މަސީން ލޮޖިސްޓިކް އަދި ޓްރާންސްޕޯޓް ސިނާއަތުގައި ހުރި ދަތިތަކާ ބެހޭ ރިޕޯޓެއް
މި ރިޕޯޓުގައި އެންމެ ބޮޑަަށް ފާހަގަކޮށްފައިވާ އެއް މައްސަލައަކީ ބިދޭސީ ވިޔަފާރިތަކުން ރާއްޖޭގައި ގަވައިދާ ހިލާފަށް މަސައްކަތް ކުރުމެވެ. މިކަމުގެ ސަބަބުން ދިވެހިންނަށް ގެއްލުންްވާކަން ފާހަގަކޮށްފައިވެ އެވެ.
ރާއްޖޭގެ މުދާ އުފުލުމާއި ކަނޑު ދަތުރުފަތުގެ ސިނާއަތުގައި ހުރި މައްސަލަތަކާއި ދަތިތައް ފާހަގަކޮށް އެކަމަށް ހައްލު ހޯދުމުގެ މަސައްކަތް ރާއްޖޭގެ ގައުމީ ކޮންޓްރަކްޝަން ޖަމިއްޔާ މަސީން ފަށައިފި އެވެ.
އެތައް މިލިއަން ޑޮލަރެއްގެ އަގު ބޮޑު ރާއްޖޭގެ ލޮޖިސްޓިކް އެންޑް ޓްރާންސްޕޯޓް އިންޑަސްޓްރީގައި ބިދޭސީން ހަރަކާތްތެރި ވަމުންދާތީ ދިވެހި ވިޔަފާރިތަކަށް އިންތިހާ އަށް ދަތިތަކާ ކުރިމަތިވަމުންދާކަން ފާހަގަކޮށް މަސީގެ އިސް ނެގުމަކަށް މި މަސައްކަތް ފެށުމުގެ ގޮތުން އެ ޖަމިއްޔާ އިން ވަނީ މި ސިނާއަތުގައި ހުރި މައްސަލަތައް ފާހަގަކޮށް ތަފުސީލީ ރިޕޯޓެއް މިއަދު ނެރެފަ އެވެ.
ހޮޓެލް ޖެންގައި ބޭއްވި ރަސްމިއްޔާތެއްގައި ދިވެހިރާއްޖޭގެ ލޮޖިސްޓިކް އަދި ޓްރާންސްޕޯޓް ސިނާއަތައް ދިމާވެފައިވާ ދަތިތަކާ ބެހޭ ރިޕޯޓް ނެރެރެއްވީ އިކޮނޮމިކް މިނިސްޓަރު މުހައްމަދު ސައީދު އާއި މަސީގެ ރައީސް މުހައްމަދު އަލީ ޖަނާހުގެ އިތުރުން މަސީގެ ލޮޖިސްޓިކް އަދި ޓްރާންސްޕޯޓް ކޮމެޓީގެ ޗެއާ އަބްދުﷲ ސަވާދު އެވެ.
ރިޕޯޓް ނެރެދެއްވުމަށްފަހު މިނިސްޓަރު ސައީދު ވިދާޅުވީ މި މަސައްކަތް ފެށިގެން ގޮސްފައިވަނީ މަސީގެ އެދުމުގެ މަތިން ރައީސް ޑރ. މުހައްމަދު މުއިއްޒު ވިދާޅުވެފައިވާ ރާއްޖޭގެ ވިޔަފާރިތަކަށް ހުރި ދަތިތައް ނައްތާލަން ކުރައްވާ މަސައްކަތުގެ ދަށުން ކަމަށެވެ. އަދި މި މަސައްކަތުގެ ދަށުން މަސީއާއެކު އިކޮނޮމިކް މިނިސްޓްރީގެ ޓީމެއް ހާއްސަކޮށް މަސައްކަތް ކޮށްފައިވާނެ މިނިސްޓަރު ވިދާޅުވި އެވެ.
ސައީދު ވިދާޅުވި ގޮތުގައި މި ސަރުކާރުން އެންމެ ބޮޑު އިސްކަމެއް ދެނީ ވިޔަފާރިތަކާއެކު މަޝްވަރާކޮށްގެން ކަންކަން ކުރުމަށް ކަމަށާ އެގޮތުން ބިޒްނަސް ކައުންސިލްގައި މިހާރުވެސް އިމާރާތް ކުރުމުގެ ސިނާއަތާ ގުޅުންހުރި އިސް ތިން ބޭފުޅަކު ތިއްބަވާކަން ފާހަގަ ކުރެއްވި އެވެ.
ވިޔަފާރިތަކާއެކު ކުރައްވާ ބައެއް މަޝްވަރާތަކުގެ ތަފުސީލް ދެއްވަމުން މިނިސްޓަރު ވިދާޅުވީ މިދިޔަ 11 އަހަރު ތެރޭގައި ބިޒްނަސް ކައުންސިލުން ޖުމްލަ 18 ބައްދަލުވުމެއް ބޭއްވިނަމަވެސް މި ސަރުކާރުގެ މިދިޔަ 17 މަސް ދުވަހުގެ ތެރޭ ފަސް ފަހަރެއްގެ މަތިން ވަނީ މަޝްވަރާ ކުރެއްވިފަ އެވެ.
"މިދިޔަ ފަސް އަހަރު ވެސް ބޭއްވިފައިވަނީ ފަސް ފަހަރު ބައްދަލުވުމެއް. އޭގެ ބާކީ އަހަރުތަކުގައި 13 ފަހަރު ބައްދަލު ކުރި. އެކަމަކު މިދިޔަ 17 މަސް ތެރޭ އަޅުގަނޑު ޗެއާކޮށްގެން ހަމަ ގައިމު ވެސް ފަސް ފަހަރު މަޝްވަރާ ބައްދަލުވުން ބާއްވައިފިން. މި ބައްދަލުވުންތަކުގައި އެންމެ ގިނައިން ވާހަކަ ދެކެވިފައިވަނީ މި އިންޑަސްޓްރީއަށް ދިމާވާ މައްސަލަތަކާމެދު،" ސައީދު ވިދާޅުވި އެވެ.
މިއީ އެންޖީއޯއަކުން ސަރުކާއެކު މަސައްކަތް ކުރުމުގެ ނަމޫނާއެއް
މަސީގެ ރައީސް މުހައްމަދު އަލީ ޖަނާހު ވިދާޅުވީ މަސީގެ މި މަސައްކަތުގައި އެންމެ މުހިންމު ދައުރެއް އަދާކުރެއްވި އެއް ފަރާތަކީ އިކޮނޮމިކް މިނިސްޓަރު ސައީދު ކަމަށާ މިއީ އެންޖީއޯއަކާއ ސަރުކާރު ގުޅިގެން މަސައްކަތް ކުރުމުގެ ނަމޫނާ "ޓެމްޕްލޭޓެއް" ގެ ގޮތުގައި ދެކިވަޑައިގަންނަވާ ކަމަށެވެ،
"އިކޮނޮމިކް މިނިސްޓަރު އިސްނެންގެވުމެއްގެ ދަށުން ރާސްލާފަ މީޓިންތައް ބާއްވައިގެން ކުރިއަށް ދިޔައީ. މިނިސްޓްރީ މެދުވެރިކޮށް ސްޓޭކް ހޯލްޑަރު ޑިޕާޓްމަންޓް ތަކެއް [މިނިސްޓަރު ސައީދު] އުފެއްދެވި،" ޖަނާހު ވިދާޅުވި އެވެ.
މަސީގެ ލޮޖިސްޓިކް އަދި ޓްރާންސްޕޯޓް ކޮމެޓީގެ ޗެއާ ސަވާދު ވިދާޅުވި ގޮތުގައި ރާއްޖެއަށް މުދާ ގެނައުމާއި ސަޕްލައި ކުރުމުގައި ގިނަ ދަތިތަކެއް ކުރިމަތިވާ ކަމަށާ މީގެ މައިގަނޑު ސަބަބަކީ މުއްސަސާތަކުން ކަނޑައަޅާފައިވާ ގަވައިދުތައް އެކަށީގެން ނުވުމެވެ. މިކަން ހައްލު ކުރަން މަސައްކަތް ކުރުމަކީ މަސީގެ ލޮޖިސްޓިކް އެންޑް ޓްރާންސްޕޯޓް ކޮމެޓީގެ އެންމެ އިސް ވާޖިބުކަން އޭނާ ފާހަގަ ކުރެއްވި އެވެ.
"މި ދަތިތައް ހައްލު ކުރެވޭނީ ޕޮލިސީ ލެވަލްގައި ބަދަލުތަކެއް ގެނެވިގެން. މި ދިރާސާތަކުގައި ބަލާފައިވާނީ އެންޔޫސާއަށް ހިދުމަތްދޭ ފަރާތްތަކުގެ ތެރޭން ދަތިތަކާ ދިމާވެފައިވަނީ ކޮން ދިމާލަކުން ތޯ. އެ ދަރިތައް ދެނެގަތުމަށްފަހު ދެ ފަރާތުން ފާހަގަ ކުރެވުނު ކަންކަމަށް ހައްލެއް ހޯދުމުގެ މަސައްކަތް ކުރެވޭނެ،" ސަވާދު ވިދާޅުވި އެވެ
އުޅަނދު އަޅާނެ ބަނދަރެއް ނެތުމުގެ މައްސަލަ ބޮޑު
މި ރިޕޯޓުގައިވާ ގޮތުން ރާއްޖޭގައި އެންމެ ގިނަ ވިޔަފާރި ހިނގާ ހުޅުމާލޭގައި މުދާ އުފުލާނެ ވަސީލަތާއި ތަން ނެތުމާއި
މި ދާއިރާގައި ތަމްރީން ލިބިފައިވާ ކެޕްޓަރުންނާއި ކްރޫން ނެތުމުން ދަތިތަކާ ކުރިމަތިވާކަން ފާހަގަކޮށްފައިވެ އެވެ. މީގެ އިތުރުން
މުދާ އުފުލަން ބޭނުންކުރާ ބޮޑެތި ލޮޖިސްޓިކް އުޅަނދު ފަހަރަށް އަޅާނެ ރަނގަޅު ބަނދަރެއް ނެތުމުން ގިނަ ދަތިތަކާ ކުރިމަތިވަމުންދާކަން ފާހަގަކޮށްފައިވެ އެވެ. މި ރިޕޯޓް ނެރުމަށް ބޭއްވި ބައްދަލުވުމުގައި އޮތް ފޯރަމްގައި ގިނަ ކުންފުނިތަކުން ވަނީ ލޮޖިސްޓިކް އުޅަނދު ފަހަރަށް ރަނގަޅު ބަނދަރެއް ހަމަޖައްސައިދޭން ސަރުކާރުގައި އެދުމަށް މަސީގެ ކިބައިން އެދިފަ އެވެ.
