ލިވަޕޫލާއެކު ރާއްޖެ އިސްތިހާރު ކުރުން ރައީސް ފައްޓަވައި ދެއްވައިފި

މި ކެމްޕޭންގެ ދަށުން މެޗު ކުޅެމުންދާ ގަޑީގައި ރާއްޖޭގެ އިޝްތިހާރު ޕްރިމިއަ ލީގްގެ ސަޕޯޓަރުންނަށް ފެންނާނެ އެވެ. މީގެ އިތުރުން ލިވަޕޫލްއާއެކު ރާއްޖެ އިޝްތިހާރު ކުރުމުގެ ގިނަ ހަރަކާތްތަކެއް ހިންގާނެ އެވެ.

ރައީސް ޑރ. މުއިއްޒު އާއި ދެ މިނިސްޓަރުން އަދި އެމްއެމްޕީއާރުސީގެ އެމްޑީ ޝިއުރީ ޓޫރިޒަމް ކެމްޕޭން ފައްޓަވައި ދެއްވަނީ -- ރައީސް އޮފީސް

ދުނިޔޭގެ އެންމެ ސަޕޯޓަރުން ގިނަ އެއް ކްލަބް ކަމަށްވާ ލިވަޕޫލް އެފްސީއާއެކު ރާއްޖޭގެ ޓޫރިޒަމް އިސްތިހާރު ކުރުމުގެ ގްލޯބަލް ކެމްޕޭން ރައީސް ޑރ. މުހައްމަދު މުއިއްޒު ރަސްމީކޮށް ފައްޓަވައި ދެއްވައިފި އެވެ. 

އިންގްލިޝް ޕްރިމިއަ ލީގުގެ އެންމެ ކުރީގައި އޮތް ލިވަޕޫލްގެ ޓޫރިސްޓް ޑެސްޓިނޭޝަން ޕާޓްނަރަށް ރާއްޖެވާން އެމްއެމްޕީއާރުސީން އެ ކްލަބާއެކު ހެދި އެއްބަސްވުމުގެ ދަށުން ހިންގާ ޓޫރިޒަމް އިސްތިހާރު ކުރުމުގެ ހަރަކާތްތައް ރަސްމީކޮށް ފައްޓަވައި ދެއްވީ ރޭ ލިވަޕޫލްގެ ދަނޑުގައި އޮތް ރަސްމީއްޔާތެއްގަ އެވެ. 

ލިވަޕޫލް އާއި އެވަޓަން ބައްދަލު ކުރި މެދު ފެށުމުގެ ކުޑަ ވަގުތުކޮޅެއް ކުރިން ބޭއްވި މި ރަސްމިއްޔާތުގައި ރައީސް ޑރ. މުއިއްޒުގެ އިތުރުން ޓޫރިޒަމާއި ތިމާވެއްޓާ ބެހޭ މިނިސްޓަރު ތޯރިގު އިބްރާހިމް އާއި ސްޕޯޓްސް މިނިސްޓަރު އަބްދުﷲ ރާފިއުގެ އިތުރުން އެމްއެމްޕީއާރުސީގެ އެމްޑީ މުހައްމަދު ޝިއުރީ އާއި ޗެއާމަން އަބްދުﷲ ގިޔާސް ވެސް ބައިވެވަޑައިގަތެވެ.  

ރައީސް ލިވަޕޫލްގެ އިސްވެރިންނަށް ހަނދާނީ ހަދިޔާއެއް ދެނީ -- ރައީސް އޮފީސް

މި ހަފުލާގައި ލިވަޕޫލްގެ ވައިސް ޗެއާ / އަދި ސީއީއޯ ބިލީ ހޯގަންގެ އިތުރުން ބައެއް އިސްވެރިން ބައިވެވަޑައިގަތެވެ. ކެމްޕޭން ފެށުމުގެ ގޮތުން ރާއްޖޭގެ ރާއްޖޭގެ ވިޒިޓް މޯލްޑިވްސް ޖެހި ޖޯޒީއަކާއެކު ފޮޓޯ ނެގުން އޮތެވެ. އަދި ރާއްޖޭން ވަނީ އެ ކްލަބަށް ހަނދާނީ ހަދިޔާއެއްގެ ގޮތުގައި ރާއްޖޭގެ އިސްލާމީ ބިނާގެ ރަމްޒެއް ކަމަށްވާ މުންނާރެއް ހަދިޔާކޮށްފަ އެވެ. 

