ރައީސްގެ ތާރީހީ އިސްނެންގެވުމެއް | ޖީލެއް ދުންފަތުން ސަލާމަތްކުރަން ރައްޔިތުންގެ ހިޔާލު ހޯއްދަވަނީ

ޒުވާން ޖީލު ދުންފަތާ ދުރުކުރުމަށް އެކަށައަޅުއްވާފައިވާ ޖެނެރޭޝަނަލް ބޭން ކަނޑައަޅުއްވާނޭ ގޮތާމެދު ރައްޔިތުންގެ ހިޔާލު ހޯއްދެވުމަށް، ރައީސް ޑރ. މުހައްމަދު މުއިއްޒު ޕޯލެއް ހުޅުވާލައްވައިފި އެވެ.

އިއްޔެ ހުޅުވާލި ތާރީހީ ޕޯލަކީ، ރާއްޖޭގެ ރައީސަކު ދައުރުގެ ތެރޭގައި، މުހިންމު ނިންމެވުމަކާ ބެހޭގޮތުން ރައްޔިތުންގެ ހިޔާލު ހޯއްދެވުމަށް، ސޯޝަލް މީޑިޔާ މެދުވެރިކޮށް ހުޅުވާލެއްވި މިފަދަ ފުރަތަމަ ޕޯލެވެ.

އެ މަނިކުފާނުގެ ރަސްމީ "އެކްސް" އެކައުންޓުން ހުޅުވާލައްވާފައިވާ ޕޯލްގައި ވަނީ، ޖެނެރޭޝަނަލް ބޭން ކަނޑައެޅުއްވުމުގައި އެ މަނިކުފާނު ހުށަހަޅުއްވާ ގޮތްތައް ހިއްސާކުރައްވާފަ އެވެ. އެގޮތުން އެ މަނިކުފާނު ހުށަހަޅުއްވާ ގޮތްތަކުގެ ތެރެއިން ގޮތެއް ހިޔާރުކުރުމަށް ޕޯލްގައި ވަނީ އެދިވަޑައިގެންފަ އެވެ.

ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި މިދިޔަ ބުދަ ދުވަހު ވާހަކަ ދައްކަވަމުން، ރައީސް ވަނީ، މިކަމާ ގުޅޭ ކެބިނެޓް ކަރުދާސް ތައްޔާރުކުރެއްވުމުގައި ކަމާގުޅޭ ފަރާތްތަކުގެ ތެރޭގައި ހިމެނިވަޑައިގަންނަވާ ޑޮކްޓަރުންނާއި، އަދިވެސް އެނޫންވެސް ފަރާތްތަކުގެ މަޝްވަރާވެސް ހޯއްދަވަން އިރުޝާދު ދެއްވާފައިވާނެކަން ހާމަކުރައްވާފަ އެވެ.

ޕޯލަށް ހުޅުވާލެއްވި ތިން ގޮތް ހުށަހެޅުއްވުމުގެ ހިކުމަތަކީ، 18 އަހަރާއި 25 އަހަރާ ދެމެދުގެ އުމުރުފުރާގެ މީހުން، ނުވަތަ ޒުވާނުން އެކަމުގެ ތެރޭގައި އެހާ ގިނަ ދުވަސް ނުވަނީސް، އެ ވަބާއިން ސަލާމަތް ކުރަން ފަސޭހަވާނެކަމުގައި ވާތީ ކަމަށްވެސް، ރައީސް ވިދާޅުވެފައިވެ އެވެ.