ރަހީނުކޮށްފައި ހުރި ދިވެއްސަކު ސަލާމަތްކޮށް، ތުހުމަތުވާ މީހާ ހައްޔަރުކޮށްފި
އަނިޔާ ލިބިފައިވާ 44 އަހަރުގެ ދިވެހި މީހާ ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށް ވެސް ފުލުހުން ބުންޏެވެ.
މާލޭގެ ގެއެއްގެ ތެރޭގައި ރަހީނުކޮށްފައި ހުރި ދިވެއްސަކު ސަލާމަތްކޮށް، އެކަމުގެ ތުހުމަތުވާ މީހާ ހައްޔަރުކޮށްފި އެވެ.
ފުލުހުން ބުނީ، މާލޭގެ ގެއެއްގެ ތެރޭގައި މީހަކު ރަހީނުކޮށް، އަނިޔާކުރާކަމުގެ ރިޕޯޓެއް އިއްޔެ ލިބިފައިވާ ކަމަށެވެ.
ފުލުހުން ކުރި މަސައްކަތުން އެ މީހާ މިއަދު ސަލާމަތްކޮށް، ރަހީނުކުރި ކަމަށް ތުހުމަތުވާ މީހާ ކުށުގެ ވެށިން ހައްޔަރު ކޮށްފައިވާ ކަމަށް ބުންޏެވެ.
އެ މައްސަލައާ ގުޅިގެން، ކުށުގެ ވެށިން ހައްޔަރު ކޮށްފައިވަނީ ސ. ފޭދޫ ސުވާސާގެ، އިބްރާހީމް ސައީދެވެ.
އެ މައްސަލާގައި އަނިޔާ ލިބިފައިވާ 44 އަހަރުގެ ދިވެހި މީހާ ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށް ވެސް ފުލުހުން ބުންޏެވެ.
މިއީ މީހަކު ރަހީނުކޮށްގެން މިއަދު ފެންމަތިވި ދެވަނަ މައްސަލަ އެވެ.
މާލޭގެ ގެއެއްގައި ރަހީނުކޮށްގެން ގެންގުޅުނު ބަންގްލަދޭޝް ފިރިހެނަކު ފުލުހުން ސަލާމަތްކޮށްފައިވަނީ މިއަދު ހެނދުނެވެ.
އެ ބިދޭސީ މީހާ އައިޖީއެމްއެޗަށް ގެންގޮސް، ސިއްހީ ހާލަތު ބެލުމަށް ކުރަން ޖެހޭ ކަންކަން މިހާރު ކުރަމުންދާ ކަމަށާއި، އެމީހާއަށް ބޭރުފުށުން އެއްވެސް އަނިޔާއެއް ލިބިފައިނުވާ ކަމަށް ވެސް ފުލުހުން ބުންޏެވެ.
ނަމަވެސް މި މައްސަލައާ ގުޅިގެން މީހަކު އަދި ހައްޔަރުކޮށްފައެއް ނުވެ އެވެ.
ކޮމެންޓް
Republic of Maldives