ދިވެހިންނަށް މިރޭ ހާއްސަ | ދުނިޔޭގެ އެންމެ ބޮޑު އިސްޓޭޖަށް ރާއްޖެ

ރާއްޖެ މި ވަގުތު މިވަނީ ޓޫރިޒަމްގެ ވަރުގަދަ މާކެޓިން ކެމްޕޭންއަށް ބޭނުންވެފަ އެވެ. ރާއްޖެއާ ވާދަވެރިން ވަރުގަދަ ކެމްޕޭން ކުރިޔަސް ދިވެހިން މިހާތަނަށް ތިބީ ހަމައެކަނި ފެއާތަކުގައި ބައިވެރި "ބޮޑު ހަރަދު " ކުރާ ބައެއްގެ ގޮތުގަ އެވެ. ނަމަވެސް އެމްއެމްޕީއާރުސީގެ އާ މެނޭޖުމަންޓާއި ސަރުކާރުގެ މިހާރުގެ ވިސްނުން މިވަނީ ބަދަލުކޮށްފަ އެވެ. އެކަން މިވޭތުވެދިޔަ ތިން މަހެއްގެ ތެރޭގައި ފެންނަން ފަަށައިިފި އެވެ. މިގޮތުން ދިވެހި ގިނަ ބައެއްގެ ހިތަށް އުފާވެރިކަން ވެރިވި އެއް ކަމަކީ ދުނިޔޭގެ އެންމެ ބޮޑު ކުޅިވަރު ލީގް ޕްރިމިއަ ލީގުގައި ދިވެހިރާއްޖެ ފެންނާނެ ގޮތަށް "ވިޒިޓް މޯލްޑިވްސް" އިން ފެށި ކެމްޕޭނެ އެވެ.  މި ކެމްޕޭން ފެށުމުގެ ގޮތުން މިރޭ ރަސްމީކޮށް ލިވަޕޫލް އާއި އެވަޓަން އިން މިރޭ ކުޅޭ ފުޓުބޯޅަށް މެޗުގައި ޝަރަފުވެރި މެހުމާންއެއްގެ ގޮތުން ރައީސް ޑރ. މުހައްމަދު މުއިއްޒު ބައިވެރިވަޑައިގަންނަވާނެ އެވެ. 

ރައީސް މިހާރު ވަނީ އެ ރަސްމިއްޔާތުގައި ބައިވެރިވަޑައިގަތުމަށް އިނގިރޭސިވިލާތަށް ވަޑައިގެންފަ އެވެ. ރައީސް ޑރ. މުއިއްޒު އެ މެޗު ޝަރަފުވެރިކޮށްދެއްވަނީ ލިވަޕޫލްގެ ވައިސް ޗެއާ / އަދި ސީއީއޯ ބިލީ ހޯގަންގެ ދައުވަތަކަށެވެ. އެންފީލްޑްގައި އޮންނަ މި ހަފުލާގައި ލިވަޕޫލް އެފްސީގެ އޯނަރުންނާއި ގިނަ އަދަދެއްގެ މަޝްހޫރު ތަރިން ވެސް ބައިވެރިވާނެ އެވެ. 

ލިވަޕޫލްގެ އޮފިޝަލް ޓޫރިޒަމް ޑެސްޓިނޭޝަން ޕާޓްނަރަކަށް ރާއްޖެ ހަމަޖެހުމާއެކު ރާއްޖޭގެ ގިނަ އިސްތިހާރުތަކެއް މެޗު ކުޅެމުންދާ ގަޑިތަކުގައި ފެންނަން ހުންނާނެ އެވެ. މި ކެމްޕޭން މިރޭ ފެށުމާއެކު ލިވަޕޫލްގެ ހުރިހާ މެޗެއް ކުރިއަށްދާއިރު ޑިޖިޓަލް ބޯޑުން ރާއްޖެ ފެންނަން ހުންނާނެ އެވެ. މީގެ އިތުރުން ލިވަޕޫލްއާއެކު ޖޮއިންޓް ގިނަ ކެމްޕޭންތަކެއް ޔޫރަޕުގައި ކުރިއަށް ދާނެ އެވެ. މީގެ އިތުރުން ލިވަޕޫލްގެ ކުޅުންތެރިން ރާއްޖެ އައިސް ވެސް ގިނަ ހަރަކާތް ތަކެއް ހިންގާނެ އެވެ. 