ރައީސް ޑރ. މުއިއްޒު ވަނީ އެ ވަގުތު މެޗު ބަލަން ދަނޑަށް ގޮސްތިބި ބައެއް ސަޕޯޓަރުންނާ ސަލާން ކުރައްވައި ވަގުތުކޮޅެއް ހޭދަކުރައްވާފައިވެ އެވެ. ރަސްމީކޮށް ރާއްޖޭން ލިވަޕޫލް ކްލަބުގައި އިސްތިހާރު ކުރަން ފެށުމާއެކު އެ ޓީމްގެ މެޗު ކުޅެމުންދާ ވަގުތުތަކުގައި ދަނޑުގެ ބިލްބޯޑް ތަކުން ރާއްޖޭގެ އިސްތިހާރު ފެންނަން ހުންނާނެ އެވެ. 

ކެމްޕޭން ލޯންޗް ކުރުމުގެ ގޮތުން ފޮޓޯއަކަށް ހުއްޓިގެން -- ރައީސް އޮފީސް

ރައީސް އޮފީހާއި ގައުމީ ޓީވީ ގުޅިގެން ގެންދޭ "ރައްޔިތުންގެ އަޑު" ޕޮޑްކާސްޓްގެ ދެވަނަ އެޑިޝަންގައި ވާހަކަ ދައްކަވަމުން ރައީސް ޑރ. މުއިއްޒު ވިދާޅުވެފައިވާ ގޮތުން މި ދަތުރަށް ރާއްޖޭގެ އެންމެ އިސްވެރިއެއްގެ ގޮތުގައި ރައީސް ވަޑައިގަތުމުގެ ބޭނުމަކީ ރާއްޖެއަށް ބޮޑު އެކްސްޕޯޝާއެއް ލިބޭ ގޮތަކަށް ކަންކަން ފަހި ކުރުމެވެ. މިއީ ރާއްޖޭގެ އިގްތިސޯދާއި ޓޫރިޒަމަށް ކުރެވޭނެ އިންވެސްޓްމަންޓެއް ކަން ރައީސް ފާހަގަ ކުރައްވާފައިވެ އެވެ. 

"ލިވަޕޫލް މެޗުގައި ފުރަތަމަ ހުންނަ ލެޑް ޕެނަލްތަކުން ރާއްޖެ [ރާއްޖޭގެ އިސްތިހާރު] ދައްކަން ފަށާނީ. މީގެ އިތުރުން ހުރިހާ ސޯޝަލް މީޑިއާތަކާއި މާޗެންޑަސްއެއްގައި ދައްކާނެ. އިތުރު ކަންކަންވެސް ހިމެނޭ. މި ދަތުރުގައި [ސްޕޯޓްސް މިނިސްޓަރު] ވެސް ބައިވެރިވަޑައިގަންނަވާނެ. ލިވަޕޫލްގެ ފުޓުބޯޅަ އެކެޑަމީއެއް ހެދުންވެސް މީ ހިމެނޭ. މި މަޝްވަރާތައް ކުރިއަށްދާނެ،" ފުރުމުގެ ކުރިން ވާހަކަ ދައްކަވަމުން ރައީސް ވިދާޅުވި އެވެ.

މިއީ ރާއްޖޭގެ އިގްތިސޯދާއި ޓޫރިޒަމަށް ކުރެވޭނެ އިންވެސްޓްމަންޓެއް

ރައީސް ޑރ. މުހައްމަދު މުއިއްޒު

ލިވަޕޫލްއާއެކު ރާއްޖޭން ގާއިމްކުރި އެއްބަސްވުމަކީ 2.5 މިލިއަން ޑޮލަރުގެ އެއްބަސްވުމެކެވެ. 

މި ކެމްޕޭނާއެކު ފެންނާނެ ބައެއް ކަންކަން

  • ރާއްޖޭގައި ލިވަޕޫލްގެ އެކަޑަމީއެއް އުފެއްދުން
  • ސްޕޯޓްސް ޓޫރިޒަމް ވަރުގަދަ ކުރުމުގެ މަސައްކަތް ފެށުން ޑެސްޓިނޭޝަން ބްރޭޑިން އިތުރުކުރުން ފަދަ ހައި ވެލިއު އެކްޓިވިޓީސްތަކެއް ފެށުން
  • ލިވަޕޫލްގެ 200 މިލިއަން ފޭނުން ފޭން ޒޯނުތަކާއި ރާއްޖެ އިސްތިހާރުކޮށް ވިޒިޓް މޯލްޑިވްސްގެ އިވެންޓުތަކާއި ބައިވެރިވާ ފެއާތަކާއި ރޯޑްޝޯތަކުގައި ލިވަޕޫލް ފެނިގެން ދިއުން
  • ލިވަޕޫލްގެ ލެޖެންޑުންނާއި ޑިޖިޓަލް އެންގޭޖްމަންޓް ކެމްޕެއިންތައް ހިންގައި ބުކިން އިތުރު ކުރުން
  • މީޑިއާ ރީޗް ކޮންމެ ސީޒަނަކަށް 397 މިލިއަނަށް ގެންދިއުން މީގެ ސަބަބު އަހަރަކު 17 މިލިއަން ޑޮލަރުގެ މީޑިއާ ކެމްޕޭން ލިބޭނެ

