ހަލާލް ޓޫރިޒަމް މާކެޓު ބޮޑު، ނުވަދެ ތިބުން ބުއްދިވެރިއެއް ނޫން

ހަލާލް ޓޫރިޒަމްއަކީ ދުނިޔޭގެ ބޮޑު މާކެޓެއް ކަމަށާ، އެ މާކެޓު ހޯދަން މަސައްކަތް ނުކޮށް ތިބުމަކީ ބުއްދިވެރި ކަމެއް ނޫން ކަމަށް ޓޫރިޒަމް މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.

ދައުލަތުން ފުރަތަމަ ފަހަރަށް ހަލާލް ރިސޯޓްތަކެއް ހަދަން ރަށްތަކެއް ނެރުމާ ބެހޭ ގޮތުން ގައުމީ ޓވީވައި ޓޫރިޒަމާއި ތިމާވެށީގެ މިނިސްޓަރު ތޯރިގު ވިދާޅުވީ މިދިޔަ އަހަރު ހަލާލް މާކެޓަކީ 274 ބިލިއަން ޑޮލަރުގެ މާކެޓެއް ކަމަށާ މި އަހަރު އެ އަދަދު އިތުރުވާނެ ކަމަށެވެ. އެހެންވެ މި މާކެޓު ޓެޕް ކުރަން މަސައްކަތް ކުރުމަކީ އެންމެ މުހިންމު އެއް މަސައްކަތްކަން މިނިސްޓަރު ފާހަގަ ކުރެއްވި އެވެ.

"ދިވެހިންނަކީ ޓޫރިޒަމްގައި އާ ކަންކަން ކޮށް ދުނިޔެއަށް މިސާލު ދެއްކިބައެއް. އެހެންވެ މިއީ ވެސް ރާއްޖޭގެ ޓޫރިޒަމް ބްރޭންޑް އިތުރަށް ވަރުގަދަ ވެގެންދާނެ ކަމެއް،" ތޯރިގު ވިދާޅުވި އެވެ.

މިނިސްޓަރު އިތުރަށް ވިދާޅުވި ގޮތުގައި މި ކަމަކީ ރާއްޖެއަށް މުޅިން އާ ކަމަކަށް ނުވިނަވެސް މި ސްކޭލްގައި މި ކުރަނީ ފުރަތަމަ ފަހަރަށެވެ. އެހެންވެ މިކަމުގައި ދަސްކުރަން ޖެހޭ ގިނަ ކަންތައްތަކެއް ހުރިކަން މިނިސްޓަރު ތޯރިގު ފާހަގަ ކުރެއްވި އެވެ. އަދި މި ޓޫރިޒަމް ކުރިއަށް ގެންދަން ސަރުކާރުން ހާއްސަ ގިނަ އިނާޔަތްތަކެއް ދޭންވެސް ރައިސް ޑރ. މުހައްމަދު މުއިއްޒު ނިންމާފައިވާކަން މިނިސްޓަރު ފާހަގަ ކުރެއްވި އެވެ.

ޓޫރިޒަމް މިނިސްޓްރީން އިއްޔެ ރަށްތައް ހުޅުވާލި ރަށްތަކުގެ ތެރޭގައި ހިމެނެނީ ހއ. އާއި ހދ. އަދި ށ. އަތޮޅުގެ އިތުރުން ތ. ލ. އަތޮޅުންނެވެ. މިއަދު ޖުމްލަ 31 ރަށެއް ހުޅުވާލިއިރު ކޮންމެ އަތޮޅަކުން އެއް ރަށް ހާއްސަކޮށްފައިވަނީ އިސްލާމިކް ޓޫރިޒަމަށް ހާއްސަ ޑްރައި ރިސޯޓު ކޮންސެލްޓަށް ތަރައްގީ ކުރުމަށެވެ.

މި ރަށްތައް ހުޅުވާލި ސަބަބާ ބެހޭ ގޮތުން ޓޫރިޒަމް މިނިސްޓްރީގައި މިއަދު ނޫސްވެރިންނަށް މައުލޫމާތު ދިނުމަށް ބޭއްވި ބައްދަލުވުމުގައި "މިރާ" އިން ކުރި ސުވާލަކަށް ޖަވާބު ދެއްވަމުން ޓޫރިޒަމާއި ތިމާވެށީގެ މިނިސްޓަރު ތޯރިގު އިބްރާހިމް ވިދާޅުވީ މި ރަށްތަކުގެ ސަބަބުން ދިވެހި ޓޫރިޒަމްގެ ބްރޭންޑަށް އެއްވެސް ބަދަލެއް އަތުވެދާނެ ކަމަށް ނުވެލެވެ އެވެ.

"މިއީ ހަމަ ޓޫރިޒަމް ޑައިވާސިފިކޭޝަންގައި ހިމެނޭ ބައެއް. އެހެން ސްޕޯޓް އަދި ކަލްޗަރަލް ޓޫރިޒަމް ގޮތަށް. މިއީ އިތުރު ފުރިހަމަކަމެއް ލިބޭނެ ކަމެއް،" ތޯރިގު ވިދާޅުވި އެވެ.

މީގެ އިތުރުން، ރިޒޯޓެއް ތަރައްޤީކުރުމަށް ގެންނަ ތަކެއްޗަށް (ކެޕިޓަލް އިންވެސްޓްމަންޓް) 20 އިންސައްތަ އާ ހަމައަށް ޑިއުޓީ މައާފްކޮށްދިނުން. އަދި ތަންތަން ތަރައްގީ ކުރުމަށް ގެންނަ ފަރުނީޗަރާއި، ކިޗަން އެޕްލައިންސްސަސްއާއި އިލެކްޓްރޯނިކް އަދި އެހެނިހެން އެމެނިޓީސް ޑިއުޓީ މާފުދޭ ކެޓެގަރީއަށް އިތުރުކުރުން ހިމެނެ އެވެ.

މި ލުއިތަކުގެ ސަބަބުން ރާއްޖޭގެ ޓޫރިޒަމް ސިނާއަތް ސިންދަފާތުކުރުމަށް އިތުރަށް މަގު ފަހިވެގެން ދާނެއެވެ. އަދި މި ފަދައިން ތަރައްގީ ކުރާ ރިޒޯޓުތަކުގެ ސަބަބުން މި ސަރަހައްދުތަކުގައި ވަޒީފާ އުފެދި، އިގުތިސާދީ ދުވެލި ހަލުވިވެގެންދާނެ އެވެ.

ތަފާސް ހިސާބުތައް ދައްކާ ގޮތުގައި ހަލާލް ޓްރެވަލާސް ނުވަތަ ހަލާލް ޓޫރިޒަމްގެ މާކެޓުގެ އަގު މި އަހަރު ހުރީ 300 ބިލިއަން ޑޮލަރުގަ އެވެ. އަދި 2035 ވަނަ އަހަރު މި އަދަދު 500 ބިލިއަން ޑޮލަރަށް އުފުލިގެންދާނެ އެވެ. މިއީ އޭޝިއާ އާއި ޔޫރަޕު އަދި ދެކުނު އެމެރިކާ އަދި މެދެއިރުމަތިންވެސް ގިނަ އަދަދެއްގެ ޓޫރިސްޓުން އަންނަ މާކެޓެކެވެ.