މަހުގެ އެކްސްޕޯޓް އިތުރު، ދަޅު މަހުގެ އެކްސްޕޯޓް ދަށް

މި އަހަރުގެ މިހާތަނަށް ރާއްޖޭން އެކްސްޕޯޓް ކުރި މަހުގެ އެކްސްޕޯޓް އިތުރުވިނަމަވެސް ދަޅުމަސް އެކްސްޕޯޓް ކުރި މިންވަރު ބޮޑުތަނުން ދަށް ވެއްޖެ އެވެ. 

މަސްވެރިކަމުގެ ތަފާސް ހިސާބުތައް ދައްކާ ގޮތުން މެއި މަހުގެ ނިޔަލަށް ރާއްޖޭން 38,800.6 މެޓްރިކް ޓަނުގެ މަސް ވަނީ އެކްސްޕޯޓްކޮށްފަ އެވެ. ނަމަވެސް މިދިޔަ އަހަރުގެ މި މުއްދަތުގައި މަހުގެ އެކްސްޕޯޓް ހުރީ 23,356.1 ޓަނުގަ އެވެ. މިއީ ގާތްގަނޑަކަށް 60 ޕަސެންޓުގެ އިތުރުވުމެކެވެ. 

މި އަހަރުގެ މިހާތަނަށް ރާއްޖޭން 31,157.3 މެޓްރިކް ޓަނުގެ ކަޅުބިލަ މަސް ވަނީ އެކްސްޕޯޓްކޮށްފަ އެވެ. މިދިޔަ އަހަރު މި އަދަދު އުޅެނީ 14,877.5 ޓަނުގަ އެވެ. އަދި މި އަހަރު 4,002.6 މެޓްރިކް ޓަނުގެ ބޮޑު ކަންނެލި އެކްސްޕޯޓްކޮށްފައިވެ އެވެ، މިދިޔަ އަހަރު މި އަދަދު އުޅެނީ 4,670.2 ޓަނުގަ އެވެ. އަދި މަހުގެ އެހެން ބާވަތްތައް އެކްސްޕޯޓް ކުރި މިންވަރު މި އަހަރު 623.5 ޓަނުގައި ހުރިނަމަވެސް މިދިޔަ އަހަރުގެ އެކްސްޕޯޓް ހުރީ 409.3 މެޓްރިކް ޓަނުގަ އެވެ. 

ކަޅުބިލަ މަހާއި ކަންނެލީގެ އެކްސްޕޯޓް އިތުރުވި ނަމަވެސް ރާއްޖޭން އެކްސްޕޯޓްކުރި މަސް ދަޅުގެ އަދަދު ވަނީ ދަށަށް ގޮސްފަ އެވެ. މި އަހަރުގެ މިހާތަނަށް 2,604.4 ޓަނުގެ މަސް ދަޅު އެކްސްޕޯޓްކޮށްފައިވެ އެވެ. މިދިޔަ އަހަރުގެ މި މުއްދަތުގައި ދަޅު މަހުގެ އެކްސްޕޯޓް އުޅެނީ 3,049.1 ޓަނުގަ އެވެ. 

މި އަހަރުގެ މިހާތަނަށް ރާއްޖޭން އެކްސްޕޯޓްކުރި މަހުގެ މިންވަރު އިތުރުވެފައިވަނީ މަސްވެރިން މަހަށް ފުރުން އިތުރުވެ ބާނާ މަހުގެ މިންވަރު އިތުރުވުމާ ގުޅިގެންނެވެ. މިހާރު މަސްވެރިންނަށް 48 ގަޑިއިރު ތެރޭ ފައިސާ ދެމުން ދިއުމަކީ މީގެ މައިގަނޑު ސަބަބެވެ.