ޣައްޒާ އަލުން ބިނާކުރަން އަރަބިން ހުށަހެޅި ޕްލޭނަށް ރާއްޖޭން ތާއީދުކޮށްފި

އިޒްރޭލުގެ ލާއިންސާނީ އުދުވާނުތަކުގައި ސުންނާފަތިވެފައި އޮތް ފަލަސްތީނުގެ ޣައްޒާ އަލުން ބިނާކޮށް، ފަލަސްތީނުގެ ރައްޔިތުންގެ ހައްގުތައް ކަށަވަރު ކުރެވޭ ގޮތަށް އަރަބި ގައުމުތަކުން ހުށަހަޅާފައިވާ ޕްލޭނަށް ރާއްޖޭން ތާއީދުކުރާކަން ރަސްމީކޮށް ހާމަކޮށްފި އެވެ. 

ރާއްޖޭން މި ކަން ހާމަކޮށްފައިވަނީ، ފަލަސްތީނުގެ ރައްޔިތުން އެމީހުންގެ ބިމުން ފޭބުމަށް ގޮވާލާ ގޮވާލުންތަކާ ދެކޮޅަށް އަޑުއުފުލުމަށް އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)އިން ސައުދީ އަރަބިއްޔާގެ ޖިއްދާގައި ހާރިޖީ ވަޒީރުންގެ ފެންވަރުގައި މިއަދު ބޭއްވި އެކްސްޓްރާއޯޑިނަރީ ސެޝަންގައި ފޮރިން މިނިސްޓަރު ޑރ. އަބްދުﷲ ހަލީލް އެވެ. 

މި ބައްދަލުވުމުގައި ހަލީލް ދެއްވި ތަގުރީރުގައި، އިޒްރޭލުން ހަނގުރާމަ ހުއްޓާލުމުގެ އެއްބަސްވުމާ ހިލާފުވެފައިވާކަން ފާހަގަކޮށް، މެދުކެނޑުމެއްނެތި އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އަނިޔާވެރިކަން ކުށްވެރިކުރައްވައި އެކަމާ ކަންބޮޑުވުން ފާޅުކުރެއްވި އެވެ. 

އަދި ފަލަސްތީނުގެ ރައްޔިތުން އެ މީހުންގެ ބިމުން ފޭބުމަށް ގޮވާލާ ގޮވާލުންތައް ކުށްވެރިކޮށް، ޣައްޒާގެ ހުރިހާ ސަރަޙައްދަކަށް ރައްކާތެރިކަމާއެކު، ދެމެހެއްޓެނިވި ގޮތެއްގައި އަދި ހުއްޓުމެއްނެތި އިންސާނީ އެހީތެރިކަން ފޯރުކޮށްދިނުމަށް ގޮވާލެއްވި އެވެ. 

އަދި އަރަބް ލީގް ސަމިޓްގައި ފާސްކުރެވުނު ޣައްޒާ އަލުން ބިނާކުރުމުގެ ޕްލޭނަށް ރާއްޖޭން ފުރިހަމައަށް ތާއީދުކުރާކަމަށް ވެސް ހަލީލް ހާމަކުރެއްވި އެވެ. 

މީގެ އިތުރުން، ފަލަސްތީނުގެ މައްސަލައަށް ހައްލެއް ހޯދުމަށް ކުރާ މަސައްކަތުގައި ރާއްޖޭން އަބަދުވެސް އެއްބާރުލުން ދޭނެކަމުގެ ޔަގީންކަން ދެއްވައި، ފަލަސްތީނަށް ފޯރުކޮށްދެމުންދާ އިންސާނީ އެހީތެރިކަމަށް ހުރަސްއެޅޭ ގޮތަށް އިޒްރޭލުން ހިންގަމުންދާ އަމަލުތަކާ ގުޅިގެން އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) ގެ އިސްތިޝާރީ ލަފައެއް ހޯދުމަށް ހުށަހަޅާފައިވާ މައްސަލައިގައި ދިވެހިރާއްޖެއިން ބައިވެރިވެ، އެ ކޯޓަށް ބަޔާނެއް ހުށަހެޅިކަން ފާހަގަކުރެއްވި އެވެ. 

ހަމައެއާއެކު، މި ހަނގުރާމައަށް އޮތް ހަމައެކަނި ދެމެހެއްޓެނިވި ހައްލަކީ 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްޠީނުގެ ދައުލަތް ގާއިމުކުރެވުމުން ކަމުގައި ހަލީލް ވިދާޅުވި އެވެ.

މިސްރުން އިސްވެ ހުށަހެޅި ޣައްޒާ އަލުން ބިނާ ކުރުމުގެ ޕްލޭން އަރަބި ބޮޑެތި ގައުމުތަކުން ވަނީ އެއްބަސްވެފަ އެވެ.

ގާތްގަނޑަކަށް 53 ބިލިއަން ޑޮލަރުގެ ޕްލޭނުގައި ވަނީ ޣައްޒާގައި އިމާރާތްތަކާއި ވަސީލަތްތައް ބިނާކުރުމުގެ އިތުރަށް ފަލަސްތީނުގެ ރައްޔިތުންގެ ހައްގުތަކާއި ސަލާމަތީ ކަންކަން ބެލެހެއްޓުން ވަރަށް ތަފްސީލުކޮށް ހިމަނައިފަ އެވެ.

އޯއައިސީ އަކީ 57 ގައުމުގެ މައްޗައް އެކުލެވިގެންވާ ފަލަސްތީނުގެ ހައްގުގައި އަބަދުސް ވަކާލާތުކުރަމުން އަންނަ ޖަމްއިއްޔާއެކެވެ. ދިވެހިރާއްޖެ އަކީ 1976 މި ޖަމްއިއްޔާގެ މެމްބަރަކަށް ވުމަށްފަހު މި ޖަމްއިއްޔާގައި އިސްކޮށް ހަރަކާތްތެރިވަމުން އަންނަ ގައުމެކެވެ. 

ޣައްޒާ އަލުން ބިނާކުރުމުގެ ޕްލޭނެއް އެކުލަވައިލަން އަރަބި ގައުމުތަކުން އިސްނެގީ، ޣައްޒާ އަމިއްލަކޮށްލައި، އެތަން ތަރައްގީ ކުރަން، އެތަނުގައި ދިރިއުޅޭ 2.4 މިލިއަނެއްހާ ފަލަސްތީނުގެ ރައްޔިތުން ބާލަން އެމެރިކާ ރައީސް ޑޮނަލްޑް ޓްރަމްޕް ކުއްލި ގޮތަކަށް ހުށަހެޅުއްވުމުންނެވެ.

ނަމަވެސް، ފަލަސްތީނުގެ ރައްޔިތުން އެ މީހުންގެ އަމިއްލަ ވަޒަނުން ބާލާ ގޮތަށް އެކުލަވައިލެވޭ އެއްވެސް ޕްލޭނަކާ ކަނޑައެޅިގެން ދެކޮޅު ކަމަށް ރާއްޖޭގެ އިތުރުން ދުނިޔޭގެ ގިނަ ގައުމުތަކުން ވަނީ ބުނެފަ އެވެ.