މިއީ ފަސޭހަކަމެއް ނޫން، އާ ޓާމިނަލްއާއެކު ނުޖެއްސޭ ކިތަންމެ ބޯޓެއް ޖައްސާނެ
އެމްއޭސީއެލްގެ ކުރީގެ ޗެއާމަން މުހައްމަދު އުމަރު މަނިކް ވިދާޅުވި ގޮތުގައި މި ޓާމިނަލް ނިންމަން ހުރިހާ ސަރުކާރުތަކުންވެސް ކޮންޓްރިބިއުޓް ކޮށްފައިވެ އެވެ.
ހިނގަ ހިނގާ އޮތް އެއާޕޯޓެއްގެ ތެރޭގައި "އިތުރު އެއާޕޯޓެއް" އެޅުމަކީ ފަސޭހަކަމެއް ނޫން ކަމަށާ، އާ އިންޓަނޭޝަނަލް ޓާމިނަލްއާކު މިހާރު ނުޖެއްސޭ ކިތަންމެ ބޯޓެއް ޖައްސާނެ ކަމަށް އެއާޕޯޓުގެ އެންމެ ދުވަސްވީ ޗެއާމަން، މުހައްމަދު އުމަރު މަނިކް ވިދާޅުވެއްޖެ އެވެ.
ރާއްޖޭގެ ޓޫރިޒަމްގެ ބާނީންގެ ތެރޭގައި ހިމެނިވަޑައިގަންނަވާ އަދި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ބޯޑުގެ ޗެއާމަންގެ މަގާމު ގިނަ ދުވަސްތަކެއް ވަންދެން ފުރުއްވި މުހައްމަދު އުމަރު މަނިކް، އާއްމު ނަމުންނަމަ އެމްޔޫމަނިކް ވިދާޅުވި އެއާޕޯޓް ތަރައްގީ ކުރަން ފައިސާ ހޯދަން ފުރަތަމަ މަސައްކަތް ކުރީ ޖަޕާނުން ކަމަށެވެ. އަދި ފަހުން ކޮރެއާއިންވެސް ފައިސާ ލިބޭ ތޯބެލި ކަމަށް އޭނާ ވިދާޅުވި އެވެ. އަދި ޖަޕާނުން ފައިސާ ނުދޭން ނިންމީ ރާއްޖެއަކީ އެންމެ ފަގީރު ގައުމުތަކުގެ ލިސްޓުން މެދުފަންތީގެ ގައުމަކަށް ހިޖުރަކޮށްފައިވުމުންކަމަށް އޭނާ ވިދާޅުވި އެވެ.
އަމިއްލަ ޓީވީ ޗެނަލެއް ކަމަށްވާ ރާއްޖެޓީވީއަށް ދެއްވި އިންޓަވިއުއެއްގައި ހިނގި ހިނގާ އޮތް އެއާޕޯޓެއްގެ ތެރޭގައި "އިތުރު އެއާޕޯޓެއް" އެޅުމަކީ ފަސޭހަކަމެއް ނޫން ކަމަށާ ޕެސެންޖަރު ޓާމިނަލްއާއެކު ބޮޑު ބަދަލެއް އަންނާނެ އެވެ.
"ބައްލަވާ ހަމައެކަނި ޓާމިނަލެއް ނޫން. ފިއުލް ސިސްޓަމާއި ކާގޯ ކޮމްޕެލްސް ސީޕްލޭން ޓާމިނަލް. ފަޔާ ޑިޕާޓްމަންޓް މުޅިން އަލަށް ހެދީ. އެޕްރަން [ބޯޓު ޕާކުރާ ތަންތަން] ހެދީ. މި ހުރިހާކަމެއް ކުރީމަ މި ފުރިހަމަވަނީ. ހިނގަ ހިންގާ އޮތް އެއާޕޯތެއްގެ ތެރޭގަ އާ އެއާޕޯޓެއް އެޅުން ވަރަށް އުނދަގޫކަމެއް،" އެމްޔޫ ވިދާޅުވި އެވެ.
