ކެލާ ފަޅުގައި ހަދާ ރިސޯޓް ލުއިތަކާއެކު އަލުން އިއުލާނު ކުރަނީ

ހއ. ކެލާގެ ފަޅުގައި ދެ ރިސޯޓެއް ތަރައްގީކުރަން ހުޅުވާލައި ކުރިން ކުރި އިއުލާނު ބާތިލްކޮށް ބޮޑެތި ލުއިތަކާއެކު އަލުން އިއުލާނު ކުރަން ނިންމައިފި އެވެ. 

ކެލާ ފަޅުގައި ދެ ރަށް ހިއްކައިގެން ރިސޯޓު ތަރައްގީކުރަން ހުޅުވާލީ މިދިޔަ މާރިޗު މަހުގެ 31 ވަނަ ދުވަހު އެވެ. އެ ފަހަރު އިއުލާނުކުރީ އެ ރަށުގެ ފަޅުން 156.2 ހެކްޓަރާއި 169.3 ހެކްޓަރުގެ ރަށެއް ހިއްކައި ރިސޯޓް ތަރައްގީ ކުރާނެ ބަޔަކު ހޯދުމަށެވެ. 

މި ބިޑުގެ މުއްދަތު ހަމަވެފައިވަނީ މިދިޔަ މަހުގެ ފަސް ވަނަ ދުވަހު އެވެ. 

ޓޫރިޒަމް ނެތް ސަަރަހައްދުތަކަށް ޓޫރިޒަމް ގެންދަން ކުރާ މަސައްކަތުގެ ދަށުން ހއ. އާއި ހދ. އަދި ށ. އާއި ތ. އާއި ލ. ގެ އިތުރުން އައްޑޫގައި ރިސޯޓު ތަރައްގީކޮށް އިންވެސްޓަރުންނަށް ވަނީ ފުރުސަތު ހުޅުވާލާފަ އެވެ. މި މަޝްރޫއުތަކަށް ކުރިމަތިލާ ފަރާތްތަކަށް ދެ އަހަރުގެ މުއްދަތުގެ ލުއިތަކެއް ލިބޭނެ އެވެ.