ފަޅު ގެއެއްގައި ރޯވުން: 55 މީހަކަށް ވަގުތީ ބޯހިޔާވަހިކަން

މާލޭގައި ހުންނަ މ. ހައުސްޕްލާޒާގައި މިއަދު ހެނދުނު ހިނގި އަލުފާނުގެ ހާދިސާގެ ސަބަބުން 55 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން ބުނެފި އެވެ.

ގިނަ ދުވަސްތަކެއް ވަންދެން ފަޅުގެއެއްގެ ގޮތުގައި ހުންނަ އެ ގޭގައި އަލިފާން ރޯވެފައިވަނީ އެތެރޭގައި ހުރި ކުނިތަކެއްގަ އެވެ.

މި ހާދިސާގެ ސަބަބުން ކައިރީ ހުރި ދެ ގެއެއްގެ މައި ފެންހޮޅިއަށް ވަނީ ގެއްލުން ލިބިފަ އެވެ. އެހެންވެ، އެކަން މާރާމާތު ކުރެވެންދެން އެ ދެ ގޭގައި ދިރިއުޅޭ 55 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް އެންޑީއެމްއޭ އިން ވަނީ ބުނެފަ އެވެ. އޭގެ ތެރޭގައި 20 ބިދޭސީން ވެސް ހިމެނެ އެވެ.

ހައުސްޕްލާޒާގައި އަލިފާން ރޯވި ކަމުގެ މައުލޫމާތު އެމްއެންޑީއެފްއަށް ލިބިފައި ވަނީ ހެނދުނު 6:35 ހާއިރު އެވެ. އެ ހިދުމަތުން ބުނީ ފަޔަރފައިޓަރުން ކުރި މަސައްކަތުން ރޯވެފައިހުރި އަލިފާން އެއްކޮށް ނިއްވާލާފައިވަނީ 07:47 ހާއިރު ކަމަށެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ.