މާފަރު އެއާޕޯޓް ތަރައްގީކޮށް، ވައިޑް ބޮޑީ ބޯޓުތަކަށް ހުޅުވާލައިފި

މާފަރު އިންޓަނޭޝަނަލް އެއާޕޯޓް (އެމްއައިއޭ) އަށް ވައިޑް ބޮޑީ މަތިންދާ ބޯޓަށް ޖެއްސޭ ވަރަށް ތަރައްގީކޮށް ހުޅުވައިފި އެވެ. 

މާފަރު އިންޓަނޭޝަނަލް އެއާޕޯޓުގައި މިއަދު ބޭއްވި ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދު އާއި ކޮންސްޓްރަކްޝަން މިނިސްޓަރު އަބްދުﷲ މުއްތޮލިބު އަދި ޔޫއޭއީން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ އިތުރުން މި އެއާޕޯޓަށް ފައިނޭންސް ކުރާ އަބޫދާބީ ފަންޑުގެ އިސްވެރިންވެސް ބައިވެރިވަޑައިގަތެވެ. 

ގައުމީ އެއާލައިންއިން ބަލަހަަށްޓަކުން ގެންދާ މި އެއާޕޯޓު ހުޅުވުމަށްފަހު ހިންގި ތަރައްގީ ކުރުމުގެ ދެވަނަ މަަޝްރޫއު ނިމިގެން ދިއުމާއެކު މިހާރު މި އެއާޕޯޓްވެފައިވަނީ ވިއައިއޭ އާއި ގަން އިންޓަނޭޝަނަލް އެއާޕޯޓް ފިޔަވައި ވަައިޑް ބޮޑީ ބޯޓު ޖެއްސޭ ހަމައެކަނި އެއާޕޯޓަށެވެ. 

ނޫނު އަތޮޅުގައި ހުންނަ މާފަރު އިންޓަނޭޝަނަލް އެއާޕޯޓް އަޕްގްރޭޑްކޮށް ވައިޑް ބޮޑީ މަތިން ދާބޯޓުތައް ޖާގަ ދިނުމާއި އޮޕަރޭޝަނަލް އެފިޝަންސީ ރަނގަޅު ކުރުމުގެ މަސައްކަތް ކޮށްފައިވަނީ އެމްޓީސީސީ އިންނެވެ. މި އަޕްގްރޭޑުގެ ދަށުން ރަންވޭ 2.2 ކިލޯމީޓަރުން 2.8 ކިލޯމީޓަރަށް ފުޅާކޮށް، ބޮއިން 777 އަދި އެއާބަސް އޭ330 ފަދަ ބޮޑެތި މަތިންދާބޯޓުތައް އެއާޕޯޓަށް ގެންގުޅެވޭނެ ގޮތް ހަދާނެ އެވެ. މީގެ އިތުރުން އޭޕްރަން ކެޕޭސިޓީ ވަރަށް ބޮޑަށް އިތުރުކޮށް، ޕާކިން ޖާގަ 13 ޖެޓުން 26 ޖެޓަށް ބޮޑުކޮށްފައިވެ އެވެ. 

އެމްއައިއޭ ޑިވެލޮޕް ކުރީ ކުރީ ރައީސް އަބްދުﷲ ޔާމީންގެ ވެރިކަމުގަ އެވެ. މި އެއާޕޯޓް ތަރައްގީ ކުރީ އަބޫދާބީ ފަންޑުން ހިލޭ އެހީ ދީގެން ސިންގަޕޫރުގެ ޓަފް ކުންފުނިންނެވެ. އަބޫދާބީ ފަންޑުގެ 60 މިލިއަން ޑޮލަރު ހޭދަ ކުރި އެވެ. އެއާޕޯޓް ތަރައްގީ ކޮށްފައިވަނީ ދުނިޔޭގެ އެންމެ ބޮޑެތި މަތިންދާ ބޯޓްތައް ކަމަށްވާ އެއާބަސް އޭ 320 އާއި ބޮއިން 737 މަރުކާގެ ބޯޓު ފަހަރު ޖެއްސޭ ފެންވަރަށް 2،200 މީޓަރު ދިގު އަދި 40 މީޓަރު ފުޅާ ރަންވޭއަކާ އެކުގަ އެވެ.