ކަނޑުމަތީގެ ހަތް ހާދިސާ | ގައްދޫ އުމުރުން ދުވަސްވީ މީހާ ނުފެނޭ

މޫސުން ގޯސްވެ ކަނޑު ގަދަވުމާއެކު މޫސުމަށް ސަމާލުވާން މެޓް އޮފީހާއި ސިފައިން ދިޔައީ އެދެމުންނެވެ، ނަސޭހަތްތެރިވަމުންނެވެ. މޫސުން ގޯސްވުމުގެ ސަބަބުން އިއްޔެ އާއި ރޭއެކި ކޯސްޓްގާޑަށް ކަނޑުމަތީގެ ހަތް ހާދިސާއެއް ރިޕޯޓްކޮށްފައިވެ އެވެ. މިގޮތުން އެއް ހާދިސާގައި ގެއްލުނު ގައްދޫ، އުމުރުން ދުވަސްވީ މީހާ އަދިވެސް ނުފެންނަ ކަމަށް ކޯސްޓްގާޑުން ވަނީ ބުނެފަ އެވެ. 

ކަނޑުމަތީގެ އެއް ހާދިސާއަކީ އުމުރުން 75 އަހަރުގެ މީހަކު ގެއްލިގެން އިއްޔެ ރިޕޯޓްކުރި ހާދިސާ އެކެވެ. މި ހާދިސާގައި ގެއްލިފައިވަނީ ގދ. ގައްދޫ ޒަކަރިއްޔާ މުހައްމަދު އެވެ. އޭނާ ގައްދޫ ފުރިކަމަށް ވަނީ އެ އަތޮޅު ގަމަށް ދިއުމަށެވެ. 

ދިވެހި ފުލުހުން ބުނީ، އެ މީހާ އެންމެ ފަހު ފެނުނުއިރު، ލައިގެން ހުރީ ނޫ ކުލައިގެ އަތް ކުރު ގަމީހަކާއި ކަޅުކުލައިގެ ސޯޓެއް ކަމަށެވެ. އެ މީހާ ހޯދުމަށް ކުރަމުންދާ މަސައްކަތުގެ ތެރެއިން، އެމްއެންޑީއެފްގެ ކޯސްޓްގާޑް އިން ކަނޑުގެ ސަރަހައްދު ބެލުމުގެ މަސައްކަތް ކުރަމުންދާ ކަމަށް ބުންޏެވެ. 

އެމީހާ ހޯދުމަށް ކުރާ މަސައްކަތްތަކުގެ ތެރެއިން އެމްއެންޑީއެފް ސައުތު ރީޖަނަލް ކޯސްޓުގާޑުން ބޭރު ކަނޑުގެ ސަރަހައްދު ބެލުމުގެ މަސައްކަތް ދަނީ ކުރަމުންނެވެ. އަދި ގަމާއި ގަން ލައިރި ފަޅުރަށްތައް ބެލުމުގެ މަސައްކަތް ފުލުހުން ދަނީ ކުރަމުންނެވެ.

ކަނޑުމަތީގެ ހާދިސާތަކުގެ ތެރޭން އަށް ދިވެހިންނާއި ހަތަރު ބިދޭސީންނާ އެކު މާލެ އިން ލ. ހިތަދުއަށް ދަތުރުކުރި މުދާ އުފުލާ އޯޝަން އެކްސްޕްރެސް ދޯނި ވަނީ މުދަލާއެކު އަޑިއަށް ގޮސްފަ އެވެ. ނަމަވެސް އެ ދޯނީގައި ތިބި މީހުން ވަނީ ކޯސްޓްގާޑުން ސަލާމަތްކޮށްފަ އެވެ.