ވަކިވަކި ކުޅުންތެރިންނާއެކު ކެމްޕޭން ތަކެއް

ރައީސް ލިވަޕޫލްގެ ރަސްމީ ދަނޑު އެންފީލްޑް ބައްލަވައި ލައްވަނީ -- ރައީސް އޮފީސް

200 މިލިއަން ފޮލޯވަރުންގެ ތެރޭ އިސްތިހާރު ކުރެވޭނެ

އެމްއެމްޕީއާރުސީން ވަނީ މި އެއްބަސްވުމުގެ ސަބަބުން މި އަހަރުގެ ތެރޭގައި އިތުރު ލައްކައަކަށް ވުރެ ގިނަ ޓޫރިސްޓުން އަންނާނެ ކަމަށް އަންދާޒާކޮށްފަ އެވެ. އަދި މީގެ ސަބަބުން ޓޫރިޒަމަށް ލިބޭ އާމްދަނީ އިތުރު 100 މިލިއަން ޑޮލަރު މަތި ކުރުމުގެ މަގު ފަހިވާނެކަން އެ ކުންފުނިން ލަފާކުރެ އެވެ.

ލިވަޕޫލްއަކީ ގްލޯބަލް އޯޑިއަންސްގައި 205 މިލިއަން ފޮލޯވަރުން ތިބި ބޮޑު ކްލަބެކެވެ. އަދި މި ކްލަބުގެ ކޮންމެ ސީޒަނަކަށް 211 މިލިއަނަށް ވުރެ ބޮޑު ޓީވީ އޯޑިއަންސަކާއި 53 މިލިއަން ސޯޝަލް އަދި ޑިޖިޓަލް ފޮލޯވަރުން ބައިވެރިވެ އެވެ. މިއީ ރާއްޖެއަށް ހުޅުވިގެންދާނެ ބޮޑު ފުރުސަތެއްގެ ގޮތުގައި އެމްއެމްޕީއާރުސީގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވި އެވެ.

"މި ޕާޓްނާޝިޕް އިން އަޅުގަނޑުމެންގެ އަމާޒަކީ ރާއްޖެ ތަޖުރިބާ ކުރުމަށް އެތައް މިލިއަން ސަޕޯޓަރުން ގެނައުން،" ޝިއުރީ ވިދާޅުވި އެވެ.


އެމްއެމްޕީއާރުސީގެ ޗެއާމަން އަބްދުﷲ ގިޔާސް ވިދާޅުވި ގޮތުގައި އެ ކުންފުނީގެ އަމާޒަކީ އެންމެ މަދުވެގެން އެ ކުންފުނީގެ ލޮޕޯވަރުންގެ ތެރޭން އެއް ޕަސެންޓް މީހުން ރާއްޖެ ގެނައުމެވެ. އަދި ލިވަޕޫލްއަކީ ހަމައެކަނި އިނގިރޭސި ކުޅުންތެރިން ތިބި ކްލަބަކަށް ނުވާތީ މި ކްލަބުގެ އެހެން ގައުމުތަކުގެ ގިނަ ކުޅުންތެރިންތަކެއް ތިބުމަކީ ރާއްޖެއަށް ލިބިގެންދާނެ އިތުރު ފުރުސަތެކެވެ.

"ލިވަޕޫލްގެ ސްކޮޑުގައި އެހެން ގައުމުތަކުގެ ގައުމީ ޓީމްގެ ކުޅުންތެރިން އެބަތިބި. ބެންޗުގައިވެސް އެބަތިބި. މީގެ ކޮންމެ ކުޅުންތެރިއެއް ބޭނުންކޮށްގެން އެ މީހުންގެ ގައުމުގައި ރާއްޖެ އިސްތިހާރު ކުރުމުގެ ފުރުސަތު ލިބޭނެ،" އަބްދުﷲ ވިދާޅުވި އެވެ.

