މިއަދު މެންދުރު ނަމާދަށްފަހު އަބްދުއްރަހްމާންގެ ހަށިގަނޑު ވަޅުލަނީ

އއ. މާޅޮހުގައި މިމަހުގެ 13 ވަނަ ދުވަހުގެ ރޭ ދަންވަރު ބޮޑެތި ޒަހަމްތަކެއް ލިބުމުގެ ސަބަބުން މަރުވި އުމުރުން 65 އަހަރުގެ އެ ރަށު، އޯކިޑްމާގޭ އަބްދުލްރަހްމާން އާދަމްގެ ހަށިގަނޑު މިއަދު މެންދުރު ނަމާދަށްފަހު ވަޅުލަން ނިންމައިފި އެވެ.

އަބްދުލްރަހްމާނަށް ވަނީ ނިދާފައި އޮއްވާ ބޮޑެތި ޒަހަމްތަކެއް ދީފަ އެވެ. އޭނާގެ ބޮލުގައި މަރުތޭލު ޒާތުގެ އެއްޗަކުން ޖަހައި ބޯ ވަނީ ޗިސްކޮށްލައިފަ އެވެ. އޭނާ މަރުވެފައި ވަނީ ފަރުވާ ދިނުމަށް އެރަށު ސިއްހީ މަރުކަޒަށް ގެންގޮސްފައި ވަނިކޮށް އެރޭ ދަންވަރުގެ ވަގުތެއްގަ އެވެ.

އޭނާ މަރުވި ސީދާ ސަބަބު ދެނެގަތުމަށް އިންޑިއާގެ ތިރުވަނަންތަޕޫރަމްއަށް ގެންގޮސް ވަނީ އޮޓޮޕްސީ ހަދައިފަ އެވެ. އޮޓޮޕްސީއަށްފަހު ހަށިގަނޑު މާލެ ގެނެސްފައި ވަނީ ރޭ 7:50 ހާއިރު އެވެ. ގެނައުމަށްފަހު ހަށިގަނޑު ލީ މޯޗަރީއަށެވެ.

އަބްދުއްރަހްމާންގެ މައްޗަށް ކަށުނަމާދު ކުރުން އޮތީ މިއަދު މެންދުރު ނަމާދަށްފަހު އެވެ. ޖަނާޒާ އޮތީ އާސަހަރާ މިސްކިތުގަ އެވެ. 

އަބްދުއްރަހްމާން މަރާލިތާ ހަފްތާއަކަށްވުރެ ގިނަ ދުވަސްވެފައިވާއިރު، މިހާތަނަށް ގާތިލަކު ހޯދިފައެއް ނުވެ އެވެ. އެ މައްސަލައިގައި މީހަކު ވެސް ހައްޔަރުކޮށްފައެއް ނުވެ އެވެ. ފުލުހުން މައްސަލަ ތަހުގީގު ކުރަމުންދިޔަ ނަމަވެސް ތަހުގީގާ ގުޅޭ އެއްވެސް މައުލޫމާތެއް މިހާތަނަށް ހާމަކޮށްފައެއް ނުވެ އެވެ.