ނުރައްކާތެރިކޮށް ދުއްވުން ކުށަކަށް ހަދަން ބިލެއް ހުށަހަޅައިފި

އެއްގަމު އިންޖީނުލީ އުޅަނދުތައް ނުރައްކާތެރިކޮށް، އާންމުންގެ މެދުގައި ބިރުވެރިކަން އުފެދޭ ގޮތަށް ދުއްވުމަކީ ކުށެއްގެ ގޮތުގައި ގާނޫނުލްއުގޫބާތުގައި ހިމަނަން ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.

ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއިލް އަހުމަދު ނަސީމް ހުށަހެޅުއްވި އެ ބިލުގައި ވަނީ، ގާނޫނުލްއުގޫބާތުގެ 121 ވަނަ މާއްދާއަށް ފަރުވާލެއް ނެތި ކުރާ ކަމަކުން ބިރުވެރިކަން އުފެދޭ ފަދަ ކަންކަމުގެ ތެރޭގައި، އިންޖީނުލީ އެއްގަމު އުޅަނދުތައް ނުރައްކާތެރިކޮށް ދުއްވުން ހިމެނުމަށެވެ.

ސަބަބަކީ، އެ ބިލުގައިވާ ގޮތުންނަމަ، ފަރުވާލެއް ނެތި ބިރުވެރިކަން އުފެދޭ ގޮތަށް ކުރާ ކުށްތަކުގެ ތެރޭގައި ނުރައްކާތެރިކޮށް ދުއްވުން ހިމަނާފައި ނެތުމުން، މަގުމަތީގެ އެކްސިޑެންޓްތަކުގައި ގާނޫނީ ފިޔަވަޅު އެޅުމަށް ދިމާވާ ގޮންޖެހުންތައް ހައްލު ކުރުން ކަމަށް މީކާއިލް ވިދާޅުވެފައި ވެ އެވެ. 

އެކްސިޑެންޓްތަކާ ގުޅިގެން އެ ގާނޫނުގެ ދަށުން ދައުވާ ކުރެވެނީ ނުރައްކާތެރިކޮށް ދުއްވުމުގެ ސަބަބުން މީހަކު މަރުވުން ނުވަތަ ފުރާނައަށް ނުވަތަ މުދަލަށް ގެއްލުމެއް ލިބުމުން އެކަންޏެވެ. 

އަދި އެއްގަމު ދަތުރުފަތުރުގެ ގާނޫނުގެ ދަށުން، ނުރައްކާތެރިކޮށް ދުއްވުމުގެ ސަބަބުން ފުރާނައަށް ނުވަތަ މުދަލަށް ގެއްލުމެއް ނުލިބޭ ހާލަތްތަކުގައި ދެވޭ އަދަބަކީ ޖޫރިމަނާ ކުރުން ނުވަތަ ވަކި މުއްދަތަކަށް ލައިސަންސް ހިފެހެއްޓުމެވެ.

މީކާއިލް މިފަދަ އިސްލާހެއް ހުށަހަޅުއްވާފައިވަނީ، ހާއްސަކޮށް މާލޭގައި އެކްސިޑެންޓުތައް ހިނގުން އާދަޔާ ހިލާފަށް ގިނަވެފައިވާ ދަނޑިވަޅެއްގަ އެވެ.

މިގޮތުން، ފާއިތުވި ހަ މަސް ދުވަހުގެ ތެރޭގައި، 1،000އަށް ވުރެ ގިނަ އެކްސިޑެންޓު ރިޕޯޓުކޮށްފައިވާ ކަމަށް ފުލުހުންގެ ތަފާސްހިސާބުތަކުން ދައްކަ އެވެ.

ދާދިފަހުން މާލޭގައި ހިނގި ނުރައްކާތެރި އެކްސިޑެންޓެއްގައި 17 އަހަރުގެ ކުއްޖަކު މަރުވެ، އިތުރު ދެ މީހަކަށް ބޮޑެތި އަނިޔާތަކެއް ވަނީ ލިބިފަ އެވެ.