ތިލަމާލެ ބުރިޖުގެ އެންމެ އުނދަގޫ މަރުހަލާ ނިމިއްޖެ| 68 ތަނެއްގައި 263 ޕައިލް

މާލެ އާއި ވިލިމާލެ، ގުޅިފަޅު އަދި ތިލަފުށި ގުޅުވައިލުމަށްޓަކައި އަޅަމުންދާ ތިލަމާލެ ބްރިޖުގެ އެންމެ އުނދަގޫ މަރުހަލާ ނިންމާލުމާ އެކު، މުޅި މަޝްރޫއުގެ 60 ޕަސެންޓު ނިމިފައިވާ ކަމަށް ކޮންސްޓްރަކްޝަން މިނިސްޓަރު، ޑރ. އަބްދުﷲ މުއްތަލިބު ވިދާޅުވެއްޖެ އެވެ.

މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ، މި މަޝްރޫއުގެ އެންމެ އުނދަގޫ މަރުހަލާގެ ދަށުން، އެއްގަމާއި ކަނޑުގެ ތަފާތު 68 ތަނެއްގައި ޖުމްލަ 263 ޕައިލް ޖަހާފައިވާ ކަމަށެވެ.

އެއާ އެކު މުޅި މަޝްރޫއުގެ 60.84 ޕަސެންޓު މިހާރު ނިމިފައިވާ ކަމަށް މިނިސްޓަރު ވިދާޅުވި އެވެ.

އިންޑިއާގެ ލޯނު އެހީގައި ހިންގާ އެ މަޝްރޫއަށް 500 މިލިއަން ޑޮލަރު (7.7 ބިލިއަން ރުފިޔާ) ހަރަދުވެ އެވެ. އެއީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ދޭ 400 މިލިއަން ޑޮލަރާއި އިންޑިއާގެ ސަރުކާރުން ހިލޭ އެހީގެ ގޮތުގައި ދޭ 100 މިލިއަން ޑޮލަރެވެ.