އިކޮނޮމިކް މިނިސްޓަރު ސައީދުގެ ބައްޕާފުޅު އަވަހާރަވެއްޖެ

އިކޮނޮމިކް މިނިސްޓަރު މުހައްމަދު ސައީދުގެ ބައްޕަ، ހއ. ތުރާކުނު، ވިނަރެސް ސައީދު އަބްދުﷲ އަވަހާރަ ވެއްޖެ އެވެ.

މިނިސްޓަރު ސައީދުގެ ބައްޕަ އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް، އިންޑިއާގެ ކޮޗިންގަ އެވެ.

ސައީދަކީ ތުރާކުނުގެ ކުޑަ ކަތީބެއްގެ ގޮތުގައި 20 އަހަރަށް ވުރެ ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ. އަދި އެއަތޮޅު އުލިގަމުގެ ކުޑަކަތީބުކަން ވެސް ވަނީ ކުރައްވާފަ އެވެ.

އޭނާ އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒާއި ނައިބް ރައީސް ހުސެއިން މުހައްމަދު ލަތީފްގެ އިތުރުން ސަރުކާރުގެ އިސްވެރިން ވަނީ ތައުޒިޔާ ދަންނަވައިފަ އެވެ.

ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ސައީދަކީ ތުރާކުނުގެ ވެރިކަމުގެ ދާއިރާގެ އިސް މަގާމުތަކުގައި 20 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ، ގަދަރުވެރި ބޭފުޅެއް ކަމަށެވެ. އަދި އެއީ ހުލްގު ހެޔޮ، ދީންވެރި، ހަރުދަނާ ޝަހުސިއްޔަތެއް ކަމަށް ވެސް ރައީސް ވިދާޅުވި އެވެ.

"މަރުޙޫމްގެ އާއިލާއަށް ނުހަނު އިހުލާސްތެރިކަމާއެކު ތައުޒިޔާ ދަންނަވައި، ކެތްތެރިކަން ދެއްވުން އެދި ދުއާ ކުރަމެވެ." ރައީސްގެ މެސެޖުގައިވެ އެވެ.