އެއާ އިންޑިއާ ބޯޓު ވެއްޓުން: ގަސްދުގައި ބޯޓަށް ގެއްލުން ދިންތޯ ވެސް ބަލަނީ

މި މަހު ކުރީކޮޅު، އިންޑިއާ އިން ފުރައިގެން ލަންޑަނަށް ދަތުރުކުރި އެއާ އިންޑިއާގެ ބޯޓު ވެއްޓުނު ހާދިސާގެ ތަހުގީގުގައި އެކަން ހިނގަން މެދުވެރިވެދާނެ އެއްބެސް ސަބަބެއް އިސްތިސްނާ ނުކުރާނެކަމަށް އިންޑިއާގެ ވައިގެ ދަތުރުފަތުރާބެހޭ މިނިސްޓަރަކު ވިދާޅުވެއްޖެ އެވެ.

މި މަހުގެ 12 ވަނަ ދުވަހު އެ ބޯޓު އަހުމަދުއާބާދުގެ މީހުން ދިރިއުޅޭ ސަރަހައްދަކަށް ވެއްޓިފައިވަނީ، ބޯޓު ނައްޓައިލިތާ ކުޑަ ވަގުތުކޮޅެއްގެ ތެރޭގަ އެވެ. އެ ހާދިސާގައި 243 މީހުންގެ ތެރެއިން އެކަކު ފިޔަވައި، އެހެން އެންމެން ވަނީ މަރުވެފަ އެވެ. 

އެ އެ ބޯޓު ވެއްޓުނު ސަރަހައްދުން އިތުރު 19 މީހަކު މަރުވެފައިވާ ކަމަށް އިންޑިއާގެ ކަމާބެހޭ އިދާރާތަކުން ވަނީ ބުނެފަ އެވެ.

އިންޑިއާގެ ސިވިލް އޭވިއޭޝަންގެ ސްޓޭޓް މިނިސްޓަރު މުރުލިދާރު މޮހޯލް، އިންޑިއާގެ ނިއުސް ޗެނަލް އެންޑީޓީވީއަށް ދެއްވި އިންޓަވިއުއެއްގައި ބޯޓަށް ގަސްދުގައި ގެއްލުމެއް ދީފައިވުމުގެ ފުރުސަތު އޮތްތޯ ސުވާލުކުރުމުން ވިދާޅުވީ، މި ހާދިސާގެ ތަހުގީގައި "ހުރިހާ އޭންގަލްތަކަކުން" ބަލާނެ ކަމަށެވެ.

"ބޯޓުގެ ދެ އިންޖީނު އެއްކޮށް ފެއިލްވުމަކީ މީގެ ކުރިން ދުވަހަކުވެސް ދިމާވި ކަމެއް ނޫން،" ދެ އިންޖީނު އެއްފަހަރާ ފެއިލްވެދާނެ ކަމާމެދު ބައެއް ތަޖުރިބާކާރުން އުފައްދާފައިވާ ސުވާލުތަކަށް އިޝާރާތްކުރައްވައި އޭނާ ވިދާޅުވި އެވެ. 

ނަމަވެސް، ތަހުގީގު ކުރިއަށްދަނިކޮށް، މި ވަގުތު ސީދާ ވަކި އެއްޗެއް ބުނުން ރަނގަޅުނުވާނެ ކަމަށް މޮހޯލް ވިދާޅުވި އެވެ. 

އެ ހާދިސާގެ ތަހުގީގަށް ވަނީ ވެއްޓުނު ބޯޓުގެ ކަޅު ފޮށި ހޯދައި، އޭގައި ހުރި މައުލޫމާތުތައް ދިރާސާކުރުމުގެ މަސައްކަތް ފަށައިފަ އެވެ.