މިފްކޯގެ ސީއީއޯގެ މަގާމަށް ފަރުހަތު އައްޔަނުކޮށްފި

ދައުލަތުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޯޕަރޭޝަން (މިފްކޯ)ގެ ސީއީއޯގެ މަގާމަށް، ކުރީގެ ވައިސް ޗީފް އޮފް ޑިފެންސް ފޯސް ފަރުހަތު ޝަހީރު އައްޔަނުކޮށްފި އެވެ. 

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ބުނީ މިފްކޯގެ ހުސްވެފައިވާ އެމްޑީ އަދި ސީއީއޯގެ މަގާމަށް ފަރުހަތު އައްޔަނުކޮށްފައިވާ ކަމަށެވެ. 

މިފްކޯގެ ސީއީއޯގެ މަގާމު ހުސްވީ، އެ މަގާމުގައި ހުންނެވި ސްވިޒްލޭންޑުގެ ޑރ. ވިޓާލީ ލިޔުބޮމިވް ވަކިކުރެއްވުމާ ގުޅިގެންނެވެ. 

މިފްކޯގެ ބޭރު ގައުމެއްގެ ފުރަތަމަ ސީއީއޯ، ވިޓާލީ ވަކިކުރީ މިދިޔަ ހޯމަ ދުވަހު އެވެ. 

ކުރީގެ ރައީސް މުހައްމަދު ނަޝީދުގެ ވެރިކަމުގައި ވައިސް ޗީފް އޮފް ޑިފެންސް ފޯސްގެ މަގާމުގައި ހުންނެވި ފަރުހަތު، ސިފައިންގެ ހިދުމަތުން ރިޓަޔާ ކުރެއްވީ 2012 ވަނަ އަހަރުގެ ތެރޭގަ އެވެ.

އޭގެފަހުން، ކުރީގެ ރައީސް އަބްދުﷲ ޔާމީންގެ ސަރުކާރުގައި، ފަރުހަތު ވަނީ ސަރުކާރުގެ މައި ހޮސްޕިޓަލު، އައިޖީއެމްއެޗްގެ ސީއީއޯގެ މަގާމު އަދާކުރައްވައިފަ އެވެ.