑިފަހަރު ގޯލްގެ ބަނދަރަށް އައުމުން އެއީ އީދެއް އައުންފަދަކަމެއް. އެ މީހުން ކިޔައިދިން ދިވެހި ވިޔަފާރިވެރިންގެ ވަރުގަދަަކަން. ދިވެހިންގެ ދީލަތިކަން،" ޖަދުއާން ވިދާޅުވި އެވެ.