ދޯހަޅި ސިޔާސަތުތަކުގެ ތެރޭގައި ދައުލަތުގެ މަދު ވަސީލަތްތައް އިސްރާފުކުރުމުގެ ސަބަބުން، އިންވެސްޓަރުންގެ އިތުބާރު ގެއްލި، ޑޮލަރު ލިބުން ތާށިވުމުގެ ހުރިހާ ބުރައެއް އާންމު ރައްޔިތުންނާއި ދިވެހި ވިޔަފާރިތައް އުފުލަން ޖެހިފައިވާ ކަމަށް
ރާއްޖެއަށް މިހާރު ދިމާވެފައިވާ ޑޮލަރުގެ ތާށިކަން މެދުވެރީ ސަރުކާރުގެ ދޯހަޅި ސިޔާސަތުތަކުގެ ސަބަބުން ކަމަށް ވިދާޅުވެ، އެމްޑީޕީގެ ޗެއާޕާސަން ފައްޔާޒް އިސްމާއިލްގެ ފާޑުކިޔުން އަމާޒުކުރައްވައިފި އެވެ.
ޓީއެމްއޭގެ މުވައްޒަފުންގެ މުސާރައިގެ 80 ޕަސެންޓް ޑޮލަރުން އަދި 20 ޕަސެންޓް ރުފިޔާ އިން ދޭ ގޮތަށް އޮނިގަނޑަށް ގެނައި ބަދަލުގެ ސަބަބުން، ޕައިލެޓުން އިހުތިޖާޖަށް ނުކުންނަން އުޅޭކަމުގެ ވާހަކަތަކާ ގުޅުވައި، ފައްޔާޒް ވިދާޅުވީ މިއީ ވެސް ސަރުކާރުގެ ދޯހަޅި ސިޔާސަތުތަކުގެ ނަމޫނާ އެއް ކަމަށެވެ.
މިގޮތުން، ބޭރުން ފައިސާ ނުހޯދޭއިރު، ދޯހަޅި ސިޔާސަތުތަކުގެ ތެރޭގައި ދައުލަތުގެ މަދު ވަސީލަތްތައް އިސްރާފުކުރުމުގެ ސަބަބުން، އިންވެސްޓަރުންގެ އިތުބާރު ގެއްލި، ޑޮލަރު ލިބުން ތާށިވުމުގެ ހުރިހާ ބުރައެއް އާންމު ރައްޔިތުންނާއި ދިވެހި ވިޔަފާރިތައް އުފުލަން ޖެހިފައިވާ ކަމަށް އޭނާ ވިދާޅުވި އެވެ.
އެއާ އެކު، އެމްޑީޕީ ސަރުކާރުގައި ވުޖޫދުކުރި އިންޑަސްޓްރިއަލް ރިލޭޝަންސްގެ ގާނޫނުގެ ބޭނުން ހިފައި، ޓީއެމްއޭގެ ޕައިލެޓުންނާ މަޝްވަރާކޮށްގެން، އެ މައްސަލައަށް ރަނގަޅު ހައްލެއް ގެނައުމަށް ފައްޔާޒް ވަނީ ސަރުކާރަށް ގޮވާލައްވައިފަ އެވެ.
ފައްޔާޒް މިހެން ގޮވާލެއްވިއިރު، ޓީއެމްއޭއިން ވަނީ ނިންމުން ބަދަލުކޮށް، ކުރިން ވެސް ދެމުން އައި ގޮތަށް، މުވައްޒަފުންނަށް ޑޮލަރުން މުސާރަ ދޭން ނިންމައިފަ އެވެ.