މި ކެމްޕޭންގެ ދަށުން ލަންޑަންގެ ބަސްތަކާއި ޓްރާންސްޕޯޓް ވިއުގާގައި ރާއްޖެއާއި ލިވަޕޫލްގެ އިސްތިހާރުތަކެއް ޖަހަން ވަނީ ފަށާފަ އެވެ. މި ކެމްޕޭންގެ ދަށުން ލަންޑަންގެ 100 އަށްވުރެ ގިނަ ޓެކްސީ އާއި ބަސްތަކުގައި ރާއްޖޭގެ ރީތި މަންޒަރުތައް ވަނީ ޖަހާފަ އެވެ. މީގެ އިތުރުން ލަންޑަންގެ ރޭލްވޭ ވިއުގައިގައި ވެސް ރާއްޖޭގެ ޑިޖިޓަލް އިސްތިހާރު ތަކެއް ވަނީ ޖަހާފަ އެވެ. އަދި ބިމުއަޑީގެ މަގުތަކާއި ބިޒްނަސް ލައުންޖުތަކުގައި ވެސް ރާއްޖޭގެ އިސްތިހާރު ތަކެއް ވަނީ ޖަހާފަ އެވެ.

އެ ކުންފުނިން ބުނީ މި އިސްތިހާރުތަކުގެ ސަބަބުން 76 މިލިއަން ޓާގެޓް އޯޑިއަންސަކަށް ރާއްޖޭގެ ވާހަކަތައް ގެންގޮސްދީ މަތީ ފަންތީގެ މަންޒިލެއްގެ ގޮތުގައި ރާއްޖެ އޮތް މަގާމު ވަރުގަދަ ވެގެންދާނެ އެވެ.

އެމްއެމްޕީއާރުސީން ވަނީ ލިވަޕޫލް ބޭނުންކޮށްގެން ޔޫކޭގެ އިތުރުން އިންޑިއާ އާއި ޗައިނާގެ ޓާގެޓް އޯޑިއެންސްތަކަށް ހާއްސަ ކެމްޕޭނެއް ވަނީ ފަށާފަ އެވެ. ރާއްޖެއާއި ލިވަޕޫލް އެފްސީއާއެކު ހެދި އެއްބަސްވުމުގެ ދަށުން ދުނިޔޭގެ 100 ގައުމެއްގައި ހިންގާ 316 ލިވަޕޫލްގެ އޮފިޝަލް ފޭން ކްލަބްތައް މެދުވެރިކޮށް ވެސް ކެޕޭންތައް ހިންގަން ވަނީ ފުރުސަތު ލިބިފަ އެވެ.

އެ ކުންފުނިން ބުނީ ލިވަޕޫލް އެފްސީއާއެކު ކުރިއަށް ގެންދާ މި ޕާޓްނާޝިޕްގެ ސަބަބުން 2025 ވަނަ އަހަރު އެއް ލައްކައަށް ވުރެ ގިނަ ފަތުރުވެރިން ރާއްޖެ އަންނާނެ ކަމަށް ލަފާކުރެވޭއިރު ފަތުރުވެރިކަމުގެ އާމްދަނީގެ ގޮތުގައި ގާތްގަނޑަކަށް 200 މިލިއަން ޑޮލަރު ލިބޭނެ ކަމަށް ބެލެވެ އެވެ. މި ކެމްޕޭނުގައި ޖުމްލަ 2.5 މިލިއަން ޑޮލަރުގެ އިންވެސްޓްމަންޓެއް ކުރާއިރު އަހަރަކު އިނީޝިއަލް އިންވެސްޓްމަންޓަށް 20 ގުނަ އިތުރުވާނެ ކަމަށް ލަފާކުރެވޭ ރިޓާން އޮން އިންވެސްޓްމަންޓް ރާއްޖެއަށް ލިބޭނެ އެވެ. މި ކެމްޕޭންގެ ދަށުން ރާއްޖެއަށް ލިވަޕޫލް ޓީމު އައުމާއެކު އެ ކްލަބުގެ ކުޅުންތެރިން ބޭނުންކޮށްގެން އެ ކުޅުންތެރިން ނިސްބަތްވާ ގައުމުގައި ރާއްޖެ އިސްތިހާރު ކުރުންފަދަ ކަންކަން ކުރަން މަގުފަހިވާނެ އެވެ.