އާ ޓާމިނަލްގައި ހިމެނޭ ބައިތައް
- 47 ޗެކިން ކައުންޓަރު
- ހަ ސެލްފް ސާވިސް ކައުންޓަރު
- 20 ޑިޕާޗާ އިމިގްރޭޝަން ކައުންޓަ
- އޭވިއޭޝަން ސެކިއުރިޓީގެ ޗެކްޕޯސްޓުތައް
- 28 އިމިގްރޭޝަން ކައުންޓަރު
- 12 ޕަސެންޖާ ބޯޑިން ގޭޓު (އެރައިވް 6، ޑިޕާޗާ 6)
- ހަ ބެގޭޒް ކްލެއިމް ބެލްޓު (އޯވަސައިޒް ލަގެޖް ބެލްޓާއެކު)
- ކަސްޓަމްސް ޗެކް ޕޯސްޓް
- ކެއިން ބުއިމުގެ ހާއްސަ ވަސީލަތްތައް
ރައީސް އިބްރާހިމް ނާސިރުގެ ވެރިކަމުގައިވެސް އެއާޕޯޓް ތަރައްގީގައި ބައިވެރިވެވަޑައިގެންނެވި އެމްޔޫ ވިދާޅުވީ ފުރަތަމަ އެއާޕޯޓް ހެދި ދުވަސްވަރު ކަންތައް ކުރީ ވަރަށް ފޯރިއާއި ޖޯޝުގައި ކަމަށާ މިއީ އެންމެންގެ މަސައްކަތެއް ކަމަށެވެ.
"ކޮންމެ ސަރުކާރަކުން ވެސް ބޮޑުކޮށް މަސައްކަތެއް ކުރެއްވި [މި އެއާޕޯޓް] ނިންމަން. އެންމެން ވެސް ކޮންޓްރިބިއުޓް ކުރި. އަބަދުވެސް އަޅުގަނޑު އިންވޯލްވެގެން އުޅުނިން. އަޅުގަނޑަށް އެނގޭ އެއާޕޯޓް ހެދީމަ ނުޖެއްސިގެން އޅޭ ހުރިހާ އެއާކްރާފްޓްތައް އާދެވޭނެ އޭރުން. ނުޖެއްސޭ ކިތަންމެ ބޯޓެއް ޖައްސާނެ،" އެމްޔޫ ވިދާޅުވި އެވެ.
އެމްޔޫ ވިދާޅުވި ގޮތުގައި އޭގެފަހުން މިހާރުގެ އެއާޕޯޓް ތަރައްގީ ކުރުމުގައި މިޑުލްއީސްޓް ކޮންސޯޓިމް، ސައޫދީ ފަންޑާއި ކުވެއިތު ފަންޑު އަދި އަބޫދާބީ ފަންޑުން ފައިސާ ދިން ކަމަށް އޭނާ ވިދާޅުވި އެވެ.
މި އިންޓަވިއުގައި އެމްޔޫ ވިދާޅުވި ގޮތުގައި އޭނާ ޗެއާމަންގެ މަގާމުން ރިޓަޔާކޮށް ވަޑައިގެންނެވިއިރު، އާ ޓާމިނަލް ހިމެނޭހެން އެއާޕޯޓުގެ 61 ޕަސެންޓް މަސައްކަތް ހުންނާނީ ނިމިފަ އެވެ.
"އޭރު އެ ބޭފުޅުން [ސައޫދީ ބިންލާދިން ގްރޫޕް] އިން ބުނެފައިވަނީ [2025] ޖުލައި މަހު ނިންމާ ތަޅުދަނޑި ދޭނެކަމަށް،" އެމްޔޫ ވިދާޅުވި އެވެ. އެމްޔޫ އެހެން ވިދާޅުވިނަމަވެސް ޓާމިނަލްގެ މަސައްކަތް ފައިސާ ނުލިބިގެން އޮތީ ހުއްޓިފައިކަން "މިރާ" އަށް ފެނިފައިވާ ލިޔެކިޔުންތަކުން އެނގެން އެބައޮތެވެ.
އެމްޔޫ ވިދާޅުވި ގޮތުގައި އެމަނިކުފާނު ޗެއާމަންގެ މަގާމުން ވަކިވެޑައިގެންނެވިއިރު، އާ ޓާމިނަލްގެ މަގުތަކާ އެހެން ކަންކަން ކުރަން ބަޔަކާ ހަވާލުކޮށްފައިވާނެ ކަމަށް ގަބޫލުކުރެ އެވެ. ކުރީގެ ޗެއާމަން އެހެން ވިދާޅުވިނަމަވެސް ޓާމިނަލްގެ މަގުތަކާއި މިނޫންވެސް ގިނަ މަސައްކަތްތައް ނިންމަން ބޭނުންވާ ފައިސާ ވެސް ނެތްކަން އެމްއޭސީއެލްގެ އޮފިޝަކުން އޭރުގެ ވެސް ބުނެފައިވެ އެވެ.
ކޮމެންޓް
Republic of Maldives