އެމްއެމްއޭގެ ލުއިތަކާއެކު ޓީއެމްއޭ އިން ޑޮލަރުން މުސާރަ ދޭން ނިންމައިފި

ޓްރާންސް މޯލްޑިވިއަން އެއާލައިންސް (ޓީއެމްއޭ)ގެ މުވައްޒަފުންގެ މުސާރައިގެ އެއްބައި ދިވެހި ރުފިޔާއިން ދޭން ނިންމި މައްސަލަ ބޮޑުވެފައި ވަނިކޮށް އެ ނިންމުން ބަދަލުކޮށްފި އެވެ.

ޓީއެމްއޭގެ މުސާރައިގެ އޮނިގަނޑަށް ދާދި ފަހުން ގެނައި ބަދަލުގައި ވަނީ މުސާރައިގެ 80 ޕަސެންޓް ޑޮލަރުން އަދި 20 ޕަސެންޓް ރުފިޔާ އިން ދޭ ގޮތަށް ނިންމާފަ އެވެ.

ރާއްޖޭގެ 90 ޕަސެންޓް ރިސޯޓްތަކަށް ޓޫރިސްޓުން އުފުލާ ދުނިޔޭގެ އެންމެ ބޮޑު ސީޕްލޭން ކުންފުނި، ޓީއެމްއޭގެ ޕައިލޮޓުން ވަނީ ޑޮލަރުން ލިބޭ މުސާރައިގެ ބައެއް ރުފިޔާއިން ދޭން ޓީއެމްއޭ އިން ނިންމުމުން މިމަހުގެ 29 ވަނަ ދުވަހު މަސައްކަތް ހުއްޓާލަން ނިންމާފަ އެވެ.

އެގޮތަށް ނިންމާފައި ވަނިކޮށް، ޓީއެމްއޭގެ ސީއީއޯ އުސާމާ ފައުޒީ މުވައްޒަފުންނަށް ފޮނުއްވި މެސެޖެއްގައި ވިދާޅުވެފައި ވަނީ ކުރިން އެ ކުންފުނިން ނިންމި ނިންމުމަށް އަމަލު ނުކުރަން މިހާރު ނިންމާފައިވާ ކަމަށެވެ.

ޓީއެމްއޭގެ ނިންމުން ބަދަލުކޮށްފައިވާއިރު، މަރުކަޒީ ބޭންކް، އެމްއެމްއޭ އިން ވަނީ ޑޮލަރު މާރު ކުރުމުގެ ގަވައިދުގެ ދަށުން ޓީއެމްއޭއަށް މި އަހަރުގެ ޖެނުއަރީ މަހު ބޮޑު ލުޔެއް ދޭން ނިންމައިފަ އެވެ. މި ލުއިގެ ސަބަބުން އެ ކުންފުނީގެ އޮޕަރޭޝަނާއި އަދި މުވައްޒަފުންގެ މުސާރާ ބޭރު ފައިސާއިން ދިނުމުގައި މިވަގުތު ދަތިތަކެއް ނޯންނާނެ އެވެ.

އެނގިފައިވާ ގޮތުގައި މި ލުއި ދީފައިވަނީ އެމްއެމްއޭއަށް އެ ކުންފުނިން ހުށަހަޅާފައިވާ ލިޔެކިޔުންތަކަށް ބެލުމަށް ފަހު ބޭރު ފައިސާގެ ގާނޫނުގެ ތެރެއިން ދެވެން އޮންނަ ލުއިތަކެއް ދިނުމުގެ ބޭނުމުގަ އެވެ.

އެ ނިންމުން ނިންމި ސަބަބުތަކުގެ ތެރޭގައި ރާއްޖޭގެ ރިޒޯޓްތަކުން އަންނަ ފަތުރުވެރިން ރިޒޯޓްތަކަށް ގެންދިއުމުގައި މުހިއްމު ދައުރެއް އަދާކުރާ ބަޔަކަށް އެ ކުންފުނިވެފައި، އެ ކުންފުނީގެ މުވައްޒަފުންނަށް ޑޮލަރުން ލިބޭ މުސާރައަށް އުނިކަން ނާންނާނެ ގޮތަށް ކަންތައްތައް ހަމަޖެއްސުމަށް ޓީއެމްއޭ އަށް އެހީތެރިވުމުގެ ގޮތުންނެވެ.