ބިދޭސީ ކުންފުނިތަކާހެދި ދިވެހި ވިޔަފާރިތަކަށް ގެއްލުން
- މުޅި އިންޑަސްޓްރީގެ 80 ޕަސެންޓް ކޮންޓްރޯލް ކުރަނީ ބިދޭސީން
- ބިދޭސީ ކުންފުނިތައް ރާއްޖެއަށް އައިސް މި ދާއިރާގައި ގަވައިދާ ހިލާފަށް މަސައްކަތް ކުރޭ
- ކަސްޓަމްސް ކްލިއަރެންސް މަސައްކަތުގައި ބޭރުގެ ކުންފުނިތައް އުޅުން
- މުދާ އުފުލުމާއި ސަޕްލައި އަދި ސްޓިލްޑޯއިން މަސައްކަތުގެ ގަވައިދާ ހިލާފަށް ބިދޭސީ ކުންފުނިތައް ގިނަ އަަދަދަށް އުޅުން
- ދޯނި ފަހަރާއި ލޭންޑިން ކްރާފްޓް އަދި އެއްގަމު އުޅަނދު ފަހަރު ކުއްޔަށް ދޫކުރުމުގައި ބިދޭސީން އުޅުމުން ދިވެހި ވިޔަފާރިތަކަށް ގެއްލުންވުން
- ކޮންސްޓްރަކްޝަނަށް ބޭނުންވާ ސާމާނު ތިލަފުށްޓާއި ހުޅުމާލެ ނޫން ރާއްޖޭގެ އެހެން ސަރަހައްދުތަކުގައި ވިޔަފާރި ކުރުން
- ބިދޭސީ ކުންފުނިތަކުން މާލެއަށް މުދާ ނުގެނެސް ހާއްސަ ހުއްދަ ނަގައިގެން ޕްރޮޖެކްޓް ހިނގާ ސަރަހައްދުގައި ގާނޫނާ ހިލާފަށް މަސައްކަތް ކުރުން
- ވަގުތީ ހުއްދައަކަށް ހޯދާ އުޅަނދު ފަހަރު ކުއްޔަށް ދީ ނުގަވައިދުން ވިޔަފާރި ކުރުން
ރިޕޯޓް ނެރުމަށްފަހު ބައިވެރިންގެ ސުވާލުތަކަށް ޖަވާބު ދެއްވަމުން ސަވާދު ވިދާޅުވި ގޮތުގައި އޭނާގެ މައިގަނޑު ވިސްނުމަކީ ބިދޭސީން މި ދާއިރާއިން ނެރެ ދިވެހިންނަށް ފުރުސަތު ފަހިކޮށް ދިނުމެވެ.
"ބައެއް ބޭފުޅުން ހުރެދާނެ ފޮރިން ބޭފުޅުން [ފޮރިން ޕާޓީ] ތަކާއެކު މި ދާއިރާއަށް ވަންނަ މަގުތައް ހުޅުވުމުގެ ވިސްނުމެއް. ނަމަވެސް އަޅުގަނޑު އެއްގޮތަކަށްވެސް އެއަށް ތާއީދެއް ނުކުރުން،" ސަވާދު ވިދާޅުވި އެވެ.
މަސީން މީގެ ކުރިން ވަނީ މިފަދަ ރިޕޯޓްތައް ނެރެފަ އެވެ. މިގޮތުން ކޮވިޑްގެ ހާލަތާ ގުޅިގެން އިމާރާތް ކުރުމުގެ ސިނާއަތައް ލިބުނު ގެއްލުމާ ބެހޭ ގޮތުންވެސް ކުރިން ރިޕޯޓެއް އެކުލަވާލި އެވެ. އަދި އެ ރިޕޯޓާ ގުޅިގެން ސަރުކާރުން އިމާރާތް ކުރުމުގެ ސިނާއަތަށް އިސްކަން ދީ ގިނަ އެހީތަކެއްވެސް ދީފައިވެ އެވެ.
ކޮމެންޓް
Republic of Maldives