18 މީހުންނާއެކު ދަތުރުކުރަމުން ދިޔަ މުދާ އުފުލާ ބޯޓެއްގައި ރޯވެ އަނދައިފި

މުދާ އުފުލާ ބޯޓެއްގައި ރޯވެ އަނދައިފި އެވެ.

އެމްއެންޑީއެފުން ބުނީ ރޯވީ "ހޮޅުދޫ ބޯޓު" ކިޔާ މުދާ އުފުލާ ބޯޓެއް ކަމަށެވެ. އެ އުޅަނދުގައި ރޯވުމުން، ކައްދޫ ފަޔާ ސްޓޭޝަނުން ހަރަކާތްތެރިވަމުންދާ ކަމަށް ވެސް ބުންޏެވެ.

މި ބޯޓުގައި ރޯވީ ކަނޑުމަތިންނެވެ. ބޯޓުގައި 18 މީހުން ތިބިއިރު، މިހާތަނަށް 17 މީހުން ސަލާމަތް ކޮށްފައިވާ ކަމަށް އެމްއެންޑީއެފުން ބުންޏެވެ.

ބޯޓުން ނުފެންނަނީ ލ. މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދު ކިޔާ މީހެކެވެ.

ރޯވިއިރު މި ބޯޓު ދަތުރުކުރަމުން ދިޔައީ ތ. ހިރިލަންދޫ އިން ފުރައިގެން މާލެ އަށެވެ. އާންމުވެފައިވާ ވީޑިއޯ އިން ފެންނަ ގޮތުގައި މުޅި ބޯޓުގައި ވަނީ ހުޅު ހިފާފަ އެވެ. އަލިފާން ރޯވާން މެދުވެރިވި ސަބަބެއް އަދި ނޭންގެ އެވެ.