ވަގުތީ ގޮތުން ސުޕްރީމް ކޯޓުގެ ހިންގުން ފަނޑިޔާރު ހަމީދަށް

އުއްތަމަ ފަނޑިޔާރު އަހުމަދު މުއުތަސިމް އަދުނާން މިއަދު މަގާމުން ރިޓަޔާ ކުރެއްވުމާ ގުޅިގެން ސުޕްރީމް ކޯޓު ވަގުތީ ގޮތުން ހިންގުން ފަނޑިޔާރު އަބްދުﷲ ހަމީދުއާ ހަވާލުކޮށްފި އެވެ.

ސުޕްރީމް ކޯޓުން މިއަދު ބުނީ އުއްތަމަ ފަނޑިޔާރުގެ މަގާމަށް ބޭފުޅަކު އައްޔަނު ކުރެވެންދެން އެ މަގާމުގެ މަސްއޫލިއްޔަތުތައް އަދާކުރައްވާނީ ފަނޑިޔާރު ހަމީދު ކަމަށެވެ. އެހެންކަމުން ސުޕްރީމް ކޯޓަށް ފޮނުވާ ލިޔެކިޔުންތަކުގައި އެޑްރެސް ކުރައްވާނީ އެބޭފުޅާއަށް ކަމަށް ވެސް އެކޯޓުން ބުންޏެވެ.

ފަނޑިޔާރު ހަމީދު ސުޕްރީމް ކޯޓަށް އައްޔަނު ކޮށްފައި ވަނީ މިދިޔަ ޖޫން މަހުގެ 11 ވަނަ ދުވަހު އެވެ. އެއީ ސުޕްރީމް ކޯޓުގެ ކުރީގެ ފަނޑިޔާރުން ކަމަށްވާ މަހާޒު އަލީ ޒާހިރު އާއި ޑރ. އަޒްމިރަލްދާ ޒާހިރު ވަކިކުރުމުން އެ ކޯޓުގެ ބެންޗުން ހުސްވި އެއް ގޮނޑިއަށެވެ.

ފަނޑިޔާރު ހަމީދަކީ 2007 ވަނަ އަހަރުން ފެށިގެން 2022 ވަނަ އަހަރާ ހަމައަށް ހައި ކޯޓުގެ ފަނޑިޔާރުކަން ކުރެއްވި ބޭފުޅެކެވެ. ހައިކޯޓުގެ ފަނޑިޔާރު ކަމުން ހަމީދު ވަކިކޮށްފައި ވަނީ 2015 ވަނަ އަހަރު ސަރުކާރުން ފަނޑިޔާރުންނަށް ފްލެޓްތަކެއް ދޭން ނިންމުމުން އޭގެ ތެރެއިން ފްލެޓަކާ އޭނާ ހަވާލުވި ކަމަށް ބުނާ މައްސަލައިފަ އެވެ.