ފްލެޓްތަކަށް ފައިސާ ނުދައްކާ މީހުންނަށް ފައިނޭންސް ނުލިބޭ ގޮތް ހަދަނީ

ފްލެޓްތަކަށް ފައިސާ ނުދައްކާ ފަރާތްތަކަށް ފައިނޭންސް ނުލިބޭ ގޮތް ހަދަން ތައްޔާރުވެ، އެޗްޑީސީ ކަސްޓަމަރުންގެ ކްރެޑިޓް މައުލޫމާތު އެމްއެމްއޭގެ ކްރެޑިޓް އިންފޮމޭޝަން ސިސްޓަމް އަށް ދީފި އެވެ.  

އެޗްޑީސީ އިން ނެރެފައިވާ ބަޔާނެއްގައިި ބުނީ މި އަހަރުގެ މާރިޗް މަހުން ފެށިގެން އެ ކުންފުންޏަށް ފައިސާ ދައްކަން ޖެހޭ ކަސްޓަމަރުންގެ މައުލޫމާތު އެމްއެމްއޭގެ ކްރެޑިޓް އިންފޮމޭޝަން ސިސްޓަމަށް އަޕްޑޭޓް ކުރަމުންދާ ކަމަށެވެ. 

އެ ކުންފުނިން ބުނީ މި ބަދަލު ގެންނަން ނިންމީ ކުންފުނީގެ ހިންގުން ހަރުދަނާ ކުރުމާއި ކުންފުނީގެ މާލީ ގާބިލްކަން އިތުރުކޮށް، އާއްމު ރައްޔިތުންނަށް ދެމުންދާ ހިދުމަތުގެ ފެންވަރު ރަނގަޅު ކުރުމަށް ކުރަމުންދާ މަސައްކަތުގެ ދަށުން ކަމަށެވެ. 

"މި ބަދަލާއެކު މި ކުންފުންޏަށް ފައިސާ ދައްކަން ޖެހޭ ކަސްޓަމަރުންނަށް އެއްވެސް މާލީ އިދާރާއަކުން ކްރެޑިޓް ދޫކުރުމުގެ ކުރިން ނުވަތަ ރީސްޓްރަކްޗާ ކުރުމުގެ ކުރިން ނުވަތަ އާ ކުރުމުގެ ކުރިން ނުވަތަ އިތުރުކޮށްދިނުމުގެ ކުރިން ސިސްޓަމްގައިވާ މައުލޫމާތުގެ މައްޗަށް ބިނާކޮށް، މާލީ އިދާރާތަކުން އެ ފަރާތްތަކުން ކްރެޑިޓް އިވޭލުއޭޓް ކުރަމުން ގެންދާނެ އެވެ،" އެޗްޑީސީއިން ބުނެފައިވެ އެވެ. 

އެޗްޑީސީއިން  ބުނީ އެހެންކަމުން މި ކުންފުންޏަށް ފައިސާ ދައްކަން ޖެހޭ ކަސްޓަމަރުން މިކަމަށް ސަމާލުވެ، ގަވައިދުން ފައިސާ ދައްކަމުން ގެންދިއުމަކީ މުހިންމުކަމެއް ކަމުގައި ދަންނަވަމެވެ. 

ދުވަހު ނޫހެއް ކަމަށްވާ ސަން އިން އާއްމު ކުރި ރިޕޯޓެއްގައިވާ ގޮތުން 8،511 ފުލެޓުގެ ތެރެއިން ފައިސާ ދައްކާ ހަލާސްކޮށް އަމިއްލަ ކޮށްފައިވަނީ އެންމެ 193 ފުލެޓެވެ. އަދި ގަވާއިދުން ކުލި ނުދައްކާ 5،099 ފުލެޓު ރިކޯޑުކުރެވިފައިވެ އެވެ. އަދި ގަވާއިދުން ކުލި ދައްކާ ކަމަށް ރިކޯޑުކުރެވިފައިވަނީ އެންމެ 3،219 ތަނަކުންނެވެ. އަދި ނުލިބި ހުރި ކުލީގެ ގޮތުގައި 728 މިލިއަން ރުފިޔާ ނުލިބި އެބައޮތެވެ.