ރާއްޖޭގެ އިސްތިހާރު ދަނޑުގެ ލެޑް ޕެނަލްތަކުގައި ދައްކަނީ

މި ޕާޓްނާޝިޕްގެ ދަށުން މިދިޔަ މަހުގެ 27 ވަނަ ދުވަހު ވިޒިޓް މޯލްޑިވްސް އިން ވަނީ އިނގިރޭސިވިލާތުގައި ފުޅާ ދާއިރާއެއްގައި އައުޓްޑޯ ކެމްޕެއިނެއް ވެސް ފަށާފަ އެވެ. ތިން މަސް ދުވަހުގެ މި ކެމްޕެއިންގެ ދަށުން އިނގިރޭސިވިލާތުގެ އިސްތިރާޖީ ބައެއް ސަރަޙައްދުތަކުގައި އައުޓްޑޯ އަދި ޑިޖިޓަލް އެޑްވަޓައިޒިންގެ މަސައްކަތްތައް ކުރިއަށްގެންދިއުމަށް ވަނީ ހަމަޖެހިފައިވެ އެވެ. އެގޮތުން ލަންޑަންގެ 100 ޓެކްސީއެއްގައްޔާއި ބަސްތަކާއި ލަންޑަން އަންޑަގްރައުންޑް ވައިގެ ބަނދަރުތައް އަދި ބިޒްނަސް ކްލާސް ލައުންޖުތަކުގައި ވިޒިޓް މޯލްޑިވްސް ބްރޭންޑް ގިނަ ޢަދަދެއްގެ ބަޔަކަށް އިޝްތިހާރުކުރެވިގެންދާނެ އެވެ. މީގެ އިތުރުން، ޕްރިމިއަރ ލީގް މެޗުތައް އެންފީލްޑްގައި ކުޅޭ ދުވަސްތަކުގައި ސްޓޭޑިއަމްގައި ލެޑް ސައިނޭޖް ދައްކައި އެލްއެފްސީގެ ރަސްމީ ލުއި ފޮތްތަކާއި ޔޫރަޕުގެ އެކި ސަރަޙައްދުތަކުގައި ހުންނަ ބިލް ބޯޑުތަކުގައި ރާއްޖޭގެ ބްރޭންޑް އިޝްތިހާރުކޮށް ބައިނަލްއަޤުވާމީ ފެންވަރެއްގައި ފަތުރުވެރިކަން ކުރިއަރުވަން މަސައްކަތްކުރާނެ އެވެ. މީގެ އިތުރުން މި ޓީމްގެ ވަކިވަކި ކުޅުންތެރިން ބޭނުންކޮށް އެ މީހުން ނިސްބަތްވާ ގައުމުގައިވެސް ކެމްޕޭނެއް ހިންގާނެ އެވެ. ލިވަޕޫލް ސްކޮޑަށް ބަލާއިރު މި ވަގުތު ވެސް އާޖެންޓީނާ އާއި އިނގިރޭސިވިލާތް އަދި ފްރާންސުގެ އިތުރުން ގްރީސް އަދި ހަންގޭރީ އާއި އަޔަލެންޑު ކޮލަމްބި އާއި ހޮލެންޑް އަދި އުރުގުއޭއަށް ނިސްބަތްވާ ތަރިން އެބަތިބިއްބެވެ. މި މާކެޓްތަކަކީ ރާއްޖެއަށް މުސްތަގުބަލުގައި ޓޫރިސްޓުން އިތުރުކޮށް އިސްތިހާރު ކުރަން އެމްއެމްޕީއާރުސީން ކެމްޕޭން ހިންގާނެ މާކެޓުތަކަށް ވެގެންދާނެ އެވެ. މިއީ ރާއްޖެއަށް އާ ސޯސް މާކެޓުތަކެއް ކުރިއަށް އޮތް ފަސް އަހަރު ހޯދަން ލިބިގެންދާނެ އާ ފުރުސަތަކަށް ވާނެ އެވެ. އަދި ލިވަޕޫލްގެ ޓީމް ރާއްޖެ ގެނެސްގެން ކެމްޕޭން ހިންގުމާއި ރާއްޖޭން ބައިވެރިވާ ބޭރުގެ ފެއާތަކުގައި މި ކްލަބުގެ އެކި މެޓީރިއަމް ބޭނުންކޮށްގެން އިސްތިހާރު ކުރުންވެސް ހިމެނެ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.